Pushpa 2: బన్నీ క్రేజ్‌కు ఇది మరో నిదర్శనం.. లేడీస్‌ కోసం ప్రత్యేక షోలు..
అల్లు అర్జున్‌కు ఉన్న ఫ్యాన్ బేస్‌ ఎలాంటిది ప్రత్యేకంగా చెప్పాల్సిన పనిలేదు. పుష్ప 2 సినిమాతో ఒక్కసారిగా నేషనల్ హీరోగా ఎదిగిన బన్నీ.. ఈ సినిమాతో జాతీయ ఉత్తమ నటుడిగా నిలిచారు. ఇదిలా ఉంటే తాజాగా విడుదలవుతోన్న పుష్ప 2 సినిమాతో ఇండస్ట్రీలో మరో కొత్త ఒరవడిని సృష్టించేందుకు సిద్ధమవుతున్నారు..
పుష్ప2 చిత్రంపై ఎలాంటి అంచనాలు ఉన్నాయో ప్రత్యేకంగా చెప్పాల్సిన పనిలేదు. ఈ సినిమాపై దేశ వ్యాప్తంగా అన్ని భాషలకు చెందిన ప్రేక్షకులు వేయి కళ్లతో ఎదురు చూస్తున్నారు. అంచనాలకు అనుగుణంగానే పుష్ప 2 చిత్రాన్ని అత్యంత భారీ బడ్జెట్‌తో ప్రతిష్టాత్మకంగా తెరకెక్కిస్తున్నారు.
బన్నీకి కేరళలో ఉన్న ఫ్యాన్ ఫాలోయింగ్ ఎలాంటి అందరికీ తెలిసిందే. ఈ నేపథ్యంలోనే పుష్ప2 చిత్రాన్ని అక్కడ అత్యంత ప్రతిష్టాత్మకంగా విడుదల చేయడానికి సిద్ధమవుతున్నారు. కేరళలో స్పెషల్‌ షోలు వేయడానికి ప్లాన్‌ చేస్తున్నారు.
అభిమానుల కోసం కేరళలో 55 ఫ్యాన్ షోలను ప్లాన్‌ చేస్తున్నారు. వీటికి సంబంధించి టికెట్ల అమ్మకాలు మొదలుపెట్టేశారు. తెల్లవారు జామున 4 నుంచి 7 మధ్యలో వరసగా స్క్రీనింగ్ కాబోతున్నాయి. అలాగే కొన్ని ప్రత్యేకమైన షోలు కూడా వేస్తున్నారు.
ముఖ్యంగా లేడీ ఫ్యాన్స్‌ కోసం ప్రత్యేక ప్రీమియర్లను వేస్తున్నారు. కేవలం అమ్మాయిలు మాత్రమే ఎంజాయ్ చేసే షోలను వేయనున్నారు. కొట్టరక్కారలో ఉన్న మినర్వా ఎంపైర్ థియేటర్లో ఉదయం 7 గంటలకు గర్ల్స్ ఫాన్స్ షో పేరిట ప్రత్యేకంగా ఒక ఆటను ప్రదర్శించబోతున్నారు.
ఇలాగే రాష్ట్రంలో ఉన్న పలు థియేటర్లలో కూడా ప్లాన్‌ చేస్తున్నారు. ఇదిలా ఉంటే పుష్ప 2 చిత్రం మొత్తం 11,500 స్క్రీన్లలో విడుదల కానుంది. సినీ పరిశ్రమ చరిత్రలో ఇన్ని థియేటర్లలో విడుదలవుతోన్న చిత్రంగా పుష్ప2 సరికొత్త రికార్డు సృష్టించనుంది.