అమ్మమ్మ కాలం నాటి పులిహోర గోంగూర పచ్చడి.. ఇలా చేసి చూడండి అన్నం అంతా దీంతోనే తినేస్తారు
ఆంధ్రా వంటకాల్లో గోంగూర పచ్చడికి ఒక ప్రత్యేక స్థానం ఉంది. వేడి వేడి అన్నంలో కొద్దిగా నెయ్యి వేసుకుని గోంగూర పచ్చడితో కలిపి తింటే ఆ రుచి అద్భుతంగా ఉంటుంది. మనం ఇంట్లోనే రుచికరమైన, కమ్మని గోంగూర పచ్చడిని సులభమైన పద్ధతిలో ఎలా తయారు చేయాలో వివరంగా తెలుసుకుందాం
ముందుగా మూడు గోంగూర కట్టలను శుభ్రంగా ఆకులు వలిచి, నీళ్లతో ఒకటి రెండు సార్లు కడిగి పక్కన పెట్టుకోవాలి. ఒక పాన్‌లో ఒక టేబుల్ స్పూన్ నూనె వేసి వేడి అయ్యాక, 15 నుంచి 20 ఎండుమిర్చిని లో ఫ్లేమ్‌లో మాడిపోకుండా వేయించుకోవాలి. కారం ఎక్కువ కావాలంటే 20 వరకు, తక్కువ కావాలంటే 15 ఎండుమిర్చి వేసుకోవచ్చు. వేగిన తర్వాత వీటిని ఒక ప్లేట్‌లోకి తీసుకుని పక్కన పెట్టుకోవాలి.
అదే నూనెలో పావు టీస్పూన్ లో సగం మెంతులు వేసి వేయించాలి. మెంతులు వేగిన తర్వాత రెండు టీస్పూన్ల మినపగుళ్ళు, రెండు టీస్పూన్ల ధనియాలు, ఒక టీస్పూన్ జీలకర్ర వేసి లో ఫ్లేమ్‌లో ఎర్రగా అయ్యేంత వరకు వేయించుకోవాలి. ఇవి వేగిన తర్వాత ఒక గిన్నెలోకి తీసుకుని పక్కన పెట్టుకోవాలి.
ఇప్పుడు అదే పాన్‌లో మరొక టేబుల్ స్పూన్ నూనె వేసి వేడెక్కిన తర్వాత, మూడు మధ్యస్థాయి టమాటాలను ముక్కలుగా కట్ చేసి వేసుకోవాలి. టమాటాలను ఒకసారి కలిపి, మూత పెట్టి మధ్యమధ్యలో కలుపుతూ మెత్తగా ఉడికించుకోవాలి. టమాటోలు బాగా ఉడికిన తర్వాత, ముందుగా శుభ్రం చేసి పెట్టుకున్న గోంగూర ఆకులను వేసుకోవాలి. గోంగూర ఆకులు టమాటోలో బాగా కలిసేలా కలుపుతూ, గోంగూర మెత్తబడేంత వరకు ఉడికించాలి.గోంగూర మెత్తబడిన తర్వాత, చిన్న ఉసిరికాయ అంత చింతపండు, పావు టీస్పూన్ పసుపు వేసి అంతా బాగా కలిసేలా కలుపుకోవాలి. మూతపెట్టి లో ఫ్లేమ్‌లో మధ్యమధ్యలో కలుపుతూ గోంగూర పచ్చిదనం పోయి, నూనె పైకి తేలే వరకు ఉడికించుకోవాలి. ఉడికిన తర్వాత స్టవ్ ఆఫ్ చేసి, ఈ మిశ్రమాన్ని పూర్తిగా చల్లారనివ్వాలి. గోంగూర మిశ్రమం చల్లారే లోపు, పచ్చడికి తాలింపు సిద్ధం చేసుకుందాం. ఒక పాన్‌లో రెండు టేబుల్ స్పూన్ల నూనె వేసి వేడి అయ్యాక, పావు టీస్పూన్ ఆవాలు, పావు టీస్పూన్ జీలకర్ర, ఒక టీస్పూన్ మినపగుళ్ళు, ఒక టీస్పూన్ పచ్చిశనగపప్పు వేసి వేయించుకోవాలి.
పోపు వేగిన తర్వాత, ఐదు వెల్లుల్లి రెబ్బలను దంచి వేసుకోవాలి. అలాగే రెండు ఎండుమిర్చిని తుంచి, కొంచెం కరివేపాకు కూడా వేసి వేయించుకోవాలి. ఇవి కూడా వేగిన తర్వాత స్టవ్ ఆఫ్ చేసి, చిటికెడు ఇంగువ వేసి ఒకసారి కలిపి పక్కన పెట్టుకోవాలి. ఇప్పుడు మిక్సీ జార్‌లో పూర్తిగా చల్లారిన వేయించిన ఎండుమిర్చి వేసి కొంచెం బరకగా గ్రైండ్ చేసుకోవాలి. తర్వాత వేయించిన ధనియాలు, మినపగుళ్ళు, జీలకర్ర, రుచికి సరిపడినంత ఉప్పు వేసి మళ్ళీ కొంచెం బరకగా గ్రైండ్ చేసుకోవాలి. దీనిలో 10 వెల్లుల్లి రెబ్బలు వేసి గ్రైండ్ చేయాలి.
ఆ తర్వాత చల్లారిన గోంగూర టమాటో మిశ్రమాన్ని మిక్సీ జార్‌లో వేయించిన కారపొడితో బాగా కలిసేలా కలుపుకోవాలి. కారం ఎక్కువ అవుతుందేమో అనిపిస్తే, ఈ దశలో కారపొడిలో కొంత తీసి పక్కన పెట్టుకోవచ్చు. మిక్సీలో రెండు మూడు సార్లు పల్స్ ఇస్తే సరిపోతుంది. మరీ మెత్తగా కాకుండా, కచ్చాపచ్చాగా రుబ్బుకోవాలి. ఇలా రుబ్బడం వల్ల రోట్లో రుబ్బినట్లు రుచి వస్తుంది. తయారుచేసుకున్న పచ్చడిని రెడీగా ఉన్న తాలింపులోకి వేసుకోవాలి. ఇందులో ఒక గుప్పెడు పెద్ద ముక్కలుగా తరిగిన పచ్చి ఉల్లిపాయలను విడివిడిగా వేసుకోవాలి. ఈ ఉల్లిపాయలు పచ్చడికి మరింత రుచిని ఇస్తాయి. ఉల్లిపాయలు, తాలింపు పచ్చడిలో బాగా కలిసేలా కలుపుకోవాలి. ఒకసారి రుచి చూసి, అవసరమైతే ఉప్పు వేసుకోవాలి. అంతే, కమ్మ కమ్మని గోంగూర పచ్చడి రెడీ.