అరెరే.. రంగు చూసి మోసపోకండి.. కెమికల్ అరటిపండ్లను చిటికెలో ఇలా కనిపెట్టండి..
మార్కెట్‌కు వెళ్లినప్పుడు ఆకర్షణీయమైన పసుపు రంగులో మెరిసిపోయే అరటిపండ్లను చూసి లొట్టలేసుకుంటూ కొంటున్నారా? అయితే ఆగండి.. మీరు కొంటున్న ఆ పండు ఆరోగ్యాన్ని ఇచ్చే అమృతమా లేక రసాయనాలు నింపిన విషమా అనేది ఒక్కసారి ఆలోచించండి. లాభాల కోసం వ్యాపారులు అరటిపండ్లను కాల్షియం కార్బైడ్ వంటి ప్రమాదకరమైన రసాయనాలతో కృత్రిమంగా మగ్గబెట్టి మార్కెట్లలో విక్రయిస్తున్నారు. అందుకే అరటిపండ్లు కొనేటప్పుడు కొన్ని ట్రిక్స్ తప్పక తెలుసుకోవాలి..
కృత్రిమంగా పండించిన అరటిపండ్లను గుర్తించడంలో ప్రధాన సూచిక వాటి రంగు. పండు తొక్క మొత్తం ఎక్కడా చిన్న తేడా కూడా లేకుండా, అత్యంత ప్రకాశవంతమైన నిమ్మ పసుపు రంగులో మెరుస్తూ ఉంటే అది కచ్చితంగా రసాయనాలతో మగ్గించినదే కావచ్చు. సహజంగా పండిన పండ్ల తొక్కపై అక్కడక్కడా చిన్న చిన్న నల్లటి లేదా గోధుమ రంగు మచ్చలు సహజంగా ఏర్పడతాయి. అలా కాకుండా పండుపై ఒక్క మచ్చ కూడా లేకుండా కృత్రిమ కాంతితో కనిపిస్తుంటే వినియోగదారులు వెంటనే అప్రమత్తం కావాలి.
మరొక ముఖ్యమైన తేడా అరటిపండు కాండం (తొడిమ) వద్ద స్పష్టంగా కనిపిస్తుంది. రసాయనాలు వేసినప్పుడు పండు త్వరగా పసుపు రంగులోకి మారుతుంది కానీ దాని తొడిమ మాత్రం పచ్చిగా, ముదురు ఆకుపచ్చ రంగులోనే ఉండిపోతుంది. అదే సహజంగా పండిన పండు అయితే తొడిమ కూడా పసుపు లేదా లేత గోధుమ రంగులోకి మారుతుంది. అలాగే ఒక గెలలోని పండ్లన్నీ ఏకకాలంలో, అసాధారణంగా ఒకే రంగులోకి మారడం కూడా రసాయన ప్రయోగానికి బలమైన నిదర్శనం.
రంగు మాత్రమే కాకుండా పండు లోపలి స్వభావాన్ని పరిశీలించడం ద్వారా కూడా దీన్ని పసిగట్టవచ్చు. రసాయనాలతో పండించిన కాయ బయటకు మెత్తగా, పండినట్లు కనిపించినప్పటికీ.. తొక్క తీసి చూస్తే లోపల గుజ్జు గట్టిగా, సరిగ్గా ఉడకనట్లుగా వగరు రుచితో ఉంటుంది. అంతేకాకుండా సహజ సిద్ధంగా పండిన అరటిపండుకు ఉండే తియ్యనైన సహజ సువాసన ఈ రసాయన పండ్లలో అస్సలు ఉండదు. కొన్నిసార్లు వింతైన రసాయన వాసన కూడా వెదజల్లుతుంది.
ఈ రసాయన అరటిపండ్లు తినడం వల్ల మన ఆరోగ్యంపై తీవ్రమైన దుష్ప్రభావాలను చూపుతుందని వైద్య నిపుణులు హెచ్చరిస్తున్నారు. వీటిని తిన్న వెంటనే కడుపు నొప్పి, వాంతులు, విరేచనాలు వంటి జీర్ణకోశ సమస్యలు తలెత్తుతాయి. దీర్ఘకాలంలో వీటిలోని కలుషిత కార్బైడ్ రసాయనాలు శరీరంలో చేరడం వల్ల తీవ్రమైన తలనొప్పి, కళ్లు తిరగడం, జ్ఞాపకశక్తి తగ్గడం వంటి నాడీ వ్యవస్థ లోపాలు ఏర్పడే ప్రమాదం పొంచి ఉంది.
అందుకే మార్కెట్లో అరటిపండ్లు కొనేటప్పుడు కేవలం బయటి మెరుపును చూసి మోసపోకండి. కొద్దిగా మచ్చలున్నా, సహజమైన సువాసన కలిగి ఉన్న పండ్లనే ఎంచుకోవడం మంచిది. పిల్లలకు, కుటుంబ సభ్యులకు పండ్లను అందించే ముందు వాటిని కనీసం పది నిమిషాల పాటు శుభ్రమైన నీటిలో నానబెట్టి, కడిగిన తర్వాతే తొక్క తీసి తినడం వంటి జాగ్రత్తలు పాటించాలని నిపుణులు సూచిస్తున్నారు.