Godzilla El Nino: దూసుకొస్తున్న గాడ్జిల్లా ఎల్ నినో.. పసిఫిక్‌లో మార్పులను గుర్తించిన ఇస్రో ఉపగ్రహం!

భూఉపరితలంపై జరిగే పరిణామాలను అంచనా వేసేందుకు ఇస్రో పంపిన EOS-06 (ఓషన్‌శాట్-3) ఉపగ్రహం అద్భుతమైన పనితీరును కనబరుస్తోంది. భూమికి 741 కిలోమీటర్ల ఎత్తులోని కక్ష్యలో ఉన్న ఈ ఉపగ్రహం, పసిఫిక్ మహాసముద్రంలో బలపడుతున్న శక్తివంతమైన గాడ్జిల్లా ఎల్ నినో ప్రారంభ సంకేతాలను గుర్తించింది రికార్డు చేసింది. వాతావరణ మార్పులు, వర్షపాతంలో తేడాలు స్పష్టంగా కనిపించడానికి ముందే సముద్ర జీవావరణంలో, గాలుల్లో వస్తున్న మార్పులను శాటిలైట్ పసిగట్టింది.

WMO అంచనాల ప్రకారం జూన్–ఆగస్టు మధ్య ఎల్ నినో బలపడటానికి 80శాతం అవకాశం ఉందని.. ఇది ఆగస్టు–అక్టోబర్ నాటికి మరింత తీవ్రమై, 2027 ఆరంభం వరకు కొనసాగే ప్రమాదం ఉందని తెలిపింది. అయితే తాజాగా EOS-06 నుండి వచ్చిన పరిశీలనలు కూడా WMO అంచనాలకు అనుగుణంగా ఉన్నాయని శాస్త్రవేత్తలు తెలిపారు. అయితే వీటి ఆదారంగా శాస్త్రవేత్తలు గమనిస్తున్న కీలక సంకేతం ఏమిటంటే సముద్ర ఆహార గొలుసుకు పునాది అయిన ఫైటోప్లాంక్టన్ అనే సూక్ష్మ సముద్ర మొక్కలు లోని క్లోరోఫిల్ పరిమాణం ఉష్ణమండల పసిఫిక్ ప్రాంతంలో బాగా తగ్గిపోయిందని.. 2024, 2025 సాధారణ పరిస్థితులతో పోలిస్తే 2026 జూన్‌లో ఈ తగ్గుదల చాలా ఎక్కువ ఉన్నట్లు హైదరాబాద్‌లోని నేషనల్ రిమోట్ సెన్సింగ్ సెంటర్ NRSC గుర్తించింది.

ఈ పరిశీలనలోని ప్రత్యేకత ఏమిటంటే సముద్ర ఉపరితల ఉష్ణోగ్రత నమోదు కావడానికి కొన్ని వారాలు పడుతుంది. కానీ క్లోరోఫిల్‌లో మాత్రం మార్పులు వెంటనే కనిపిస్తాయి. కాబట్టి, EOS-06 లోని ఓషన్ కలర్ మానిటర్, స్కాటరోమీటర్ లు ఎల్ నినోను ముందే గుర్తించి కీలక హెచ్చరిక జారీ చేస్తుందని తెలిపారు. అంచనా వేసినట్లుగా ఎల్ నినో మరింత తీవ్రమైతే, రాబోయే నెలల్లో పసిఫిక్ అంతటా తక్కువ క్లోరోఫిల్ ఉన్న ప్రాంతం మరింత స్పష్టంగా కనిపించవచ్చని ఇస్రో శాస్త్రవేత్తలు పేర్కొన్నారు.

సాధారణంగా తూర్పు నుంచి పశ్చిమానికి వీచే గాలులు బలహీనపడి, పడమర వైపు నుంచి వీయడం అనేది ఇది ఎల్ నినో లక్షణాల్లో ఒకటి. సాధారణ పరిస్థితుల్లో వాణిజ్య పవనాలు వెచ్చని ఉపరితల జలాలను పసిఫిక్ మీదుగా పశ్చిమం వైపుకు నెట్టివేస్తాయి, దీనివల్ల దక్షిణ అమెరికా సమీపంలో చల్లని, పోషకాలు అధికంగా ఉన్న జలాలు పైకి వస్తాయి. అదే ఎల్ నినో సమయంలో, ఈ పవనాలు బలహీనపడం లేదా వ్యతిరేక దిశలో వీయడం జరుగుతుంది. దీని ఫలితంగా వచ్చే మార్పులు ప్రపంచవ్యాప్తంగా వాతావరణ ప్రసరణ సరళిని మార్చి, అనేక ఖండాలలో వర్షపాతం, కరువు, వరదలు, ఉష్ణోగ్రతలను ప్రభావితం చేస్తాయి.

భారతదేశం మరియు వర్షాకాలంపై ప్రభావం: భారతదేశానికి ఎల్ నినో చాలా ముఖ్యమైనది, ఎందుకంటే చారిత్రాత్మకంగా దీనికి బలహీనమైన నైరుతి రుతుపవన వర్షపాతంతో సంబంధం ఉంది. భారతదేశంలో ప్రతి ఎల్ నినో కరువుకు దారితీయదు.. కానీ బలమైన ఎల్ నినో పరిస్థితులు ఏర్పడినప్పుడు భారతదేశంలో నైరుతి రుతుపవనాలు బలహీనపడటం, వర్షపాతం తగ్గడం, వ్యవసాయంపై ప్రతికూల ప్రభావం పడటం వంటి సమస్యలు తలెత్తుతాయి. ప్రస్తుతం భూమధ్యరేఖ పసిఫిక్‌లో మోస్తరు ఎల్ నినో పరిస్థితులు ఉన్నప్పటికీ, రాబోయే నెలల్లో ఇది మరింత తీవ్రమయ్యే అవకాశం ఉందని భారత వాతావరణ శాఖ పేర్కొంది. మాన్‌సూన్ మిషన్ కపుల్డ్ ఫోర్‌కాస్ట్ సిస్టమ్ (MOMS) అంచనాలు కూడా ఈ సీజన్‌లో ఎల్ నినో పరిస్థితులు మరింత బలపడతాయని సూచిస్తున్నాయి.

అయితే ఈ ఎల్‌నీనో ప్రభావాన్ని కేవలం భారతదేశం మాత్రమే గమనించడం లేదు. ప్రపంచ వాతావరణ సంస్థ కూడా చాలా బలమైన ఎల్ నినో ఆవిర్భవిస్తోందని, అది 2027 ప్రారంభం వరకు కొనసాగవచ్చని హెచ్చరించింది. అదే జరుగుతే EOS-06 ఉపగ్రహం సేకరిస్తున్న సమాచారం ద్వారా రాబోయే వాతావరణ విపత్తులను, తీవ్ర ఎల్ నినో ప్రభావాన్ని ప్రపంచం మరింత వేగంగా అంచనా వేయడానికి వీలవుతోంది.

మరిన్ని సైన్స్ అండ్ టెక్నాలజీ వార్తల కోసం ఇక్కడ క్లిక్ చేయండి.