IND U19 vs PAK U19: భారత్‌కు మరోసారి షాక్.. ఉత్కంఠ పోరులో పాకిస్థాన్ ఘన విజయం
IND U19 vs PAK U19: అండర్-19 ఆసియా కప్‌లో భారత్‌పై పాకిస్థాన్ విజయం సాధించింది. తొలుత బ్యాటింగ్ చేసిన టీమిండియా 208 పరుగులకు ఆలౌటైంది. అర్జున్ రాజ్‌పుత్ 107 పరుగులతో సెంచరీ చేసినా జట్టును గెలిపించలేకపోయాడు. 61 పరుగులకే ఐదు వికెట్లు కోల్పోయిన పాకిస్థాన్‌ను హంజా జహూర్, హస్నైన్ అబ్బాస్ ఆదుకున్నారు.
IND U19 vs PAK U19: అండర్-19 ఆసియా కప్‌లో పాకిస్థాన్‌తో జరిగిన ఉత్కంఠ పోరులో భారత యువ జట్టుకు ఓటమి తప్పలేదు. 209 పరుగుల లక్ష్యంతో బరిలోకి దిగిన పాకిస్థాన్ ఒక దశలో 61 పరుగులకే ఐదు వికెట్లు కోల్పోయి కష్టాల్లో పడింది. అయినా హంజా జహూర్ అద్భుతంగా పోరాడాడు. చివరి వరకు క్రీజులో నిలిచి సెంచరీ పూర్తి చేయడంతో పాటు పాకిస్థాన్‌కు విజయాన్ని అందించాడు. భారత్ చేతుల్లోకి వచ్చిన మ్యాచ్‌ను హంజా తన బ్యాటింగ్‌తో లాగేసుకున్నాడు.
61 పరుగులకే ఐదు వికెట్లు
ఒమన్‌లోని అల్ అమరత్ క్రికెట్ గ్రౌండ్‌లో జరిగిన ఈ మ్యాచ్‌లో టాస్ గెలిచిన భారత్ తొలుత బ్యాటింగ్ చేసింది. అర్జున్ రాజ్‌పుత్ (107) సెంచరీతో రాణించడంతో టీమిండియా 46.3 ఓవర్లలో 208 పరుగులు చేసింది. 209 పరుగుల లక్ష్యంతో బరిలోకి దిగిన పాకిస్థాన్‌కు భారత బౌలర్లు ఆరంభంలోనే షాకిచ్చారు. జహంగీర్ బిలాల్, ఉస్మాన్ ఖాన్, అబ్దుల్ ఖాదిర్, అహ్మద్ హుస్సేన్, కెప్టెన్ ఫర్హాన్ యూసఫ్ తక్కువ పరుగులకే ఔటయ్యారు. దీంతో 61 పరుగులకే ఐదు వికెట్లు కోల్పోయిన పాక్ ఓటమి అంచుకు చేరింది.
హంజా, అబ్బాస్ అద్భుత భాగస్వామ్యం
ఈ దశలో హంజా జహూర్, హస్నైన్ అబ్బాస్ డార్ భారత బౌలర్లను సమర్థంగా ఎదుర్కొన్నారు. ఇద్దరూ ఆచితూచి ఆడుతూ పరుగులు సాధించారు. ఆరో వికెట్‌కు ఏకంగా 107 పరుగులు జోడించి పాకిస్థాన్‌ను తిరిగి పోటీలోకి తీసుకొచ్చారు. అబ్బాస్ 67 బంతుల్లో 38 పరుగులు చేసి మనాల్ చౌహాన్ బౌలింగ్‌లో ఔటయ్యాడు. అయితే అప్పటికే హంజా క్రీజులో పాతుకుపోయాడు. మరోవైపు వికెట్లు పడుతున్నా ఒత్తిడికి లోనుకాకుండా జట్టును విజయానికి దగ్గరగా తీసుకెళ్లాడు.
ఏడో వికెట్‌తో ఆశలు రేపిన అన్వయ్ ద్రవిడ్
పాకిస్థాన్ విజయానికి చేరువవుతున్న సమయంలో భారత జట్టుకు ఏడో వికెట్ దక్కింది. మహమ్మద్ సయ్యమ్‌ను ఔట్ చేయడంలో వికెట్ కీపర్ అన్వయ్ ద్రవిడ్ కీలక పాత్ర పోషించాడు. మోహిత్ ఉల్వా వేసిన 42.5వ ఓవర్‌లో సయ్యమ్ బ్యాట్ ఎడ్జ్ తీసుకున్న బంతిని అన్వయ్ అద్భుతంగా ఒంటి చేత్తో అందుకున్నాడు. దీంతో పాకిస్థాన్ 183 పరుగుల వద్ద ఏడో వికెట్ కోల్పోయింది. ఆ సమయంలో భారత్‌కు మళ్లీ గెలుపుపై ఆశలు చిగురించాయి. కానీ మరో ఎండ్‌లో ఉన్న హంజాను మాత్రం భారత బౌలర్లు ఆపలేకపోయారు.
సెంచరీతో మ్యాచ్ ముగించిన హంజా
చివరి ఓవర్లలో పాకిస్థాన్ విజయానికి పరుగుల దూరం తగ్గుతూ వచ్చింది. హంజా జహూర్ వరుసగా బౌండరీలు బాదుతూ లక్ష్యాన్ని మరింత చేరువ చేశాడు. చివరికి భారత్ విజయానికి కాపాడాల్సిన నాలుగు పరుగులు మాత్రమే మిగిలి ఉన్న సమయంలో కవర్ దిశగా బంతిని బౌండరీకి తరలించాడు. దీంతో పాకిస్థాన్ విజయం ఖరారైంది. ఇదే సమయంలో హంజా తన సెంచరీని కూడా పూర్తి చేసుకున్నాడు. అతడు 107 బంతుల్లో అజేయంగా 100 పరుగులు సాధించాడు. ఐదు వికెట్లు కోల్పోయిన స్థితి నుంచి జట్టును గెలిపించిన హంజా పాకిస్థాన్ విజయంలో హీరోగా నిలిచాడు. అర్జున్ రాజ్‌పుత్ సెంచరీ చేసినా భారత జట్టుకు మాత్రం ఓటమి తప్పలేదు.