యాపిల్ లవర్స్‌ ఊహించని మార్పులతో ఐప్యాడ్ మిని8.. అప్‌గ్రేడ్‌ అదుర్స్ అనిపిస్తుందా?
యాపిల్ అభిమానులు ఆసక్తిగా ఎదురుచూస్తున్న Apple iPad Mini 8కు సంబంధించి కొత్త లీక్స్‌ టెక్‌ ప్రపంచంలో చర్చనీయాంశంగా మారాయి. OLED డిస్‌ప్లే, శక్తివంతమైన చిప్‌సెట్‌ వంటి అప్‌గ్రేడ్స్‌ ఇందులో ఉండొచ్చని తెలుస్తోంది. అయితే 120Hz రిఫ్రెష్‌ రేట్‌ విషయంలో మాత్రం నిరాశ ఎదురయ్యే అవకాశం ఉందనే వార్తలు వినిపిస్తున్నాయి.
చిన్న సైజ్‌లో ప్రీమియం టాబ్లెట్‌ అనుభవాన్ని కోరుకునే వారికి Apple iPad Mini 8 ఆసక్తికరమైన ఎంపికగా మారవచ్చు. మెరుగైన డిస్‌ప్లే, వేగవంతమైన ప్రాసెసర్‌, వీడియో కాల్స్‌కు అనుకూలమైన కెమెరా ప్లేస్‌మెంట్‌ వంటి ఫీచర్లు ఇందులో రావచ్చని లీకులు సూచిస్తున్నాయి. అయితే విడుదల తేదీ, ధర, ఇతర స్పెసిఫికేషన్లపై అధికారిక స్పష్టత రావాల్సి ఉంది.
OLED డిస్‌ప్లే..
Apple iPad Mini 8లో డిస్‌ప్లే పరంగా కీలకమైన మార్పు ఉండొచ్చని టెక్‌ వర్గాల్లో ప్రచారం జరుగుతోంది. ప్రస్తుత LCD ప్యానెల్‌ స్థానంలో OLED డిస్‌ప్లేను అందించే అవకాశం ఉందని లీకులు చెబుతున్నాయి. OLED టెక్నాలజీ వల్ల రంగులు మరింత స్పష్టంగా కనిపించడంతో పాటు నలుపు రంగు లోతుగా కనిపిస్తుంది. వీడియోలు చూడటం, ఫొటోలు ఎడిట్‌ చేయడం వంటి పనుల్లో మెరుగైన విజువల్‌ అనుభవం లభించవచ్చు.
అయితే ఇందులో 120Hz ProMotion రిఫ్రెష్‌ రేట్‌ కాకుండా 60Hz LTPS OLED ప్యానెల్‌నే ఉపయోగించే అవకాశం ఉందని సమాచారం. అధిక రిఫ్రెష్‌ రేట్‌ ఉన్న డిస్‌ప్లేలతో పోలిస్తే స్క్రోలింగ్‌, యానిమేషన్లలో అంతటి స్మూత్‌నెస్‌ ఉండకపోవచ్చు. అందుకే OLED అప్‌గ్రేడ్‌పై ఆసక్తి ఉన్నప్పటికీ, 120Hz కోసం ఎదురుచూసేవారికి ఈ విషయం నిరాశ కలిగించవచ్చు.
పవర్‌ఫుల్ చిప్‌సెట్‌..
పనితీరు విషయంలో Apple iPad Mini 8లో కొత్త తరం చిప్‌సెట్‌ అందించే అవకాశం ఉందని ప్రచారం జరుగుతోంది. కొన్ని లీకుల్లో A20 Pro చిప్‌ పేరు వినిపిస్తున్నప్పటికీ, దీనిపై అధికారిక నిర్ధారణ లేదు. కొత్త ప్రాసెసర్‌ అందిస్తే యాప్స్‌ వేగంగా పనిచేయడం, మల్టీటాస్కింగ్‌, గేమింగ్‌ వంటి పనుల్లో మెరుగైన పనితీరు సాధ్యమవుతుంది. Apple Intelligence ఫీచర్లకు సంబంధించిన సామర్థ్యాలు కూడా ఉపయోగించే చిప్‌, సాఫ్ట్‌వేర్‌ సపోర్ట్‌పై ఆధారపడి ఉంటాయి.
ఇక ఫ్రంట్‌ కెమెరాను ల్యాండ్‌స్కేప్‌ ఓరియంటేషన్‌కు అనుకూలంగా అమర్చే అవకాశం ఉందని తెలుస్తోంది. దీనివల్ల టాబ్లెట్‌ను అడ్డంగా పెట్టుకుని వీడియో కాల్స్‌ మాట్లాడేవారికి సౌకర్యంగా ఉంటుంది. మెరుగైన స్పీకర్లు, వాటర్‌ రెసిస్టెన్స్‌ వంటి ఫీచర్లు కూడా వచ్చే అవకాశం ఉందని లీకులు సూచిస్తున్నాయి. అయితే బ్యాటరీ సామర్థ్యం, స్టోరేజ్‌ వేరియంట్లు, ధరపై స్పష్టమైన సమాచారం లేదు. అక్టోబర్ 13 లేదా అక్టోబర్ 27 తేదీల్లో యాపిల్ కొత్త ఉత్పత్తుల ప్రకటనలు చేస్తుందనే ఊహాగానాలు వినిపిస్తున్నాయి.