హనుమకొండలో వింత ఘటన.. నాగులచవితి రోజున ఆలయంలో భారీ నాగుపాము ప్రత్యక్షం!

నాగులచవితి రోజున ఓ ఆలయంలో భారీ నాగుపాము ప్రత్యక్షమై భక్తులను ఆశ్చర్యానికి గురిచేసింది. దక్షిణకాశీగా పేరుగాంచిన హనుమకొండలోని స్వయంభు సిద్ధేశ్వర ఆలయ ప్రాంగణంలో కనిపించిన ఈ నాగుపామును చూసి భక్తులు అబ్బురపడ్డారు. ఏడు అడుగులకు పైగా పొడవున్న నాగుపాము ఆలయ పరిసరాల్లో సంచరించడం అక్కడ ఆసక్తికర చర్చకు దారితీసింది.

కాకతీయులకు పూర్వమే వెలసిన ఆలయం

హనుమకొండలోని స్వయంభు సిద్ధేశ్వర ఆలయానికి ఎంతో ప్రాచీన చరిత్ర ఉంది. కాకతీయుల కాలానికి పూర్వమే ఈ ఆలయం వెలసిందని స్థానికుల నమ్మకం. ఈ క్షేత్రాన్ని నాగబంధం రక్షిస్తుందని, ఇక్కడ శివుడు స్వయంభువుగా కొలువై ఉన్నాడని భక్తులు విశ్వసిస్తారు. అంతేకాదు.. ప్రతిరోజూ తెల్లవారుజామున బ్రహ్మముహూర్తంలో ఓ నాగుపాము ఆలయంలోకి వచ్చి గర్భగుడిలోని శివలింగాన్ని స్పృశించి వెళ్తుందని స్థానికంగా ప్రచారం ఉంది.

నాగులచవితి రోజున భారీ నాగుపాము

తరచూ ఆలయ పరిసరాల్లో కనిపిస్తుందని చెబుతున్న నాగుపాము.. ఈసారి నాగులచవితి రోజున భక్తులకు దర్శనమిచ్చింది. గోధుమ వర్ణంలో ఉన్న ఏడు అడుగులకు పైగా పొడవైన భారీ నాగుపాము ఆలయ ప్రాంగణంలో ప్రత్యక్షమైంది. దీంతో అర్చకులు, ఆలయ సిబ్బంది, భక్తులు ఒక్కసారిగా ఆశ్చర్యపోయారు. ఆలయ ఆవరణలో సంచరిస్తున్న పామును ఎలాంటి హాని కలగకుండా జాగ్రత్తగా పక్కనే ఉన్న గుట్టపై పొదల్లోకి పంపించారు.

శివుడి మహత్యమా.. యాదృచ్ఛికమా?

ఆలయానికి నాగబంధం ఉందని, అందుకే ఇక్కడికి నిత్యం శ్వేతనాగు వస్తుందని భక్తులు విశ్వసిస్తారు. అయితే ఈసారి గోధుమ వర్ణంలో భారీ నాగుపాము కనిపించడంతో పలువురు ఆశ్చర్యం వ్యక్తం చేస్తున్నారు. నాగులచవితి రోజునే ఇలా పాము కనిపించడం శివుడి మహత్యమంటూ కొందరు భక్తులు భావిస్తున్నారు. మరోవైపు పాముల సంచారం సహజసిద్ధమైన పరిణామమే కావచ్చని అభిప్రాయాలు వ్యక్తమవుతున్నాయి. ఏదేమైనా.. భక్తుల ఆధ్యాత్మిక విశ్వాసాలు ఎలా ఉన్నా, పాములను దగ్గరగా వెళ్లి చూడటం, పట్టుకోవడానికి ప్రయత్నించడం ప్రమాదకరం. వాటికి దూరంగా ఉండటమే సురక్షితం.