
MS Dhoni IPL 2008 Auction: భారత క్రికెట్లో అత్యంత విజయవంతమైన కెప్టెన్లలో ఒకరిగా గుర్తింపు పొందిన మహేంద్ర సింగ్ ధోనీ (MS Dhoni) ఐపీఎల్ ప్రస్థానం ఎంతో ఆసక్తికరంగా మొదలైంది. 2008లో ఇండియన్ ప్రీమియర్ లీగ్ (IPL) తొలి వేలం నిర్వహించినప్పుడు ధోనీ కోసం పలు ఫ్రాంచైజీలు ఆసక్తి చూపించాయి. అప్పట్లో అతడి కనీస ధర 4 లక్షల అమెరికన్ డాలర్లు. అయితే వేలం చివరి దశకు వచ్చేసరికి చెన్నై సూపర్ కింగ్స్ (Chennai Super Kings), ముంబై ఇండియన్స్ (Mumbai Indians) మధ్య తీవ్ర పోటీ నెలకొంది.
2008 తొలి ఐపీఎల్ వేలం గురించి ESPNcricinfo ప్రచురించిన నివేదిక ప్రకారం.. ప్రారంభంలో పలు జట్లు ధోనీని కొనుగోలు చేసేందుకు బిడ్డింగ్లో పాల్గొన్నాయి. అయితే ధర 10 లక్షల డాలర్ల మార్కును దాటిన తర్వాత పోటీ ప్రధానంగా చెన్నై, ముంబై జట్ల మధ్య కొనసాగింది. రెండు ఫ్రాంచైజీలు పోటాపోటీగా ధర పెంచాయి. చివరకు బిడ్ 15 లక్షల అమెరికన్ డాలర్లకు చేరుకుంది.
ధోనీని ఎట్టి పరిస్థితుల్లోనూ సొంతం చేసుకోవాలని ముందుగానే నిర్ణయించుకున్న చెన్నై యాజమాన్యం చివరి వరకు వెనక్కి తగ్గలేదు. వేలంలో చెన్నై తరఫున పాల్గొన్న వి.బి. చంద్రశేఖర్ (VB Chandrasekhar) చివరకు విజేత బిడ్ వేశారు. అలా ధోనీ చెన్నై సూపర్ కింగ్స్ తొలి ప్రధాన ఆటగాడిగా నిలిచాడు.
ధోనీ కోసం చివరి వరకు పోటీపడిన ముంబై ఇండియన్స్.. చివరకు రూ.1.5 మిలియన్ డాలర్ల బిడ్ను అందుకోలేకపోయింది. అప్పటికే ముంబై జట్టుకు ఐకాన్ ప్లేయర్గా క్రికెట్ దిగ్గజం సచిన్ టెండూల్కర్ (Sachin Tendulkar) ఉన్నాడు. ఐకాన్ ఆటగాడికి సంబంధించిన ఆర్థిక నిబంధనల కారణంగా జట్టు మొత్తం ఖర్చు మరింత పెరిగే పరిస్థితి ఉంది. దీంతో ధోనీ కోసం అంత భారీ మొత్తాన్ని వెచ్చించడం ముంబైకి సాధ్యం కాలేదు. ఫలితంగా ధోనీని దక్కించుకునే అవకాశం చెన్నైకి లభించింది.
2007లో జరిగిన తొలి టీ20 ప్రపంచకప్లో భారత జట్టుకు ధోనీ నాయకత్వం వహించి ఛాంపియన్గా నిలిపాడు. దీంతో అప్పటికే దేశవ్యాప్తంగా అతడికి విపరీతమైన క్రేజ్ ఏర్పడింది. అతడి నాయకత్వ లక్షణాలు, వికెట్ కీపింగ్ నైపుణ్యం, బ్యాటింగ్ సామర్థ్యం చెన్నై యాజమాన్యాన్ని ఆకట్టుకున్నాయి.
మరోవైపు జట్టుకు దేశవ్యాప్తంగా అభిమానులను సంపాదించిపెట్టగల స్టార్ ఆటగాడు కావాలని చెన్నై భావించింది. ముంబైకి సచిన్, కోల్కతాకు సౌరవ్ గంగూలీ ఉన్నట్లుగా.. తమ జట్టుకు ధోనీని ప్రధాన ఆకర్షణగా నిలపాలని నిర్ణయించింది. అందుకే భారీ ధర చెల్లించేందుకు కూడా వెనుకాడలేదు.
చెన్నై యాజమాన్యం ధోనీపై పెట్టిన పెట్టుబడి అద్భుతమైన ఫలితాలను ఇచ్చింది. అతడి నాయకత్వంలో సీఎస్కే 2010, 2011, 2018, 2021, 2023 సీజన్లలో ఐదుసార్లు ఐపీఎల్ ఛాంపియన్గా నిలిచింది. అంతేకాదు.. రెండు ఛాంపియన్స్ లీగ్ టీ20 టైటిళ్లను కూడా సొంతం చేసుకుంది.
దాదాపు 19 ఏళ్ల పాటు సాగిన ధోనీ ఐపీఎల్ ఆటగాడి ప్రయాణం ఎన్నో రికార్డులు, చిరస్మరణీయ విజయాలతో ముగిసింది. ఇప్పుడు 2027 సీజన్లో సీఎస్కే మెంటార్గా కొత్త బాధ్యతలు చేపట్టేందుకు సిద్ధమవుతున్నాడు. 2008లో జరిగిన ఆ ఒక్క వేలం.. ఐపీఎల్ చరిత్రలోనే అత్యంత విజయవంతమైన ఆటగాడు, ఫ్రాంచైజీ అనుబంధానికి పునాది వేసింది. ధోనీ, చెన్నై బంధం క్రికెట్ అభిమానుల హృదయాల్లో ఎప్పటికీ ప్రత్యేకంగానే నిలిచిపోతుంది.