Team India: రోహిత్, కోహ్లీకి టెన్నిస్ దిగ్గజం నాదల్ తరహా వీడ్కోలు ఇవ్వాల్సిందే: టీమిండియా మాజీ క్రికెటర్

Virat Kohli Rohit Sharma

Rohit Sharma – Virat Kohli Deserve Rafael Nadal Like Farewell: భారత క్రికెట్ చరిత్రలో అత్యంత ప్రభావవంతమైన ఆటగాళ్లుగా నిలిచిన రోహిత్ శర్మ (Rohit Sharma), విరాట్ కోహ్లీ (Virat Kohli)ల అంతర్జాతీయ క్రికెట్ ప్రయాణం ముగింపుపై ఇప్పుడు పెద్ద చర్చ నడుస్తోంది. టీ20, టెస్ట్ ఫార్మాట్‌లకు వీడ్కోలు పలికి, ప్రస్తుతం వన్డేలకు మాత్రమే పరిమితమైన ఈ దిగ్గజాలకు ఘనమైన వీడ్కోలు పలకాలని భారత క్రికెట్ అభిమానులు, మాజీ ఆటగాళ్లు కోరుకుంటున్నారు.

ఈ నేపథ్యంలో, 1983 ప్రపంచకప్ విజేత, మాజీ ఆల్‌రౌండర్ మదన్ లాల్ (Madan Lal) కీలక వ్యాఖ్యలు చేశారు. టెన్నిస్ దిగ్గజం రఫెల్ నాదల్ (Rafael Nadal) రిటైర్మెంట్ సందర్భంగా ప్రపంచం చూసిన ఉద్వేగభరితమైన వీడ్కోలు (Farewell) తరహాలో రోహిత్, కోహ్లీలకు కూడా ఇవ్వాలని ఆయన బీసీసీఐకి సూచించారు.

“అందరి కంట కన్నీరు తెచ్చే వీడ్కోలు”..

‘క్రికెట్ ప్రిడిక్ట్ టీవీ షో’లో మాట్లాడిన మదన్ లాల్, రోహిత్, కోహ్లీ భారత క్రికెట్‌కు అందించిన సేవలను కొనియాడారు. వారిద్దరూ క్రికెట్ ప్రపంచంలో ‘ఒక తరంలో ఒక్కసారి మాత్రమే వచ్చే అద్భుతమైన ప్రతిభ’ అని అభివర్ణించారు.

“రోహిత్, విరాట్‌లో ఇంకా చాలా క్రికెట్ మిగిలి ఉంది. వారికి అందరి కంట కన్నీరు తెచ్చే వీడ్కోలు దక్కాలి. రఫెల్ నాదల్ టెన్నిస్‌కు వీడ్కోలు పలికినప్పుడు ప్రపంచం చూసిన అద్భుతమైన ఫేర్‌వెల్ లాంటిది వీరికి భారత్ ఇవ్వాలి. ఇలాంటి ఆటగాళ్లను తప్పకుండా గౌరవించాలి” అని మదన్ లాల్ నొక్కి చెప్పారు.

2025లో ఫ్రెంచ్ ఓపెన్ (French Open) టోర్నమెంట్‌ సందర్భంగా రఫెల్ నాదల్‌‌కు అద్భుతమైన వీడ్కోలు లభించింది. టెన్నిస్ దిగ్గజాలైన ఫెదరర్, జొకోవిచ్, ముర్రే అతడి వీడ్కోలుకు హాజరయ్యారు. 15,000 మంది అభిమానులు ‘మెర్సీ రాఫా’ (Merci Rafa) టీ-షర్టులు ధరించి అతడిని సన్మానించారు. ఇలాంటి అత్యున్నత గౌరవాన్ని భారత క్రికెట్ కూడా రోహిత్-కోహ్లీలకు అందించాలని మదన్ లాల్ ఆకాంక్షించారు.

రిటైర్మెంట్ నిర్ణయంపై విస్మయం..

రోహిత్ శర్మ, విరాట్ కోహ్లీ ఇటీవల టీ20, టెస్ట్ ఫార్మాట్‌ల నుంచి అనూహ్యంగా రిటైర్మెంట్ ప్రకటించడంపై మదన్ లాల్ ఆశ్చర్యం వ్యక్తం చేశారు. “రిటైర్మెంట్ అనేది వారి వ్యక్తిగత నిర్ణయం అయినప్పటికీ, కోహ్లీ టెస్ట్ క్రికెట్‌కు రిటైర్మెంట్ ప్రకటించడం నన్ను ఆశ్చర్యానికి గురి చేసింది” అని మదన్ లాల్ అన్నారు. మాజీ స్పిన్ దిగ్గజం అనిల్ కుంబ్లే, యువ స్పిన్నర్ రవి బిష్ణోయ్ కూడా వీరిద్దరికీ టెస్టులు/టీ20ల్లో ఘనంగా వీడ్కోలు దక్కకపోవడం పట్ల విచారం వ్యక్తం చేసిన సంగతి తెలిసిందే.

వన్డేల్లో కొనసాగుతున్న ప్రయాణం..

రోహిత్ శర్మ, విరాట్ కోహ్లీ ప్రస్తుతం కేవలం వన్డే ఫార్మాట్‌లో మాత్రమే కొనసాగుతున్నారు. అక్టోబర్ 19 నుంచి ఆస్ట్రేలియాతో జరగబోయే వన్డే సిరీస్‌కు ఈ దిగ్గజాలు సిద్ధమవుతున్నారు. ఈ సిరీస్ 2027 వన్డే ప్రపంచకప్ సన్నాహాల్లో కీలకమైనదిగా భావిస్తున్నారు.

మరోవైపు, బీసీసీఐ ఉపాధ్యక్షుడు రాజీవ్ శుక్లా మాట్లాడుతూ, రోహిత్, కోహ్లీలు ఇంకా వన్డేలు ఆడుతున్నందున, వారి రిటైర్మెంట్ గురించి ఇప్పుడే ఆలోచించాల్సిన అవసరం లేదని, రిటైర్మెంట్ నిర్ణయం పూర్తిగా ఆటగాళ్లదేనని స్పష్టం చేశారు.