Varaha Jayanti: వరాహ జయంతి సెప్టెంబర్ 13నా.. 14నా? తేదీ, శుభ సమయం, పూజా విధానం ఇదే!

Varaha Jayanti 2026 Date and Puja Vidhi Telugu: సత్యయుగంలోని పురాణ కథలు మనకు ఒక ముఖ్యమైన విషయాన్ని బోధిస్తాయి. అధర్మం హద్దులు దాటినప్పుడు ధర్మాన్ని కాపాడేందుకు, లోకంలో సమతుల్యతను పునరుద్ధరించేందుకు భగవంతుడు ఏదో ఒక రూపంలో అవతరిస్తాడని చెబుతారు. అలాంటి అద్భుతమైన అవతారాల్లో శ్రీమహావిష్ణువు ధరించిన వరాహ అవతారం ఒకటి. పురాణాల ప్రకారం, హిరణ్యాక్షుడు అనే రాక్షసుడు భూమిని సముద్ర గర్భంలోకి తీసుకెళ్లి దాచిపెట్టడంతో సృష్టిలో తీవ్ర సంక్షోభం ఏర్పడింది. అప్పుడు భూమిని రక్షించేందుకు శ్రీమహావిష్ణువు వరాహ రూపాన్ని ధరించి అవతరించారు. ఈ రూపంలో ఆయన హిరణ్యాక్షుడితో యుద్ధం చేసి సంహరించి, తన కోరలపై భూమిని ఎత్తి తిరిగి యథాస్థానంలో నిలిపినట్లు పురాణాలు చెబుతున్నాయి. శ్రీమహావిష్ణువు దశావతారాల్లో మూడవ అవతారంగా వరాహ అవతారాన్ని పేర్కొంటారు. ఈ అవతారం ఆవిర్భవించిన రోజును వరాహ జయంతిగా భక్తిశ్రద్ధలతో జరుపుకుంటారు.

2026లో వరాహ జయంతి ఎప్పుడు?

దృక్ పంచాంగం ప్రకారం, 2026లో భాద్రపద శుక్ల తృతీయ తిథి సెప్టెంబర్ 13న ఉదయం 7:08 గంటలకు ప్రారంభమై, సెప్టెంబర్ 14న ఉదయం 7:06 గంటలకు ముగుస్తుంది. ఉదయ తిథిని పరిగణనలోకి తీసుకుని వరాహ జయంతిని సెప్టెంబర్ 13, ఆదివారం జరుపుకుంటారు.

వరాహ జయంతి పూజకు శుభ సమయం

వరాహ స్వామిని పూజించేందుకు మధ్యాహ్న సమయం పవిత్రమైనదిగా భావిస్తారు. దృక్ పంచాంగం ప్రకారం, సెప్టెంబర్ 13న మధ్యాహ్నం 1:30 గంటల నుంచి సాయంత్రం 4:00 గంటల వరకు వరాహ జయంతి పూజకు శుభ సమయం. ఈ సమయంలో భక్తులు శ్రీమహావిష్ణువు వరాహ రూపాన్ని భక్తిశ్రద్ధలతో పూజించి, తమ కుటుంబ సుఖసంతోషాలు, శాంతి, శ్రేయస్సు కోసం ప్రార్థించవచ్చు.

ఇవి కూడా చదవండి

నీమ్ కరోలి బాబా ఎవరు? ఆయన జీవితంలో జరిగిన అద్భుతాలేంటి?

చిదంబర రహస్యం అంటే ఇదేనా..? తెర వెనుక కనిపించే శూన్యంలో దాగిన..

భారత్‌లోనే కాదు.. ఈ దేశాల్లోనూ ఘనంగా గణేష్ చతుర్థి వేడుకలు..

గణేశుడి వాహనం ఎలుకే ఎందుకు? అసలు రహస్యం ఇదే!

విష్ణుమూర్తి వరాహ అవతారం ఎందుకు ఎత్తారు?

పురాణ కథనం ప్రకారం, సత్యయుగంలో హిరణ్యాక్షుడు అనే శక్తివంతమైన రాక్షసుడు భూమిని సముద్ర గర్భంలోకి తీసుకెళ్లి దాచిపెట్టాడు. దీంతో సృష్టిలో తీవ్ర అసమతుల్యత ఏర్పడింది. భూమిని రక్షించేందుకు శ్రీమహావిష్ణువు వరాహ రూపంలో అవతరించినట్లు పురాణాలు చెబుతున్నాయి. వరాహ రూపంలో భగవంతుడు సముద్ర గర్భంలోకి వెళ్లి హిరణ్యాక్షుడితో యుద్ధం చేసి అతడిని సంహరించాడు. అనంతరం తన కోరలపై భూమిని ఎత్తి తిరిగి యథాస్థానంలో నిలిపాడు. అందుకే వరాహ స్వామిని భూమికి రక్షకుడిగా కూడా భక్తులు ఆరాధిస్తారు.

వరాహ జయంతి రోజున ఎలా పూజ చేయాలి?

వరాహ జయంతి రోజున భక్తులు తెల్లవారుజామునే నిద్రలేచి స్నానం చేసి శుభ్రమైన వస్త్రాలను ధరించాలి. అనంతరం పూజా స్థలాన్ని శుభ్రం చేసి, శ్రీమహావిష్ణువు వరాహ రూపాన్ని ధ్యానిస్తూ పూజను ప్రారంభించవచ్చు. ముందుగా స్వామివారికి జలాభిషేకం చేసి, పసుపు రంగు పువ్వులు, పండ్లు, దీపం, అగరబత్తులు వంటి పూజా సామగ్రిని సమర్పించవచ్చు. విష్ణుమూర్తికి పసుపు రంగు వస్తువులను సమర్పించడం శుభప్రదంగా భావిస్తారు. పూజ సమయంలో విష్ణు మంత్రాలను జపించడంతో పాటు, తమకు వీలైన వారు విష్ణు సహస్రనామాన్ని పఠించవచ్చు. అనంతరం వరాహ స్వామి అవతార కథను చదవడం లేదా వినడం ఆనవాయితీగా ఉంది. చివరగా స్వామివారికి హారతి ఇచ్చి, కుటుంబ సుఖశాంతులు, ఆరోగ్యం, శ్రేయస్సు కోసం ప్రార్థించవచ్చు.

దక్షిణ భారతదేశంలో వరాహ కలశ పూజ

దక్షిణ భారతదేశంలోని కొన్ని ప్రాంతాల్లో వరాహ జయంతి సందర్భంగా వరాహ కలశాన్ని పూజించే సంప్రదాయం కూడా కనిపిస్తుంది. ఈ పూజలో నీటితో నింపిన కలశంలో వరాహ స్వామి ప్రతిమను ఉంచుతారు. అనంతరం కలశాన్ని మామిడి ఆకులతో అలంకరించి, దాని పైన కొబ్బరికాయను ఉంచుతారు. ఆ తర్వాత సంప్రదాయబద్ధంగా కలశానికి పూజలు నిర్వహిస్తారు. పూజ పూర్తయిన అనంతరం కలశాన్ని బ్రాహ్మణునికి దానం చేయడం ఆనవాయితీగా పాటిస్తారు.

వరాహ జయంతి సందర్భంగా భక్తులు వరాహ స్వామిని స్మరించుకుంటూ ధర్మం, సత్యం, ప్రకృతి పరిరక్షణ వంటి విలువలను గుర్తుచేసుకోవచ్చు. ఈ కథనంలోని పురాణాలు, పూజా విధానాలు, సంప్రదాయాలు మత విశ్వాసాలు, ఆచారాల ఆధారంగా ఇవ్వబడ్డాయి. వీటిని శాస్త్రీయ వాస్తవాలుగా పరిగణించరాదు.

(Disclaimer: ఈ కథనంలోని పురాణాలు, పూజా విధానాలు, సంప్రదాయాలు మత విశ్వాసాలు, ఆచారాల ఆధారంగా ఇవ్వబడ్డాయి. వ్యక్తిగత నిర్ణయాలు తీసుకునేముందు సంబంధిత నిపుణులను సంప్రదించడం మంచిది.)