Shubman Gill: టీమిండియాకు బిగ్ షాక్.. ప్రాక్టీస్లో గాయపడిన కెప్టెన్ శుభమన్ గిల్
Shubman Gill Injury: వెస్టిండీస్తో తొలి వన్డేకు ముందు టీమిండియా కెప్టెన్ శుభమన్ గిల్ గాయపడ్డారు. ప్రాక్టీస్లో మొహమ్మద్ సిరాజ్ వేసిన వేగవంతమైన బంతి ఆయన కుడి మోచేతికి బలంగా తగిలింది. దీంతో గిల్ నొప్పితో మైదానంలో కూర్చున్నారు. వైద్య బృందం చికిత్స అందించింది. తొలి వన్డేకు ఆయన అందుబాటుపై ఇప్పుడు ఉత్కంఠ నెలకొంది.
Shubman Gill: భారత క్రికెట్ జట్టుకు ఎదురుదెబ్బ తగిలేలా కనిపిస్తోంది. వెస్టిండీస్తో తిరువనంతపురం వేదికగా జరగనున్న తొలి వన్డే మ్యాచ్కు ముందు ప్రాక్టీస్ సెషన్లో కెప్టెన్ శుభమన్ గిల్ గాయపడ్డారు. నెట్స్లో బ్యాటింగ్ ప్రాక్టీస్ చేస్తున్న సమయంలో ఫాస్ట్ బౌలర్ మొహమ్మద్ సిరాజ్ సంధించిన ఫాస్ట్ బాల్ గిల్ కుడి మోచేతికి బలంగా తాకింది. దీంతో తీవ్రమైన నొప్పితో గిల్ ఒక్కసారిగా మైదానంలోనే కూర్చుండిపోయారు. వెంటనే అప్రమత్తమైన వైద్య బృందం ఆయనకు ప్రథమ చికిత్స అందించి, మోచేతికి బ్యాండేజ్ కట్టింది.
తొలి వన్డే ఆడేటట్లు ఉందా?
భారత్ – వెస్టిండీస్ జట్ల మధ్య సెప్టెంబర్ 27న తిరువనంతపురంలోని గ్రీన్ఫీల్డ్ అంతర్జాతీయ స్టేడియంలో తొలి వన్డే మ్యాచ్ జరగనుంది. గురువారం నుంచి భారత ఆటగాళ్ళు అక్కడ తీవ్రంగా శ్రమిస్తున్నారు. అయితే శుక్రవారం ప్రాక్టీస్ సమయంలో సిరాజ్ వేసిన బంతి గిల్కు తగలడంతో అందరిలోనూ ఆందోళన మొదలైంది. గాయం తగిలిన తర్వాత గిల్ కొద్దిసేపు మైదానానికి వచ్చి సహచర ఆటగాళ్లతో మాట్లాడినప్పటికీ, మళ్లీ నెట్స్లో బ్యాటింగ్కు దిగలేదు. సీనియర్ ఆటగాడు రోహిత్ శర్మ స్వయంగా వచ్చి గిల్ పరిస్థితిని ఆరా తీశారు. ప్రస్తుతం ఆయన తొలి వన్డే మ్యాచ్లో ఆడటంపై సందిగ్ధత నెలకొంది.
గౌతమ్ గంబీర్ ప్రశంసలు
ఈ సిరీస్కు ముందు స్టార్ స్పోర్ట్స్తో మాట్లాడిన హెడ్ కోచ్ గౌతమ్ గంబీర్.. కెప్టెన్లందరూ తమ వ్యక్తిగత ప్రయోజనాల కంటే జట్టు ప్రయోజనమే ముఖ్యమని భావిస్తారని తెలిపారు. టెస్టుల్లో కెప్టెన్గా అద్భుతంగా రాణించిన శుభమన్ గిల్ నాయకత్వ ప్రతిభను ఆయన ప్రత్యేకంగా ప్రశంసించారు. ప్రస్తుతానికి గిల్ గాయం ఎంత తీవ్రమైనదనే దానిపై బీసీసీఐ నుంచి అధికారిక ప్రకటన రావాల్సి ఉంది. ఒకవేళ గిల్ ఫిట్నెస్ సాధించలేకపోతే టీమ్ మేనేజ్మెంట్ తుది జట్టు కూర్పుపై పునరాలోచించాల్సి వస్తుంది.
Rohit Sharma doing catching practice during today’s practice session at Greenfield Stadium, Thiruvananthapuram.😍💙 pic.twitter.com/DvV2juZoLJ
— 𝐑𝐮𝐬𝐡𝐢𝐢𝐢⁴⁵ (@rushiii_12) September 25, 2026
భారత్ వన్డే జట్టు వివరాలు
వెస్టిండీస్తో జరిగే ఈ వన్డే సిరీస్ కోసం సెలెక్టర్లు బలమైన జట్టును ఎంపిక చేశారు. రోహిత్ శర్మ, విరాట్ కోహ్లీ, కేఎల్ రాహుల్ (వికెట్ కీపర్), కుల్దీప్ యాదవ్, ప్రసిద్ధ్ కృష్ణ, మొహమ్మద్ సిరాజ్, రుతురాజ్ గైక్వాడ్, శుభమన్ గిల్ (కెప్టెన్), యశస్వి జైస్వాల్, ఆకిబ్ నబీ, ధ్రువ్ జురెల్, నితీష్ కుమార్ రెడ్డి, గుర్నూర్ బ్రార్, నమన్ ధీర్ ఈ స్క్వాడ్లో ఉన్నారు. కెప్టెన్ గిల్ త్వరగా కోలుకుని మ్యాచ్ బరిలోకి దిగాలని అభిమానులు కోరుకుంటున్నారు.
మరిన్ని క్రికెట్ వార్తల కోసం ఇక్కడ క్లిక్ చేయండి..