మీ ఫోన్ మాటిమాటికీ హ్యాంగ్ అవుతుందా.. ఈ సింపుల్ ట్రిక్స్తో మళ్లీ కొత్తదానిలా సూపర్ ఫాస్ట్..
కొత్తగా కొన్నప్పుడు రాకెట్ వేగంతో పనిచేసిన స్మార్ట్ఫోన్.. కొద్దిరోజుల తర్వాత నత్తనడకన నడుస్తుందా? టచ్ చేయగానే హ్యాంగ్ అవుతూ విసుగు తెప్పిస్తుందా? అయితే వెంటనే వేలకు వేలు ఖర్చుపెట్టి కొత్త మొబైల్ కొనాల్సిన అవసరం లేదు. ఇంట్లోనే కూర్చుని పాటించే కొన్ని సులభమైన టిప్స్తో మీ పాత ఫోన్ను మళ్లీ సరికొత్తదానిలా సూపర్ స్పీడ్గా మార్చుకోవచ్చు.
Updated on: Aug 28, 2026 | 1:08 PM
కొత్తగా కొన్నప్పుడు మెరుపు వేగంతో పనిచేసిన స్మార్ట్ఫోన్.. కొన్నాళ్లు వాడేసరికి నెమ్మదించడం, మాటిమాటికీ హ్యాంగ్ అవ్వడం చాలామంది ఎదుర్కొనే సాధారణ సమస్య. పేరుకుపోయిన ఫైళ్లు, భారీ యాప్లు, బ్యాక్గ్రౌండ్ ప్రాసెస్ల వల్ల ప్రాసెసర్పై ఒత్తిడి పెరిగి ఫోన్ స్లో అయిపోతుంది. అయితే వెంటనే కొత్త ఫోన్ కొనాల్సిన అవసరం లేకుండా, కొన్ని సులభమైన టిప్స్ పాటిస్తే పాత ఫోన్ను మళ్లీ మునుపటి వేగంతో పనిచేసేలా చేయవచ్చు. ఫోన్లో డౌన్లోడ్ చేసి నెలల తరబడి తెరవని యాప్లు ఎన్నో ఉంటాయి. ఇవి బ్యాక్గ్రౌండ్లో నిరంతరం రన్ అవుతూ ర్యామ్, బ్యాటరీని ఖాళీ చేస్తాయి. అందుకే ఉపయోగించని యాప్లను గుర్తించి వెంటనే డిలీట్ చేయండి.
ఇంటర్నల్ స్టోరేజ్ను ఖాళీ చేయండి
ఫోన్ మెమరీ 80 శాతానికి పైగా నిండిపోతే ఆపరేటింగ్ సిస్టమ్ వేగం తగ్గుతుంది. అనవసరమైన ఫోటోలు, వీడియోలు, లార్జ్ ఫైళ్లను తొలగించండి. ముఖ్యమైన డేటాను గూగుల్ డ్రైవ్ వంటి క్లౌడ్ స్టోరేజ్కు లేదా ఎస్డీ కార్డుకు బ్యాకప్ చేయండి.
యాప్ కాష్ క్లియర్ చేయండి
యాప్లను నిరంతరం వాడటం వల్ల వాటి తాలూకు తాత్కాలిక ఫైళ్లు భారీగా పేరుకుపోతాయి. సెట్టింగ్స్లోకి వెళ్లి తరచూ వాడే సోషల్ మీడియా, బ్రౌజర్ యాప్ల కాష్ను క్లియర్ చేయడం వల్ల స్టోరేజ్ ఖాళీ అవ్వడమే కాకుండా స్పీడ్ పెరుగుతుంది.
యానిమేషన్లు తగ్గించండి.. లైవ్ వాల్పేపర్లు వద్దే వద్దు
స్క్రీన్పై తిరిగే లైవ్ వాల్పేపర్లు, హెవీ విడ్జెట్లు పాత ప్రాసెసర్పై తీవ్ర భారాన్ని మోపుతాయి. ఫోన్ను సింపుల్ వాల్పేపర్తో ఉంచండి. డెవలపర్ ఆప్షన్స్లో ట్రాన్సిషన్ యానిమేషన్ స్కేల్ తగ్గించడం ద్వారా ఫోన్ రెస్పాన్స్ టైమ్ను వేగవంతం చేయవచ్చు.
సాఫ్ట్వేర్ అప్డేట్లు – రెగ్యులర్ రీస్టార్ట్
ఓఎస్, సిస్టమ్ యాప్లకు వచ్చే తాజా అప్డేట్లను ఎప్పటికప్పుడు ఇన్స్టాల్ చేసుకోండి. కంపెనీలు బగ్లను ఫిక్స్ చేసి పనితీరును మెరుగుపరుస్తాయి. అలాగే వారానికి కనీసం ఒకటి లేదా రెండుసార్లు ఫోన్ను రీస్టార్ట్ చేయడం వల్ల మెమరీ రిఫ్రెష్ అవుతుంది.
ఫ్యాక్టరీ డేటా రీసెట్
పైవన్నీ చేసినా ఫోన్ వేగం పుంజుకోకపోతే.. డేటా మొత్తాన్ని వేరే చోట బ్యాకప్ తీసుకుని ఫ్యాక్టరీ రీసెట్ చేయండి. ఇది వైరస్లు, పాడైపోయిన సిస్టమ్ ఫైళ్లను పూర్తిగా తుడిచిపెట్టి ఫోన్ను కొత్తదానిలా మారుస్తుంది.
బ్యాటరీ హెల్త్ – సర్వీస్ సెంటర్ చెకప్
కొన్నిసార్లు బ్యాటరీ లైఫ్ క్షీణించడం వల్ల కూడా ప్రాసెసర్ సామర్థ్యాన్ని సిస్టమ్ తగ్గిస్తుంది. అప్పుడు బ్యాటరీని కొత్తదానితో రీప్లేస్ చేయించడం లేదా అధీకృత సర్వీస్ సెంటర్లో హార్డ్వేర్ చెక్ చేయించడం ద్వారా ఫోన్ ఆయుష్షును మరింత పెంచుకోవచ్చు.
