Babar Azam: బాబర్ ఆజమ్ పరమచెత్త రికార్డు.. అయినా 41 ఇన్నింగ్స్‌లుగా అది మాత్రం కరువే
Babar Azam: శ్రీలంకతో రావల్పిండి టెస్టులో బాబర్ ఆజమ్ 58 బంతుల్లో హాఫ్ సెంచరీ సాధించాడు. కెప్టెన్‌గా పాకిస్థాన్ తరఫున అంతర్జాతీయ క్రికెట్‌లో 70 సార్లు 50 ప్లస్ స్కోర్లు చేసి మిస్బా ఉల్ హక్ రికార్డును సమం చేశాడు. అయితే 2022 డిసెంబర్ తర్వాత టెస్టుల్లో సెంచరీ చేయలేదు. వరుసగా 41 ఇన్నింగ్స్‌లుగా మూడంకెల స్కోరు కోసం ఎదురుచూస్తున్నాడు.
Babar Azam: పాకిస్థాన్ స్టార్ బ్యాటర్ బాబర్ ఆజమ్ మరోసారి వార్తల్లో నిలిచాడు. శ్రీలంకతో రావల్పిండి వేదికగా జరుగుతున్న తొలి టెస్టులో హాఫ్ సెంచరీ సాధించి ఓ అరుదైన రికార్డుకు చేరువయ్యాడు. కెప్టెన్‌గా అంతర్జాతీయ క్రికెట్‌లో అత్యధికంగా 50 ప్లస్ స్కోర్లు చేసిన పాకిస్థాన్ ఆటగాడిగా మిస్బా ఉల్ హక్ సరసన నిలిచాడు. అయితే ఇంత మంచి ఇన్నింగ్స్ ఆడినా.. టెస్టు క్రికెట్‌లో అతడిని వెంటాడుతున్న సెంచరీ కరువు మాత్రం తీరలేదు. 41 ఇన్నింగ్స్‌లుగా బాబర్ టెస్టు సెంచరీ చేయలేకపోతున్నాడు.
మిస్బా రికార్డు సమం
రావల్పిండి టెస్టు తొలి రోజు సోమవారం బాబర్ ఆజమ్ తన బ్యాటింగ్‌తో ఆకట్టుకున్నాడు. 58 బంతులు ఎదుర్కొని 7 ఫోర్ల సాయంతో 50 పరుగులు చేశాడు. ఇది అతడి టెస్టు కెరీర్‌లో 35వ హాఫ్ సెంచరీ. ఈ క్రమంలో కెప్టెన్‌గా పాకిస్థాన్ తరఫున అంతర్జాతీయ క్రికెట్‌లో 50 లేదా అంతకంటే ఎక్కువ పరుగులు చేసిన సందర్భాలు 70కి చేరాయి. మొత్తం 164 ఇన్నింగ్స్‌ల్లోనే బాబర్ ఈ ఘనత సాధించాడు. దీంతో మిస్బా ఉల్ హక్ రికార్డును సమం చేశాడు. మిస్బా పాకిస్థాన్ కెప్టెన్‌గా 189 ఇన్నింగ్స్‌ల్లో 70 సార్లు 50 ప్లస్ స్కోర్లు నమోదు చేశాడు. ఈ జాబితాలో ఇంజమామ్ ఉల్ హక్ 42 అర్ధసెంచరీలతో తర్వాతి స్థానంలో ఉన్నాడు.
2022 తర్వాత నో టెస్ట్ సెంచరీ
బాబర్ ఆజమ్‌కు ఈ హాఫ్ సెంచరీ సంతోషాన్ని ఇచ్చినా.. టెస్టు సెంచరీ కరువు మాత్రం కొనసాగుతోంది. అతడు చివరిసారిగా 2022 డిసెంబర్‌లో న్యూజిలాండ్‌పై సెంచరీ చేశాడు. కరాచీలో జరిగిన ఆ మ్యాచ్‌లో 280 బంతులు ఎదుర్కొని 161 పరుగులు సాధించాడు. అప్పటి నుంచి ఇప్పటివరకు 41 ఇన్నింగ్స్‌లు ఆడినా మరోసారి మూడంకెల స్కోరు అందుకోలేకపోయాడు. దీంతో టెస్టుల్లో అత్యధిక ఇన్నింగ్స్‌ల పాటు సెంచరీ చేయని పాకిస్థాన్ బ్యాటర్ల జాబితాలో సంయుక్తంగా మూడో స్థానానికి చేరాడు. తాజా హాఫ్ సెంచరీతో రికార్డు సాధించినా.. ఈ నిరీక్షణకు మాత్రం తెరపడలేదు.
ఈ చెత్త రికార్డు ఇంకా ఎవరి పేరిట ఉందంటే
టెస్టుల్లో సెంచరీ చేయడానికి ఎక్కువ ఇన్నింగ్స్‌లు తీసుకున్న పాకిస్థాన్ ఆటగాళ్ల జాబితాలో బాబర్‌తో పాటు ఆసిఫ్ ముజ్తబా కూడా ఉన్నాడు. అతడు 1986 నుంచి 1997 మధ్య 25 టెస్టులు ఆడి 41 ఇన్నింగ్స్‌ల్లో ఒక్క సెంచరీ కూడా చేయలేదు. యాసిర్ హమీద్ 2003 నుంచి 2010 మధ్య 47 ఇన్నింగ్స్‌ల పాటు సెంచరీకి దూరంగా ఉన్నాడు. ఇక ఈ జాబితాలో రమీజ్ రాజా అగ్రస్థానంలో ఉన్నాడు. 1987 నుంచి 1997 మధ్య అతడు 74 ఇన్నింగ్స్‌ల్లో టెస్టు సెంచరీ చేయలేకపోయాడు. బాబర్ ప్రస్తుతం ఉన్న పరిస్థితుల్లో ఈ రికార్డుల జాబితా నుంచి బయటపడాలంటే మరో సెంచరీ సాధించాల్సిందే.
రావల్పిండి టెస్టులో బాబర్ ఆట
శ్రీలంక ఈ మ్యాచ్‌లో టాస్ గెలిచి ముందుగా బౌలింగ్ ఎంచుకుంది. పాకిస్థాన్ ఓపెనర్లు అజాన్ అవైస్, తయాబ్ ఆరిఫ్ జట్టుకు మంచి ఆరంభం ఇచ్చారు. తొలి వికెట్‌కు 86 పరుగులు జోడించారు. అవైస్ 50 బంతుల్లో 30 పరుగులు చేసి మిలన్ రత్నాయకే బౌలింగ్‌లో ఔటయ్యాడు. మరోవైపు తయాబ్ ఆరిఫ్ దూకుడుగా ఆడి 51 బంతుల్లో 57 పరుగులు చేశాడు. అతడి ఇన్నింగ్స్‌లో 9 ఫోర్లు, ఒక సిక్సర్ ఉన్నాయి. అనంతరం బాబర్ ఆజమ్, మహమ్మద్ తాహా మూడో వికెట్‌కు 69 పరుగులు జోడించారు. 35వ ఓవర్‌లో బాబర్‌ను దిల్షాన్ మదుశంక ఔట్ చేయడంతో ఈ భాగస్వామ్యానికి తెరపడింది.
మరిన్ని క్రీడా వార్తల కోసం ఇక్కడ క్లిక్ చేయండి..