క్షణాల్లోనే పాస్‌కీలను మరో డివైస్‌కు మార్చేయొచ్చు! గూగుల్‌ తీసుకొచ్చిన కొత్త ఫీచర్‌‌ ఇదే

ఫోన్ మార్చినా, పాస్‌వర్డ్ మేనేజర్ మార్చినా పాస్‌కీలను మళ్లీ ఏర్పాటు చేసుకోవాల్సిన పరిస్థితి చాలామందికి ఇబ్బందిగా ఉండేది. ముఖ్యంగా పలు డివైస్‌లు ఉపయోగించే వారికి ఈ సమస్య మరింత ఎక్కువ. Androidలో Google తీసుకొచ్చిన కొత్త సౌకర్యంతో పాస్‌వర్డ్‌లతో పాటు పాస్‌కీలను కూడా ఒక మేనేజర్ నుంచి మరో మేనేజర్‌కు సురక్షితంగా బదిలీ చేసుకోవచ్చు.

పాస్‌కీల బదిలీ ఇక మరింత సులభం!

Androidలో వచ్చిన కొత్త మార్పుతో పాస్‌వర్డ్ మేనేజర్ మార్చేటప్పుడు పాస్‌కీలను కూడా సురక్షితంగా తరలించవచ్చు. ఉదాహరణకు 1Password నుంచి Bitwardenకు మారాలనుకుంటే పాస్‌కీలను ఒక్కొక్కటిగా తిరిగి సృష్టించాల్సిన అవసరం ఉండదు. ఒకేసారి అవసరమైన సమాచారాన్ని మరో మేనేజర్‌కు బదిలీ చేసుకునే వీలు లభిస్తుంది.

బదిలీ ఎలా చేయాలంటే?

పాస్‌కీలను తరలించాలనుకుంటున్న యాప్‌లోకి వెళ్లి Import or Copy Passwords అనే ఎంపికను ఎంచుకోవాలి. ఆ తర్వాత Android మీ డివైస్‌లో ఉన్న పాస్‌వర్డ్ మేనేజర్లను గుర్తిస్తుంది. అనంతరం సమాచారాన్ని సురక్షితంగా తరలించేందుకు అవసరమైన ప్రక్రియను చూపిస్తుంది. దాన్ని అనుసరించడం ద్వారా పాస్‌వర్డ్‌లతో పాటు పాస్‌కీలను కూడా కొత్త మేనేజర్‌లోకి మార్చుకోవచ్చు.

ప్రస్తుతం 1Password, Bitwarden, Google Password Manager, Dashlane వంటి ప్రముఖ పాస్‌వర్డ్ మేనేజర్లకు ఈ సౌకర్యం అందుబాటులో ఉంది. ఫోన్, ల్యాప్‌టాప్, టాబ్లెట్ వంటి పలు డివైస్‌లు ఉపయోగించే వారికి ఈ మార్పు ఎంతో ఉపయోగకరం. పాస్‌కీలను ఒకే మేనేజర్‌లో భద్రంగా ఉంచుకుని, అవసరమైన డివైస్‌లో సులభంగా ఉపయోగించుకునే అవకాశం లభిస్తుంది.