Test Cricket Records: టెస్టుల్లో అత్యధిక మెయిడెన్ ఓవర్లు వేసిన టాప్-4 బౌలర్లు వీరే.. నంబర్-1లో స్పిన్ దిగ్గజం
Test Cricket Records: టెస్టు క్రికెట్లో అత్యధిక మెయిడెన్ ఓవర్లు వేసిన బౌలర్ల జాబితాలో ముత్తయ్య మురళీధరన్ అగ్రస్థానంలో ఉన్నాడు. షేన్ వార్న్, జేమ్స్ ఆండర్సన్, అనిల్ కుంబ్లే తర్వాతి స్థానాల్లో నిలిచారు. ఈ దిగ్గజాల మెయిడెన్ ఓవర్ల రికార్డులు, ప్రత్యేకతలు తెలుసుకుందాం.
Test Cricket Records: టెస్ట్ క్రికెట్లో ఒక బౌలర్ వికెట్లు తీయడం ఎంత ముఖ్యమో, ప్రత్యర్థి బ్యాటర్ పై ఒత్తిడి పెంచడం కూడా అంతే కీలకం. బౌలర్ ఒక పరుగు కూడా ఇవ్వకుండా ఓవర్ పూర్తి చేసినప్పుడు బ్యాటర్ పై ఒత్తిడి పెరిగి, తప్పుడు షాట్ ఆడి వికెట్ పారేసుకునే అవకాశం పెరుగుతుంది. టెస్ట్ క్రికెట్ సుదీర్ఘ చరిత్రలో స్పెల్ బౌలింగ్ చేస్తూ వేలాది ఓవర్లు విసిరిన దిగ్గజాలు ఉన్నారు. అయితే వాటన్నింటిలో అత్యధిక మెయిడెన్ ఓవర్లు విసిరిన అరుదైన రికార్డు శ్రీలంక స్పిన్ దిగ్గజం ముత్తయ్య మురళీధరన్ పేరిట ఉంది.
1. ముత్తయ్య మురళీధరన్ – 1,794 మెయిడెన్లు
శ్రీలంక మాజీ ఆఫ్ స్పిన్నర్ ముత్తయ్య మురళీధరన్ ఈ జాబితాలో తిరుగులేని నంబర్-1 స్థానంలో ఉన్నాడు. తన అద్భుతమైన టెస్ట్ కెరీర్లో మురళీధరన్ ఏకంగా 1,794 మెయిడెన్ ఓవర్లు విసిరి చరిత్ర సృష్టించాడు. తన మాయాజాలపు స్పిన్ బౌలింగ్తో ప్రపంచ స్థాయి బ్యాటర్లను సైతం పరుగులు చేయకుండా ముప్పుతిప్పలు పెట్టేవాడు. సుదీర్ఘ సమయం పాటు ఒకే వికెట్పై ఏకాగ్రతతో బౌలింగ్ చేయగల సత్తా ఆయనను టెస్ట్ క్రికెట్లో అత్యుత్తమ బౌలర్గా నిలబెట్టింది.
2. షేన్ వార్న్ – 1,761 మెయిడెన్లు
ఆస్ట్రేలియా లెజెండరీ లెగ్ స్పిన్నర్ షేన్ వార్న్ ఈ జాబితాలో రెండో స్థానంలో నిలిచాడు. షేన్ వార్న్ తన సుదీర్ఘ టెస్ట్ కెరీర్లో మొత్తం 1,761 మెయిడెన్ ఓవర్లు వేశాడు. బంతిని భారీగా టర్న్ చేస్తూ బ్యాటర్లకు ఏమాత్రం ఊపిరాడనివ్వకుండా చేయడం వార్న్ ప్రత్యేకత. మురళీధరన్, వార్న్ మధ్య మెయిడెన్ ఓవర్ల తేడా కూడా చాలా స్వల్పంగానే ఉండటం గమనార్హం.
3. జేమ్స్ ఆండర్సన్ – 1,730 మెయిడెన్లు
ఇంగ్లాండ్కు చెందిన దిగ్గజ ఫాస్ట్ బౌలర్ జేమ్స్ ఆండర్సన్ ఈ జాబితాలో మూడో స్థానంలో ఉన్నాడు. పేస్ బౌలర్లకు సుదీర్ఘంగా బౌలింగ్ చేయడం కష్టమైనప్పటికీ, ఆండర్సన్ సుదీర్ఘ కాలం పాటు ఫిట్నెస్ కాపాడుకుంటూ 1,730 మెయిడెన్ ఓవర్లు విసిరాడు. ఇంగ్లాండ్ తరఫున రెడ్ బాల్ క్రికెట్లో అత్యంత విజయవంతమైన బౌలర్గా నిలిచిన ఆయన, బంతిని ఇరువైపులా స్వింగ్ చేస్తూ బ్యాటర్లను పరుగులు చేయకుండా కట్టిపడేసేవాడు.
4. అనిల్ కుంబ్లే – 1,576 మెయిడెన్లు
భారత లెజెండరీ లెగ్ స్పిన్నర్ అనిల్ కుంబ్లే ఈ జాబితాలో నాలుగో స్థానంలో నిలిచాడు. ఇండియా తరఫున అత్యధికంగా 1,576 మెయిడెన్ ఓవర్లు వేసిన రికార్డు కుంబ్లే సొంతం. కచ్చితత్వంతో కూడిన లైన్ అండ్ లెంగ్త్తో నిరంతరం బ్యాటర్లపై ఒత్తిడి తీసుకురావడంలో కుంబ్లే దిట్ట. టెస్ట్ క్రికెట్లో భారత్ సాధించిన అనేక చారిత్రాత్మక విజయాల్లో ఆయన బౌలింగ్ దాడి కీలక పాత్ర పోషించింది.
మరిన్ని క్రీడా వార్తల కోసం ఇక్కడ క్లిక్ చేయండి..