WCL 2025 : 41ఏళ్ల వయసులోనూ సూపర్ మ్యాన్ మాదిరి ఫీల్డింగ్.. ఏంటిది డివిలియర్స్ మామ.. అదరగొట్టావ్
వరల్డ్ ఛాంపియన్‌షిప్ ఆఫ్ లెజెండ్స్ 2025 లో సౌతాఫ్రికా దిగ్గజం ఏబీ డివిలియర్స్ ఒక అద్భుతమైన రిలే క్యాచ్‌ను అందుకుని యూసుఫ్ పఠాన్‌ను అవుట్ చేశాడు. 41 ఏళ్ల వయసులోనూ అతని ఫీల్డింగ్ విన్యాసం, అలాగే 63 పరుగుల బ్యాటింగ్ హైలైట్‌గా నిలిచాయి.
WCL 2025 : సౌతాఫ్రికా దిగ్గజం ఏబీ డివిలియర్స్ వరల్డ్ ఛాంపియన్‌షిప్ ఆఫ్ లెజెండ్స్ 2025లో అద్భుతం చేశాడు. నార్తాంప్టన్‌లోని కౌంటీ గ్రౌండ్‌లో భారత్‌తో జరిగిన మ్యాచ్‌లో అతను సాధ్యం కాని రిలే క్యాచ్‌ను సాధ్యం చేసి చూపించాడు. మాజీ సౌతాఫ్రికా కెప్టెన్ బౌండరీ రోప్‌ను తాకకుండా నేర్పుగా స్లైడ్ చేసి, బంతిని దగ్గర్లో ఉన్న సారెల్ ఎర్వీ వైపు విసిరాడు. ఎర్వీ ఆ క్యాచ్‌ను సులభంగానే అందుకున్నాడు.
ఈ సంఘటన ఇన్నింగ్స్ తొమ్మిదో ఓవర్‌లో జరిగింది. లెగ్ స్పిన్నర్ ఇమ్రాన్ తాహిర్ బౌలింగ్ వేస్తుండగా, యూసుఫ్ పఠాన్ వైడ్ లాంగ్-ఆన్ మీదుగా భారీ షాట్ కొట్టాడు. డివిలియర్స్ క్యాచ్ అందుకున్నప్పటికీ, తన వేగం బౌండరీ రోప్ దాటుతుందని గ్రహించాడు. అందుకే, అతను బంతిని దగ్గర్లో ఉన్న ఫీల్డర్ వైపు విసిరాడు. ఎర్వీ ఆ క్యాచ్‌ను అందుకోవడంతో తాహిర్‌కు వికెట్ లభించింది. ఈ అద్భుతమైన ఫీల్డింగ్ ప్రయత్నం వీడియో సోషల్ మీడియాలో వైరల్ అవుతోంది.
ఈ మ్యాచ్‌లో అంతకుముందు, 41 ఏళ్ల ఏబీ డివిలియర్స్ సౌతాఫ్రికా ఛాంపియన్స్ తరపున టాప్ స్కోరర్‌గా నిలిచాడు. అతను 30 బంతుల్లో 3 ఫోర్లు, 4 సిక్సర్లతో 63 పరుగులు చేశాడు. ఓపెనర్లుగా వచ్చిన హాషిమ్ ఆమ్లా, జాక్వెస్ రూడోల్ఫ్ తమ జట్టుకు మంచి ఆరంభాన్ని ఇచ్చారు. 35 పరుగుల భాగస్వామ్యాన్ని నెలకొల్పారు. ఆమ్లా వేగంగా 24 పరుగులు చేయగా, రూడోల్ఫ్ 22 పరుగులు చేశాడు.
అయితే, డివిలియర్స్ ఇన్నింగ్సే ప్రోటీస్‌కు అసలు ఊపునిచ్చింది. జేపీ డుమిని(16), వేన్ పార్నెల్(11), జేజే స్మట్స్(30) కూడా కీలకమైన చిన్న చిన్న భాగస్వామ్యాలు ఆడారు. దీంతో సౌతాఫ్రికా ఛాంపియన్స్ 20 ఓవర్లలో 6 వికెట్లకు 208 పరుగులు సాధించింది. భారత్ తరపున యూసుఫ్ పఠాన్, పీయూష్ చావ్లా చెరో రెండు వికెట్లు తీశారు.
మరిన్ని క్రికెట్ వార్తల కోసం ఇక్కడ క్లిక్ చేయండి..