SIPలో ఇన్వెస్ట్ చేస్తున్నారా? చిన్న పొరపాటుతో మీకు భారీ నష్టం రావొచ్చు! ఇది తెలుసుకోండి..
మ్యూచువల్ ఫండ్స్ SIPలో పెట్టుబడి పెడుతున్నారా? అనుకోని ఆర్థిక అవసరాలతో SIP వాయిదాలను దాటవేస్తున్నారా? అలా చేయడం వల్ల మీ దీర్ఘకాలిక ఆర్థిక లక్ష్యాలకు తీవ్ర నష్టం వాటిల్లుతుంది. చక్రవడ్డీ (Compounding) శక్తిని కోల్పోవడం వల్ల లక్షల, కోట్ల రూపాయల సంపదను కోల్పోతారు.
ఈ మధ్యకాలంలో చాలా మంది మ్యూచువల్ ఫండ్స్లో ఇన్వెస్ చేస్తున్నారు. ముఖ్యంగా సిస్టమ్యాటిక్ ఇన్వెస్ట్మెంట్ ప్లాన్ (SIP)తో ప్రతి నెలా తమ పెట్టుబడిని కొనసాగిస్తున్నారు. మీరు కూడా SIPలో ఇన్వెస్ట్ చేస్తున్నట్లు అయితే ఈ విషయం కచ్చితంగా తెలుసుకోవాల్సిందే. అదేంటంటే.. చాలా మంది SIPలో ఇన్వెస్ట్మెంట్ను ఎంతో ఉత్సాహంగా మొదలుపెడతారు. కొన్ని నెలలు ఇన్వెస్ట్ చేసిన తర్వాత మధ్యలో అనుకోని ఆర్థిక అవసరాలు రాగానే SIPను స్కిప్ చేస్తారు. ఇలా చేయడం వల్ల కలిగే నష్టం భారీగా ఉంటుంది. దాని గురించి ఇప్పుడు వివరంగా తెలుసుకునే ప్రయత్నం చేద్దాం..
ఉదాహరణకు దీపావళి షాపింగ్, వివాహ ఖర్చులు లేదా కొత్త ఇల్లు కొనడానికి EMIల ఒత్తిడి వంటి సాధారణ కారణాలతో కొన్ని నెలల పాటు రూ.20,000 SIPని ఆపడం చాలా చిన్న విషయంగా అనిపిస్తుంది. కానీ వాస్తవానికి మీ SIP ని ఆపడం గణనీయమైన ప్రభావాన్ని చూపుతుంది. ఈ రోజు ఒక చిన్న అంతరాయం వల్ల 2030 సంవత్సరాలలో రూ.50 లక్షలు, రూ.1 కోటి లేదా అంతకంటే ఎక్కువ నష్టం సంభవించవచ్చు. కారణం కాంపౌండింగ్.
కాంపౌండింగ్ మీ అవసరాల గురించి పట్టించుకోదు. మీరు ఎంత ఇబ్బందుల్లో ఉన్నా కూడా ప్రతి నెలా ఇన్వెస్ట్మెంట్ ఆపకుండా పెడితే దాని పని అది కరెక్ట్గా చేస్తుంది. ప్రతి నెలవారీ SIP ఒక కొత్త పెట్టుబడి. మీరు నెలవారీ వాయిదాను దాటవేస్తే, ఆ డబ్బు 20-30 సంవత్సరాలు పెరిగే అవకాశం లేదు. మీరు 30 సంవత్సరాల పాటు ప్రతి నెలా రూ.20,000 SIP చేసి సగటున 12 శాతం రాబడిని ఆర్జిస్తే, మీరు దాదాపు రూ.7 కోట్ల నిధిని నిర్మించుకోవచ్చు. అయితే మీరు ప్రతి సంవత్సరం కేవలం మూడు నెలలు SIPని ఆపివేస్తే, తుది నిధి దాదాపు రూ.5 కోట్లకు కుదించుకొని పోతుంది. అంటే మీరు రూ.1.52 కోట్ల నష్టపోయినట్టే.
అయితే కొంత మంది ఒక రెండు నెలలు మిస్ చేసిన SIPను, లోటును భర్తీ చేసుకోవడానికి తరువాత ఎక్కువ పెట్టుబడి పెట్టవచ్చని అనుకుంటారు, కానీ అది అంత సులభం కాదు. కోల్పోయిన సమయం భర్తీ చేయలేనిది. మీరు ఎంత త్వరగా, మరింత స్థిరంగా పెట్టుబడి పెడితే మీరు అంత లాభదాయకంగా ఉంటారు.
వివాహాలు, పండుగలు, సామాజిక ఒత్తిడి అన్నీ మీ ఖర్చులను పెంచుతాయి. మీ SIPని కేవలం ఒక నెల పాటు పాజ్ చేయడం సులభం అనిపించవచ్చు, కానీ ఈ అలవాటు దీర్ఘకాలంలో గణనీయమైన నష్టాలకు దారితీస్తుంది.