ODI Records: ఒకే దెబ్బకు ఇటు 15 ఏళ్లు.. అటు 47 ఏళ్ల రికార్డు బద్దలు కొట్టిన జోడీ..!
Highest 2nd Wicket Partnership: అడిలైడ్ ఓవల్‌లో ఇంగ్లండ్ చరిత్ర సృష్టించింది. నవంబర్ 15న ఆస్ట్రేలియాతో జరిగిన 2వ వన్డేలో జో రూట్-టామ్ బాంటన్ రెండో వికెట్‌కు 137 పరుగుల భాగస్వామ్యంతో 1979 నుంచి ఉన్న 47 ఏళ్ల రికార్డును బద్దలు కొట్టారు. బాయ్‌కాట్-విల్లీ, ప్రయర్-ట్రాట్ రికార్డులు తుడిచిపెట్టుకుపోయాయి.
Joe Root Record: రికార్డులు బద్దలు కొట్టడానికే ఉంటాయి. కానీ 47 ఏళ్లుగా చెక్కుచెదరకుండా ఉన్న రికార్డును బద్దలు కొట్టడం అంటే మామూలు విషయం కాదు. ఆదివారం అడిలైడ్ ఓవల్‌లో ఇంగ్లండ్ అనుభవజ్ఞుడు జో రూట్, యువ ఓపెనర్ టామ్ బాంటన్ అదే చేసి చూపించారు. ఆస్ట్రేలియాతో 2వ వన్డేలో టాస్ ఓడి మరోసారి ముందుగా బ్యాటింగ్‌కు దిగిన హ్యారీ బ్రూక్ సేన.. తొలి వన్డేకు భిన్నంగా అదిరే ఆరంభం ఇచ్చింది. ఆరంభంలోనే ఓ వికెట్ కోల్పోయినా.. ఆ తర్వాత బాధ్యతను భుజాలపై వేసుకున్న రూట్-బాంటన్ రెండో వికెట్‌కు 137 పరుగుల భాగస్వామ్యంతో ఆసీస్ బౌలర్లకు చుక్కలు చూపించారు.
1979 రికార్డు తుడిచిపెట్టుకుపోయింది..!
ఈ 137 పరుగుల స్టాండ్‌తో వారు జాఫ్ బాయ్‌కాట్ – పీటర్ విల్లీ పేరిట 47 ఏళ్లుగా ఉన్న అత్యధిక రెండో వికెట్ భాగస్వామ్య రికార్డును బద్దలు కొట్టారు. 1979లో సిడ్నీలో బాయ్‌కాట్-విల్లీ ఆసీస్‌పై 118 పరుగుల భాగస్వామ్యం నెలకొల్పారు. దాదాపు ఐదు దశాబ్దాలుగా ఆ రికార్డు అలాగే ఉంది. ఇప్పుడు రూట్-బాంటన్ దాన్ని చెరిపేసి చరిత్ర పుటల్లోకి ఎక్కారు.
ఆస్ట్రేలియా గడ్డపై ఆసీస్‌పై ఇంగ్లండ్ తరపున అత్యధిక 2వ వికెట్ భాగస్వామ్యాలు:
137 – టామ్ బాంటన్ & జో రూట్, అడిలైడ్, 2026*
118 – జాఫ్ బాయ్‌కాట్ & పీటర్ విల్లీ, సిడ్నీ, 1979
117 – జానీ బెయిర్‌స్టో & అలెక్స్ హేల్స్, బ్రిస్బేన్, 2018
అడిలైడ్‌లో కూడా కొత్త చరిత్ర..!
అంతేకాదు.. అడిలైడ్ ఓవల్‌లోనే మరో 15 ఏళ్ల రికార్డు కూడా కూలిపోయింది. 2011లో మాట్ ప్రయర్ – జొనాథన్ ట్రాట్ నెలకొల్పిన 113 పరుగుల భాగస్వామ్యమే ఇన్నాళ్లూ అడిలైడ్‌లో ఆసీస్‌పై ఇంగ్లండ్‌కు అత్యధిక 2వ వికెట్ స్టాండ్‌గా ఉంది. దాన్ని కూడా రూట్-బాంటన్ అధిగమించారు.
అడిలైడ్‌లో ఆసీస్‌పై ఇంగ్లండ్ 2వ వికెట్ భాగస్వామ్యాలు:
137 – బాంటన్ & రూట్, 2026*
113 – ప్రయర్ & ట్రాట్, 2011
82 – గ్రాహం హిక్ & నిక్ నైట్, 1999
రూట్ రికార్డుల మోత.. బాంటన్ సంచలనం..!
ఈ ఇన్నింగ్స్‌తో రూట్ మరో ఘనతను అందుకున్నాడు. అన్ని ఫార్మాట్లలో కలిపి ఆసీస్‌పై ఇంగ్లండ్ తరఫున అత్యధిక 50+ స్కోర్లు చేసిన జాబితాలో రూట్ 32తో రెండో స్థానానికి చేరాడు. అగ్రస్థానంలో గ్రాహం గూచ్ (33) ఉన్నాడు. ఇయాన్ బెల్ (31)ను రూట్ వెనక్కి నెట్టాడు.
వన్డేల్లో ప్రత్యేకంగా చూస్తే.. ఆసీస్‌పై ఇంగ్లండ్ తరఫున అత్యధిక 50+ స్కోర్లు ఇయాన్ మోర్గాన్ (16) పేరిట ఉండగా.. రూట్ 7తో జోస్ బట్లర్, జేసన్ రాయ్ సరసన నిలిచాడు.
మరోవైపు టామ్ బాంటన్ కూడా చరిత్ర సృష్టించాడు. 2018లో బ్రిస్బేన్‌లో జానీ బెయిర్‌స్టో 60 కొట్టిన తర్వాత.. ఆస్ట్రేలియా గడ్డపై వన్డేలో 50+ స్కోర్ చేసిన తొలి ఇంగ్లిష్ ఓపెనర్‌గా బాంటన్ నిలిచాడు. ఎనిమిదేళ్ల నిరీక్షణకు తెరదించాడు.
తొలి వన్డేలో తడబడ్డ ఇంగ్లండ్.. రెండో వన్డేలో రికార్డుల మోతతో తిరగబడింది. ఈ జోష్ సిరీస్‌ను మలుపుతిప్పుతుందా? వేచి చూడాలి!
మరిన్ని క్రీడా వార్తల కోసం ఇక్కడ క్లిక్ చేయండి..