R Ashwin: కోహ్లీ, రూట్ కాదు.. అశ్విన్ ఫేవరెట్ ఐదుగురు బ్యాటర్లు వీళ్లే
R Ashwin: టీమిండియా మాజీ స్పిన్నర్ రవిచంద్రన్ అశ్విన్ ప్రస్తుత క్రికెట్‌లో తన ఫేవరెట్ ఐదుగురు బ్యాటర్ల పేర్లు వెల్లడించాడు. శుభ్‌మన్ గిల్, హ్యారీ బ్రూక్, ట్రావిస్ హెడ్, షాయ్ హోప్, టెంబా బవుమాకు చోటిచ్చాడు. ఈ ఐదుగురిలో నలుగురు కెప్టెన్లు కావడం విశేషం. విరాట్ కోహ్లీ, జో రూట్‌ను ఈ జాబితాలో పరిగణనలోకి తీసుకోలేదు.
R Ashwin: టీమిండియా మాజీ స్టార్ స్పిన్నర్ రవిచంద్రన్ అశ్విన్ ప్రస్తుత క్రికెట్‌లో తనకు నచ్చిన ఐదుగురు బ్యాటర్ల పేర్లు వెల్లడించాడు. ఈ జాబితాలో భారత్, ఆస్ట్రేలియా, ఇంగ్లండ్, వెస్టిండీస్, సౌతాఫ్రికా జట్లకు చెందిన ఆటగాళ్లకు చోటు దక్కింది. అయితే ఈ ఐదుగురిలో ఒకరు మినహా మిగిలిన నలుగురూ తమ జట్లకు కెప్టెన్లుగా వ్యవహరిస్తున్నారు. ఆసక్తికరమైన విషయం ఏమిటంటే.. విరాట్ కోహ్లీ, జో రూట్ పేర్లను పరిగణనలోకి తీసుకోవడం లేదని ముందే చెప్పిన అశ్విన్, ఆ తర్వాత తన ఫేవరెట్ ఐదుగురిని ఎంపిక చేశాడు.
అశ్విన్ ఫేవరెట్ ఐదుగురు బ్యాటర్లు వీళ్లే
సోనీ స్పోర్ట్స్ కార్యక్రమంలో మాట్లాడిన అశ్విన్ తన ఫ్యాబ్-5 జాబితాను ప్రకటించాడు. ఇందులో టీమిండియా కెప్టెన్ శుభ్‌మన్ గిల్, ఇంగ్లండ్ ఆటగాడు హ్యారీ బ్రూక్, ఆస్ట్రేలియా బ్యాటర్ ట్రావిస్ హెడ్, వెస్టిండీస్ కెప్టెన్ షాయ్ హోప్, సౌతాఫ్రికా కెప్టెన్ టెంబా బవుమా ఉన్నారు. వీరిలో ట్రావిస్ హెడ్ మినహా మిగిలిన నలుగురూ తమ జాతీయ జట్లకు కెప్టెన్లుగా ఉన్నారు. ప్రస్తుత క్రికెట్‌లో వీరు చూపిస్తున్న ప్రదర్శన, ఆటతీరును దృష్టిలో పెట్టుకుని అశ్విన్ ఈ ఎంపిక చేసినట్లు తెలుస్తోంది.
కోహ్లీ, రూట్ పేర్లను పక్కన పెట్టిన అశ్విన్
తన ఎంపిక గురించి చెబుతూ.. ఈ జాబితాలో విరాట్ కోహ్లీ, జో రూట్‌ను చేర్చడం లేదని అశ్విన్ స్పష్టం చేశాడు. ఆ తర్వాత మొదట శుభ్‌మన్ గిల్ పేరును చెప్పాడు. అనంతరం హ్యారీ బ్రూక్, ట్రావిస్ హెడ్‌లను ఎంపిక చేశాడు. నాలుగో స్థానంలో షాయ్ హోప్‌కు చోటిచ్చాడు. అతడు ప్రస్తుతం మంచి ఫామ్‌లో ఉన్నాడని, టీ20లతో పాటు ఇతర ఫార్మాట్లలోనూ రాణిస్తున్నాడని అశ్విన్ ప్రశంసించాడు. చివరగా టెంబా బవుమాను ఎంపిక చేయడం తన జాబితాలో ప్రత్యేకమైన నిర్ణయమని చెప్పాడు.
బవుమాపై అశ్విన్ ప్రత్యేక ప్రశంసలు
టెంబా బవుమా ఎంపిక గురించి అశ్విన్ మాట్లాడుతూ.. టెస్టుల్లో అతడు అద్భుతంగా ఆడుతున్నాడని, కెప్టెన్‌గా కూడా మంచి ఫలితాలు సాధిస్తున్నాడని పేర్కొన్నాడు. ఐసీసీ వరల్డ్ టెస్ట్ ఛాంపియన్‌షిప్ టైటిల్‌ను సౌతాఫ్రికా గెలుచుకోవడంలో అతడి కెప్టెన్సీ కీలకమని ప్రశంసించాడు. ఇటీవల వన్డేల్లోనూ సెంచరీ సాధించాడని గుర్తుచేశాడు. 2027 వన్డే ప్రపంచకప్‌లో బవుమా నాయకత్వంలో దక్షిణాఫ్రికా ఎలా ఆడుతుందో చూడాలని ఆసక్తిగా ఎదురుచూస్తున్నట్లు తెలిపాడు. దీంతో అశ్విన్ జాబితాలో బవుమాకు ఎందుకు చోటిచ్చాడో స్పష్టమైంది.
ర్యాంకింగ్స్‌లోనూ గిల్, బ్రూక్ టాప్‌లోనే
అశ్విన్ ఎంపిక చేసిన ఆటగాళ్లలో శుభ్‌మన్ గిల్, హ్యారీ బ్రూక్ ప్రస్తుతం ఐసీసీ ర్యాంకింగ్స్‌లో అగ్రస్థానాల్లో ఉన్నారు. వన్డే బ్యాటర్ల ర్యాంకింగ్స్‌లో గిల్ 841 రేటింగ్ పాయింట్లతో నంబర్ వన్‌గా కొనసాగుతున్నాడు. అతడు ఇప్పటివరకు 43 టెస్టులు, 72 వన్డేలు, 36 టీ20 అంతర్జాతీయ మ్యాచ్‌లు ఆడాడు. మరోవైపు బ్రూక్ 861 పాయింట్లతో టెస్ట్ బ్యాటర్ల ర్యాంకింగ్స్‌లో అగ్రస్థానంలో ఉన్నాడు. ట్రావిస్ హెడ్ 799 పాయింట్లతో మూడో స్థానంలో, టెంబా బవుమా 793 పాయింట్లతో నాలుగో స్థానంలో ఉన్నారు. షాయ్ హోప్ 710 పాయింట్లతో వన్డే ర్యాంకింగ్స్‌లో ఏడో స్థానంలో కొనసాగుతున్నాడు. ఇలా ఐదుగురూ తమదైన శైలిలో అంతర్జాతీయ క్రికెట్‌లో సత్తా చాటుతున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..