
CSK Retained and Released Players: ఐపీఎల్ 2027 సీజన్కు ముందు చెన్నై సూపర్ కింగ్స్ (Chennai Super Kings) జట్టులో కీలక పరిణామాలు చోటుచేసుకున్నాయి. ఐదుసార్లు ఐపీఎల్ ఛాంపియన్గా నిలిచిన సీఎస్కే.. వచ్చే సీజన్ కోసం జట్టును పునర్నిర్మించుకునే పనిలో పడింది. ఈ క్రమంలో మాజీ కెప్టెన్ మహేంద్ర సింగ్ ధోనీ (MS Dhoni) ఆటగాడిగా తన ఐపీఎల్ కెరీర్కు ముగింపు పలికి జట్టు మెంటార్గా కొత్త బాధ్యతలు చేపట్టనున్నారు. ధోనీ నిర్ణయంతో పాటు మరో తొమ్మిది మంది ఆటగాళ్ల విడుదల కూడా ఆసక్తికరంగా మారింది.
క్రిక్ఇన్ఫో నివేదిక ప్రకారం చెన్నై సూపర్ కింగ్స్ మొత్తం 10 మంది ఆటగాళ్లను విడుదల చేసే జాబితాలో చేర్చింది. ఇందులో ఆస్ట్రేలియా ఆల్రౌండర్ మాథ్యూ షార్ట్ (Matthew Short), న్యూజిలాండ్ పేసర్ మాట్ హెన్రీ (Matt Henry), జాక్ ఫౌల్క్స్ (Zak Foulkes) ఉన్నారు.
భారత ఆటగాళ్లలో ప్రశాంత్ వీర్ (Prashant Veer), అమన్ ఖాన్ (Aman Khan), కుల్దీప్ యాదవ్ (Kuldip Yadav), ఆకాష్ మధ్వాల్ (Akash Madhwal), మాక్నీల్ నోరోన్హా (Macneil Noronha) పేర్లు ఉన్నాయి. అలాగే డియాన్ ఫారెస్టర్ (Dian Forrester), ఎంఎస్ ధోనీ కూడా ఈ జాబితాలో ఉన్నారు.
విడుదల జాబితాలో అత్యధిక ధర కలిగిన ఆటగాడు ప్రశాంత్ వీర్. సీఎస్కే అతడిని రూ.14.2 కోట్లకు తీసుకుంది. అయితే వచ్చే సీజన్కు ముందు అతడిని విడుదల చేయాలని నిర్ణయించినట్లు సమాచారం. మరోవైపు మాథ్యూ షార్ట్ రూ.1.5 కోట్లు, మాట్ హెన్రీ రూ.2 కోట్లు, జాక్ ఫౌల్క్స్ రూ.75 లక్షల ధరతో జట్టులో ఉన్నారు.
చెన్నై అభిమానులకు అత్యంత భావోద్వేగమైన విషయం ఎంఎస్ ధోనీ పేరు విడుదల జాబితాలో ఉండటం. రూ.4 కోట్ల ధరతో కొనసాగుతున్న ధోనీ ఇకపై ఆటగాడిగా సీఎస్కే తరఫున కనిపించరు. 2008లో మొదలైన ఆయన ఐపీఎల్ ప్రయాణం ముగియడంతో 2027 సీజన్ నుంచి మెంటార్గా వ్యవహరించనున్నారు. యువ ఆటగాళ్లకు మార్గదర్శకత్వం అందించడంతో పాటు జట్టు వ్యూహాల్లో తన అనుభవాన్ని ఉపయోగించనున్నారు.
1. మాథ్యూ షార్ట్ – రూ.1.5 కోట్లు
2. మాట్ హెన్రీ – రూ.2 కోట్లు
3. జాక్ ఫౌల్క్స్ – రూ.75 లక్షలు
4. ప్రశాంత్ వీర్ – రూ.14.2 కోట్లు
5. అమన్ ఖాన్ – రూ.40 లక్షలు
6. కుల్దీప్ యాదవ్ – రూ.30 లక్షలు
7. ఆకాష్ మధ్వాల్ – రూ.30 లక్షలు
8. డియాన్ ఫారెస్టర్ – రూ.30 లక్షలు
9. మాక్నీల్ నోరోన్హా – రూ.75 లక్షలు
10. ఎంఎస్ ధోనీ – రూ.4 కోట్లు
ఈ విడుదలల ద్వారా చెన్నై సూపర్ కింగ్స్కు సుమారు రూ.24.5 కోట్ల బడ్జెట్ అందుబాటులోకి వస్తుందని నివేదిక పేర్కొంది. ఈ మొత్తంతో వచ్చే వేలంలో అవసరమైన ఆటగాళ్లను తీసుకోవాలని సీఎస్కే భావించవచ్చు. ముఖ్యంగా బ్యాటింగ్, బౌలింగ్ విభాగాల్లో జట్టుకు అవసరమైన మార్పులు చేసుకునే అవకాశం ఉంది.
చెన్నై సూపర్ కింగ్స్ చివరిసారిగా 2023లో ఐపీఎల్ టైటిల్ గెలిచింది. ఆ తర్వాతి సీజన్లలో ప్లేఆఫ్స్కు కూడా అర్హత సాధించలేకపోయింది. దీంతో 2027 సీజన్లో తిరిగి పుంజుకోవాలని జట్టు యాజమాన్యం భావిస్తోంది. ధోనీ మెంటార్గా కొనసాగుతుండటంతో యువ ఆటగాళ్లకు ఆయన అనుభవం ఉపయోగపడనుంది. వచ్చే సీజన్లో సీఎస్కే ఎలాంటి జట్టును నిర్మిస్తుందో చూడాలి.