IND vs NZ: కెప్టెన్‌గా తొలి మ్యాచ్‌లోనే డకౌట్.. శ్రేయస్ అయ్యర్ పేరిట చెత్త రికార్డు

IND vs NZ: న్యూజిలాండ్‌తో జరుగుతున్న నాలుగో వన్డేలో టీమిండియాకు ఊహించని షాక్‌ తగిలింది. 334 పరుగుల లక్ష్యంతో బరిలోకి దిగిన భారత్‌కు ఆరంభంలోనే కోలుకోలేని దెబ్బ పడింది. స్టార్ బ్యాటర్లు రోహిత్ శర్మ, విరాట్ కోహ్లీ, కెప్టెన్ శ్రేయస్ అయ్యర్ ముగ్గురూ ఒక్క పరుగు కూడా చేయకుండానే పెవిలియన్‌కు చేరారు. మౌంట్ మౌంగనూయ్‌లోని బే ఓవల్ వేదికగా జరిగిన ఈ మ్యాచ్‌లో న్యూజిలాండ్ పేసర్ మాట్ హెన్రీ తన తొలి ఓవర్‌లోనే భారత టాప్ ఆర్డర్‌ను కుప్పకూల్చాడు. దీంతో భారత వన్డే క్రికెట్ చరిత్రలోనే ఎన్నడూ లేని చెత్త రికార్డు నమోదైంది.

తొలి ఓవర్‌లోనే మూడు వికెట్లు

న్యూజిలాండ్ తొలుత బ్యాటింగ్ చేసి 50 ఓవర్లలో 333 పరుగులు చేసింది. విల్ యంగ్ 125 పరుగులతో రాణించగా, టిమ్ సీఫర్ట్ 58 పరుగులు చేశాడు. దీంతో భారత్ ముందు 334 పరుగుల లక్ష్యం నిలిచింది. ఈ లక్ష్యాన్ని ఛేదించేందుకు రోహిత్ శర్మ, రుతురాజ్ గైక్వాడ్ ఓపెనర్లుగా బరిలోకి దిగారు. అయితే మాట్ హెన్రీ వేసిన తొలి బంతికే రోహిత్ శర్మ అవుటయ్యాడు. బయటకు కదిలిన బంతిని ఆడే ప్రయత్నంలో రోహిత్ బ్యాట్‌కు తగిలిన బంతి ఫస్ట్ స్లిప్‌లో ఉన్న ఫిన్ అలెన్ చేతుల్లోకి వెళ్లింది. ఆ తర్వాత క్రీజులోకి వచ్చిన విరాట్ కోహ్లీ నాలుగు బంతులు ఎదుర్కొని డకౌట్ అయ్యాడు. హెన్రీ వేసిన బంతి లోపలికి దూసుకొచ్చి, అనూహ్యంగా కిందకు ఉండటంతో కోహ్లీ క్లీన్ బౌల్డ్ అయ్యాడు.

కెప్టెన్సీ తొలి మ్యాచ్‌లోనే డకౌట్

ఇక నాలుగో స్థానంలో బ్యాటింగ్‌కు వచ్చిన కెప్టెన్ శ్రేయస్ అయ్యర్ కూడా ఖాతా తెరవకుండానే వెనుదిరిగాడు. హెన్రీ వేసిన ఓవర్ చివరి బంతి అయ్యర్ ప్యాడ్లకు తగిలింది. మైదానంలోని అంపైర్ తొలుత నాటౌట్‌గా ప్రకటించినా, న్యూజిలాండ్ రివ్యూ తీసుకుంది. రీప్లేలో బంతి వికెట్లను తాకుతున్నట్లు తేలడంతో అంపైర్ నిర్ణయం మారింది. దీంతో అయ్యర్ ఎల్బీడబ్ల్యూగా వెనుదిరిగాడు. శుభ్‌మన్ గిల్ అందుబాటులో లేకపోవడంతో ఈ మ్యాచ్‌లో తొలిసారి వన్డే కెప్టెన్సీ బాధ్యతలు చేపట్టిన అయ్యర్‌కు ఇది చేదు అనుభవంగా మిగిలింది. వన్డేల్లో భారత జట్టుకు కెప్టెన్సీ చేసిన తొలి మ్యాచ్‌లోనే డకౌట్ అయిన తొలి భారత ఆటగాడిగా అయ్యర్ నిలిచాడు.

భారత వన్డే చరిత్రలో తొలిసారి

ఒక వన్డే ఇన్నింగ్స్‌లో ఒక్క పరుగు కూడా చేయకముందే తొలి మూడు వికెట్లు కోల్పోవడం భారత జట్టుకు ఇదే మొదటిసారి. అంతర్జాతీయ వన్డే క్రికెట్‌లోనూ ఇది అత్యంత అరుదైన ఘటనగా నిలిచింది. అందుబాటులో ఉన్న గణాంకాల ప్రకారం, ఇలాంటి పరిస్థితి గతంలో పాకిస్థాన్ రెండుసార్లు, బంగ్లాదేశ్ ఒకసారి, ఆస్ట్రేలియా ఒకసారి ఎదుర్కొన్నాయి. ఇప్పుడు భారత్ కూడా ఈ జాబితాలో చేరింది. 1983 ప్రపంచకప్‌లో జింబాబ్వేతో జరిగిన మ్యాచ్‌లో భారత్ 9 పరుగులకే నాలుగు వికెట్లు కోల్పోయింది. ఆ తర్వాత మళ్లీ తొలి నాలుగు వికెట్లు 10 పరుగుల లోపే పడటం ఇది రెండోసారి. ఆ మ్యాచ్‌లో భారత్ 17 పరుగులకే ఆలౌట్ అయ్యే ప్రమాదం నుంచి కపిల్ దేవ్ చారిత్రాత్మక ఇన్నింగ్స్‌తో బయటపడిన విషయం తెలిసిందే.

రోహిత్‌కు కెరీర్‌లో తొలి గోల్డెన్ డక్.. కోహ్లీతో రెండోసారి ఇలా

రోహిత్ శర్మ వన్డేల్లో ఓపెనర్‌గా బరిలోకి దిగిన తర్వాత తొలిసారి గోల్డెన్ డక్‌గా వెనుదిరిగాడు. భారత్ తరఫున ఓపెనర్‌గా ఆడిన 205 ఇన్నింగ్స్‌లలో అతడికి ఇదే తొలి గోల్డెన్ డక్. ఈ సిరీస్‌లో మూడు ఇన్నింగ్స్‌ల్లో రెండోసారి డకౌట్ కావడం మరో నిరాశ కలిగించే విషయం. మరోవైపు రోహిత్, విరాట్ కోహ్లీ ఇద్దరూ ఒకే వన్డేలో డకౌట్ కావడం ఇది రెండోసారి. గతంలో 2010లో శ్రీలంకతో దంబుల్లాలో జరిగిన మ్యాచ్‌లోనూ ఈ ఇద్దరూ పరుగులేమీ చేయకుండానే వెనుదిరిగారు. అప్పట్లో వీరేంద్ర సెహ్వాగ్ 99 పరుగుల వద్ద నాటౌట్‌గా నిలిచిన ఆ మ్యాచ్‌ కూడా ప్రత్యేకంగా నిలిచింది. ఇప్పుడు 16 ఏళ్ల తర్వాత మరోసారి ఇద్దరు స్టార్ బ్యాటర్లు ఒకే వన్డేలో డకౌట్ కావడం అభిమానులను నిరాశకు గురిచేసింది.