వామ్మో..దానిమ్మ పండు అందరికీ మంచిది కాదా? ఈ 5 రకాల సమస్యలున్నవారు తింటే అంతే సంగతి..!
రోజుకో దానిమ్మ తింటే డాక్టర్తో పనిలేదు అని అంటుంటారు. విటమిన్లు, యాంటీఆక్సిడెంట్లు, ఫైబర్ సమృద్ధిగా ఉండే దానిమ్మ రక్తాన్ని వృద్ధి చేయడంలో, గుండె ఆరోగ్యాన్ని కాపాడటంలో కీలక పాత్ర పోషిస్తుంది. కానీ, ప్రతి నాణేనికి రెండు వైపులా ఉన్నట్లే, అందరికీ దానిమ్మ ఆరోగ్యకరం కాదు. కొన్ని నిర్దిష్ట ఆరోగ్య సమస్యలతో బాధపడేవారు దానిమ్మ పండ్లను లేదా దాని రసాన్ని తీసుకుంటే వారి సమస్యలు మరింత ఎక్కువయ్యే అవకాశం ఉందని వైద్య నిపుణులు స్పష్టం చేస్తున్నారు.
లో బీపీ ఉన్నవారు: దానిమ్మ పండు రక్తపోటును తగ్గించే గుణాన్ని కలిగి ఉంటుంది. అందువల్ల అధిక రక్తపోటు ఉన్నవారికి ఇది చాలా మంచిది. కానీ, ఇప్పటికే లో బీపీ సమస్యతో బాధపడుతున్నవారు లేదా బీపీ తగ్గడానికి మందులు వాడుతున్నవారు దానిమ్మను ఎక్కువగా తింటే రక్తపోటు మరింత పడిపోయి మైకం రావడం లేదా స్పృహ తప్పడం వంటి సమస్యలు తలెత్తుతాయి.
జీర్ణక్రియ, మలబద్ధకం సమస్యలు ఉన్నవారు: దానిమ్మ గింజలను జీర్ణం చేసుకోవడం జీర్ణవ్యవస్థకు కొంత కష్టమైన పని. ముఖ్యంగా దీర్ఘకాలిక మలబద్ధకం, గ్యాస్ లేదా కడుపు ఉబ్బరంతో బాధపడేవారు దానిమ్మను ఎక్కువగా తింటే ఆ సమస్యలు మరింత తీవ్రమవుతాయి.
అసిడిటీ, కడుపులో మంట: దానిమ్మలో సిట్రిక్ యాసిడ్ వంటి సహజ ఆమ్లాలు ఉంటాయి. అసిడిటీ లేదా కడుపులో అల్సర్లు ఉన్నవారు దానిమ్మ తింటే కడుపులో మంట, ఎసిడిక్ రిఫ్లక్స్ లేదా కడుపు నొప్పి పెరిగే ప్రమాదం ఉంది.
అలర్జీ ఉన్నవారు: కొంతమందికి దానిమ్మ పడదు. దానిమ్మ తిన్నప్పుడు చర్మంపై దద్దుర్లు రావడం, దురద, వాపు లేదా శ్వాస తీసుకోవడంలో ఇబ్బంది వంటి అలర్జీ లక్షణాలు కనిపిస్తే వెంటనే దానిమ్మకు దూరంగా ఉండాలి.
కొన్ని రకాల మందులు వాడేవారు: మీరు ఏదైనా దీర్ఘకాలిక వ్యాధికి మందులు వాడుతున్నట్లయితే, ప్రత్యేకించి కాలేయానికి సంబంధించిన మందులు లేదా బ్లడ్ థిన్నర్స్ వాడుతున్నట్లయితే, దానిమ్మలోని రసాయనాలు ఆ మందుల పనితీరుపై ప్రభావం చూపుతాయి. అందువల్ల ఈ పైన పేర్కొన్న సమస్యలు ఉన్నవారు దానిమ్మ పండ్లను తమ ఆహారంలో చేర్చుకునే ముందు తప్పకుండా వైద్యుని సలహా తీసుకోవడం మంచిది.