వైభవ్ మాకొద్దు.. ఇప్పటికే ఇద్దరు ఓపెనర్లు ఉన్నారుగా.. శ్రేయస్ అయ్యర్ కీలక వ్యాఖ్యలు
Vaibhav Suryavanshi: భారత టీ20 జట్టులో చోటు దక్కించుకున్నా.. 15 ఏళ్ల వైభవ్ సూర్యవంశీకి ఇప్పటివరకు తుది జట్టులో ఆడే అవకాశం రాలేదు. వెస్టిండీస్‌తో సిరీస్‌లోనూ బెంచ్‌కే పరిమితమైన ఈ యువ సంచలనం గురించి కెప్టెన్ శ్రేయస్ అయ్యర్ కీలక వ్యాఖ్యలు చేశాడు. జట్టులో ఇప్పటికే ఇద్దరు ఓపెనర్లు ఉండటంతో వైభవ్ తన అవకాశం కోసం ఓపికగా ఎదురుచూడాల్సిందేనని స్పష్టం చేశాడు.
Vaibhav Suryavanshi: భారత జట్టులో చోటు దక్కించుకున్నప్పటికీ తుది జట్టులో ఆడే అవకాశం రావడం అంత సులభం కాదు. ప్రస్తుతం 15 ఏళ్ల వైభవ్ సూర్యవంశీ (Vaibhav Suryavanshi) ఇదే పరిస్థితిని ఎదుర్కొంటున్నాడు. తన దూకుడైన బ్యాటింగ్‌తో ప్రత్యేక గుర్తింపు తెచ్చుకున్న వైభవ్‌కు వెస్టిండీస్‌తో జరిగిన పూర్తి టీ20 సిరీస్‌లో ఒక్క మ్యాచ్‌లోనూ ఆడే అవకాశం రాలేదు. దీంతో అతడిని టీమ్ మేనేజ్‌మెంట్ ఎందుకు ఆడించడం లేదనే చర్చ మొదలైంది. తాజాగా కెప్టెన్ శ్రేయస్ అయ్యర్ (Shreyas Iyer) దీనిపై స్పందిస్తూ.. వైభవ్‌తో తనకు జరిగిన సంభాషణ గురించి వివరించాడు.
శ్రేయస్ అయ్యర్ మాట్లాడుతూ.. వైభవ్‌కు తప్పకుండా అవకాశం వస్తుందని తాను తరచూ చెబుతున్నట్లు వెల్లడించాడు. అయితే అందుకోసం ఓపికగా ఎదురుచూడాల్సిన అవసరం ఉందని యువ బ్యాటర్‌కు సూచించినట్లు తెలిపాడు. వైభవ్ తన ఆటతో పాటు ప్రిపరేషన్ విధానంపైనా నిరంతరం దృష్టి పెట్టాలని అయ్యర్ పేర్కొన్నాడు.
భారత జట్టులో ఇప్పటికే ఇద్దరు అద్భుతమైన ఓపెనర్లు ఉన్నారని శ్రేయస్ స్పష్టం చేశాడు. అందుకే ప్రస్తుతం సంజూ శాంసన్ (Sanju Samson), అభిషేక్ శర్మ (Abhishek Sharma) ఇన్నింగ్స్‌ను ప్రారంభించే బాధ్యతను నిర్వర్తిస్తున్నారని చెప్పాడు.
ఇదే విషయాన్ని చెప్పిన గౌతమ్ గంభీర్..
వైభవ్ సూర్యవంశీ విషయంలో టీమిండియా హెడ్ కోచ్ గౌతమ్ గంభీర్ (Gautam Gambhir) కూడా గతంలో ఇదే అభిప్రాయాన్ని వ్యక్తం చేశాడు. జట్టులో చోటు సంపాదించాలంటే ఆటగాడు తన అవకాశం కోసం వేచి ఉండాల్సిందేనని చెప్పాడు.
వైభవ్‌లో ఉన్న ప్రతిభను గంభీర్ గుర్తిస్తున్నప్పటికీ.. ఇప్పటికే జట్టులో మంచి ప్రదర్శన చేస్తున్న ఆటగాళ్లకు కూడా ప్రాధాన్యత ఇవ్వాల్సి ఉంటుందని పేర్కొన్నాడు. వైభవ్‌కు అవకాశం వచ్చినప్పుడు అతడికి తగినంత సమయం ఇస్తామని కూడా భరోసా ఇచ్చాడు.
ఆసియా క్రీడల్లో వైభవ్ 53 పరుగులు..
ఆసియా క్రీడల్లో భారత జట్టు తరఫున వైభవ్ సూర్యవంశీకి ఆడే అవకాశం లభించింది. రెండు మ్యాచ్‌ల్లో కలిపి అతడు 53 పరుగులు చేశాడు. ఈ సమయంలో అతడి స్ట్రైక్ రేట్ 176.66గా ఉంది. అయితే వెస్టిండీస్‌తో జరిగిన టీ20 సిరీస్‌లో మాత్రం వైభవ్‌కు తుది జట్టులో చోటు దక్కలేదు.
2-2తో ముగిసిన టీ20 సిరీస్..
భారత్, వెస్టిండీస్ మధ్య జరిగిన ఐదు మ్యాచ్‌ల టీ20 సిరీస్ 2-2తో సమమైంది. బెంగళూరులో జరగాల్సిన ఐదో టీ20 వర్షం కారణంగా రద్దయింది.
రెండో, నాలుగో టీ20ల్లో భారత బౌలింగ్ మరింత మెరుగ్గా ఉండి ఉంటే ఫలితం మరోలా ఉండేదని శ్రేయస్ అయ్యర్ అభిప్రాయపడ్డాడు.
ఇప్పుడు భారత జట్టు తదుపరి టీ20 సిరీస్‌లో న్యూజిలాండ్‌తో తలపడనుంది. అక్టోబర్ 22న ఈ సిరీస్ ప్రారంభం కానుంది. ఈ నేపథ్యంలో వైభవ్ సూర్యవంశీకి తదుపరి మ్యాచ్‌ల్లో అవకాశం లభిస్తుందా లేదా అనేది ఆసక్తికరంగా మారింది.