Christmas Movies: క్రిస్మస్ నెలలో సినిమాల సందడి.. డిసెంబర్లో రానుంది ఎవరు.?
దసరా, దీపావళి సీజన్ అయిపోయిందంటే.. సాధారణంగా అందరి చూపులు సంక్రాంతి మీదే ఉంటాయి. కానీ పొంగల్ కంటే ముందు బాక్సాఫీస్‌ను ఉప్పొంగించే సీజన్ మరోటి ఉంది.. అదే క్రిస్మస్. ఈ సారి ఈ సీజన్‌లో చాలా సినిమాలు వస్తున్నాయి. ముఖ్యంగా డిసెంబర్ లాస్ట్ వీక్ అంతా సినిమాలతో మోగ మోగిపోనుంది. మరి అవేంటి..?
డిసెంబర్‌ను గ్రాండ్‌గా మొదలు పెట్టడానికి అన్ని ఏర్పాట్లు చేస్తున్నారు పుష్పరాజ్. డిసెంబర్ 5న ఈ చిత్రం విడుదల కానుంది. పుష్ప 2 వచ్చిన రెండు వారాల పాటు బన్నీని ఎవరూ డిస్టర్బ్ చేయట్లేదు.
మళ్లీ డిసెంబర్ 20 నుంచి జాతర మొదలు కానుంది. ఆ రోజే సారంగపాణి జాతకం విడుదల కానుంది. ప్రియదర్శి హీరోగా నటిస్తున్న ఈ సినిమాకు ఇంద్రగంటి మోహనకృష్ణ దర్శకుడు. అల్లరి నరేష్ బచ్చల మల్లి రిలీజ్ డేట్ సైతం డిసెంబర్ 20నే రానుంది. సుబ్బు తెరకెక్కిస్తున్న ఈ చిత్రంలో అమృత అయ్యర్ హీరోయిన్‌గా నటిస్తున్నారు.
ఇక నితిన్ రాబిన్ హుడ్ డిసెంబర్ 25న విడుదల కానుంది. క్రిస్మస్ వీకెండ్ క్యాష్ చేసుకోవాలని చూస్తున్నారు నితిన్. ఛలో తర్వాత వెంకీ కుడములతో నితిన్ చేస్తున్న సినిమా ఇది. ఇందులో శ్రీలీల హీరోయిన్.
మన తెలుగు సినిమాలతో పాటు డబ్బింగ్ సినిమాలు కూడా డిసెంబర్ చివరి వారం బాగానే వస్తున్నాయి. అందులో విజయ్ సేతుపతి, వెట్రిమారన్ కాంబోలో వస్తున్న విడుదల 2 ఒకటి. డిసెంబర్ 20నే ఇది రానుంది. విడుదల సినిమాకు మంచి రెస్పాన్స్ రావడంతో.. పార్ట్ 2పై ఆసక్తి బాగానే ఉంది.
డిసెంబర్ లాస్ట్ వీక్‌లో ఎన్ని సినిమాలు వస్తున్నా కూడా.. అందులో అగ్ర తాంబూలం అందుకునే సినిమా మాత్రం ముఫాసా: ది లయన్ కింగ్. వాల్డ్ డిస్నీ నుంచి వస్తున్న ఈ చిత్రంపై అంచనాలు భారీగా ఉన్నాయి. మహేష్ బాబు వాయిస్ ఓవర్‌కు తోడు.. లయన్ కింగ్ బ్రాండ్ ఈ సినిమాకు బలం. మొత్తానికి డిసెంబర్ చివరి వారం అంతా కొత్త సినిమాలతో బాక్సాఫీస్ కళకళలాడనుంది.