IND vs NZ: టీమిండియాకు బిగ్ రిలీఫ్.. భారత్‌ను వణికించిన పేసర్‌కు ఆఖరి వన్డేలో రెస్ట్

IND vs NZ: న్యూజిలాండ్‌తో నాలుగో వన్డేలో 244 పరుగుల భారీ తేడాతో ఓడిపోయిన టీమిండియాకు చివరి మ్యాచ్‌కు ముందు ఒక ఊరటనిచ్చే వార్త వచ్చింది. భారత బ్యాటింగ్‌ను చీల్చిచెండాడిన న్యూజిలాండ్ పేసర్ మ్యాట్ హెన్రీ ఐదో వన్డేలో ఆడటం లేదు. నవంబర్ 15న మౌంట్ మాంగనూయ్‌లో జరిగే చివరి మ్యాచ్ కోసం న్యూజిలాండ్ ప్రకటించిన జట్టులో అతడికి చోటు దక్కలేదు. భారత్‌తో నవంబర్ 19 నుంచి ప్రారంభమయ్యే రెండు టెస్టుల సిరీస్‌కు సిద్ధమయ్యేందుకు కీలక ఆటగాళ్లకు విశ్రాంతి ఇస్తున్న నేపథ్యంలో ఈ మార్పులు జరిగాయి. నాలుగో వన్డేలో హెన్రీ సృష్టించిన విధ్వంసం తర్వాత అతడు లేకపోవడం భారత బ్యాటర్లకు కొంత ఊరటనిచ్చే అంశమే.

తొలి ఓవర్‌లోనే ముగ్గురు స్టార్లను ఔట్ చేసిన హెన్రీ

నాలుగో వన్డేలో మ్యాట్ హెన్రీ అద్భుతమైన బౌలింగ్‌తో భారత జట్టును దెబ్బతీశాడు. 334 పరుగుల లక్ష్యంతో బరిలోకి దిగిన భారత్ తొలి ఓవర్‌లోనే మూడు వికెట్లు కోల్పోయింది. హెన్రీ వేసిన మొదటి బంతికే రోహిత్ శర్మ ఔటయ్యాడు. ఐదో బంతికి విరాట్ కోహ్లీ క్లీన్ బౌల్డ్ కాగా, చివరి బంతికి కెప్టెన్ శ్రేయస్ అయ్యర్ ఎల్బీడబ్ల్యూగా వెనుదిరిగాడు. ఆ తర్వాత కూడా హెన్రీ భారత బ్యాటర్లను వదల్లేదు. ఇషాన్ కిషన్, కుల్దీప్ యాదవ్, గర్నూర్ బ్రార్ వికెట్లను కూడా పడగొట్టాడు. మొత్తంగా 9.4 ఓవర్లలో 27 పరుగులు ఇచ్చి ఆరు వికెట్లు తీశాడు. ఈ ప్రదర్శనతో ప్లేయర్ ఆఫ్ ద మ్యాచ్ అవార్డును కూడా అందుకున్నాడు.

ఇది కూడా చదవండి: IND vs NZ: కెప్టెన్‌గా తొలి మ్యాచ్‌లోనే డకౌట్.. శ్రేయస్ అయ్యర్ పేరిట చెత్త రికార్డు

89 పరుగులకే కుప్పకూలిన టీమిండియా

ఈ మ్యాచ్‌లో తొలుత బ్యాటింగ్ చేసిన న్యూజిలాండ్ 50 ఓవర్లలో 333 పరుగులు చేసింది. విల్ యంగ్ 125 పరుగులతో సెంచరీ సాధించగా, టిమ్ సీఫెర్ట్ 58 పరుగులు చేశాడు. దీంతో భారత్ ముందు 334 పరుగుల లక్ష్యం నిలిచింది. అయితే హెన్రీ దెబ్బకు భారత టాప్ ఆర్డర్ కుప్పకూలింది. ఇషాన్ కిషన్ 27 పరుగులతో కొంత పోరాడినా మిగతా బ్యాటర్లు నిలవలేకపోయారు. భారత జట్టు 26.4 ఓవర్లలో 89 పరుగులకే ఆలౌటైంది. దీంతో న్యూజిలాండ్ 244 పరుగుల భారీ తేడాతో విజయం సాధించింది. వన్డేల్లో పరుగుల తేడాతో భారత్‌కు ఎదురైన రెండో అతిపెద్ద ఓటమి ఇదే.

ఐదో వన్డేకు న్యూజిలాండ్ కొత్త జట్టు

చివరి వన్డే కోసం న్యూజిలాండ్ జట్టులో మార్పులు చేసింది. ఐసీసీ ప్రకటించిన తాజా జట్టు వివరాల ప్రకారం మ్యాట్ హెన్రీతో పాటు కైల్ జేమీసన్ కూడా ఐదో వన్డే జట్టులో లేరు. వారి స్థానంలో జోష్ క్లార్క్‌సన్, బ్లెయిర్ టిక్నర్‌లకు చోటు కల్పించారు. టెస్టు సిరీస్‌కు సిద్ధమయ్యేందుకు ఆటగాళ్ల పనిభారాన్ని పరిగణనలోకి తీసుకుని ఈ మార్పులు చేసినట్లు తెలుస్తోంది. ఇప్పటికే టెస్టు సన్నాహాల కోసం కొందరు ఆటగాళ్లు వన్డే జట్టు నుంచి తప్పుకున్నారు. నవంబర్ 19న వెల్లింగ్టన్‌లో భారత్, న్యూజిలాండ్ మధ్య తొలి టెస్టు ప్రారంభం కానుంది.

ఇది కూడా చదవండి: IND vs NZ: విల్ యంగ్ సెంచరీ వృథా.. ప్లేయర్ ఆఫ్ ద మ్యాచ్‌ ఎవరికి దక్కిందంటే ?

చివరి వన్డేలో భారత్ ముందున్న లక్ష్యం ఇదే

ఐదు వన్డేల సిరీస్‌లో తొలి రెండు మ్యాచ్‌ల్లో భారత్ విజయం సాధించింది. మూడో వన్డే వర్షం కారణంగా రద్దయింది. నాలుగో మ్యాచ్‌లో న్యూజిలాండ్ గెలవడంతో సిరీస్‌లో భారత్ ఆధిక్యం 2-1కి తగ్గింది. నవంబర్ 15న జరిగే చివరి వన్డేలో భారత్ గెలిస్తే సిరీస్‌ను 3-1తో ముగిస్తుంది. న్యూజిలాండ్ గెలిస్తే సిరీస్ 2-2తో సమమవుతుంది. కీలక బౌలర్ హెన్రీ లేకపోవడం భారత్‌కు కలిసొచ్చే అంశమే అయినా, భారీ ఓటమి నుంచి కోలుకుని బ్యాటర్లు ఎలా ఆడతారన్నది ఇప్పుడు ఆసక్తికరంగా మారింది.