హైదరాబాద్ ప్రయాణికులకు గుడ్‌న్యూస్‌.. ఆర్టీసీ-మెట్రో కామన్ పాస్‌ ప్రారంభం!
హైదరాబాద్ ప్రయాణికులకు శుభవార్త! డిప్యూటీ సీఎం భట్టి విక్రమార్క తెలంగాణ ఆర్టీసీ, హైదరాబాద్ మెట్రో కామన్ పాస్ను ప్రారంభించారు. ఒకే పాస్‌తో బస్సు, మెట్రోలో ప్రయాణించవచ్చు. ఇది ప్రజా రవాణాను సమన్వయం చేసి, ప్రయాణికులకు సౌకర్యాన్ని పెంచుతుంది. ట్రాఫిక్ తగ్గి, ప్రయాణ సమయం ఆదా అవుతుంది. ధర, నిబంధనలపై త్వరలో వివరాలు వెల్లడిస్తారు.
Updated on: Oct 02, 2026 | 2:21 PM
హైదరాబాద్ ప్రజా భవన్‌లో శుక్రవారం (అక్టోబర్ 2) తెలంగాణ ఆర్టీసీ, హైదరాబాద్ మెట్రో రైల్‌ కామన్ పాస్ను ఉప ముఖ్యమంత్రి భట్టి విక్రమార్క ప్రారంభించారు. నగర ప్రజా రవాణా వ్యవస్థలను మరింత సమన్వయం చేసి, ప్రయాణికులకు సులభమైన ప్రయాణ సౌకర్యం కల్పించే లక్ష్యంతో ఈ కొత్త విధానాన్ని అందుబాటులోకి తీసుకొచ్చారు. ఈ కార్యక్రమంలో రాష్ట్ర మంత్రులు పొన్నం ప్రభాకర్‌, శ్రీధర్‌బాబు, వివేక్‌ వెంకట్‌స్వామి, అజారుద్దీన్‌ తదితరులు పాల్గొన్నారు. ఆర్టీసీ బస్సులు, మెట్రో రైళ్లను వినియోగించే ప్రయాణికులకు ఒకే కామన్ పాస్‌ ద్వారా ప్రయాణించే అవకాశాన్ని రాష్ట్ర ప్రభుత్వం కల్పించింది.
హైదరాబాద్‌లో రోజువారీగా ఉద్యోగులు, విద్యార్థులు, వ్యాపారులు, ఇతర ప్రయాణికులు పెద్ద సంఖ్యలో ప్రజా రవాణాపై ఆధారపడుతున్నారు. బస్సు నుంచి మెట్రోకు లేదా మెట్రో నుంచి బస్సుకు మారే సమయంలో వేర్వేరు టికెట్లు, పాస్‌ల అవసరం తగ్గించడమే కామన్ పాస్‌ లక్ష్యం. దీంతో నగరంలో ప్రజా రవాణా వినియోగం పెరగడంతో పాటు, ప్రైవేట్‌ వాహనాలపై ఆధారపడటం కొంతవరకు తగ్గే అవకాశం ఉంది. ట్రాఫిక్ రద్దీ, ప్రయాణ సమయం, టికెటింగ్‌ ప్రక్రియను సులభతరం చేయడంలో ఈ విధానం ఉపయోగపడుతుందని అధికారులు భావిస్తున్నారు.
కామన్ పాస్‌ ధర, చెల్లుబాటు, వినియోగ నిబంధనలు, ఏయే రూట్లలో వర్తిస్తుంది వంటి పూర్తి వివరాలను సంబంధిత అధికారులు వెల్లడించనున్నారు. హైదరాబాద్ నగర ప్రజా రవాణాలో ఆర్టీసీ–మెట్రో సమన్వయానికి ఈ కామన్ పాస్‌ కీలక అడుగుగా నిలవనుంది.
మరిన్ని తెలంగాణ వార్తల కోసం ఇక్కడ క్లిక్ చేయండి..
