Moral Story: మోసంతో సాధించినది ఎప్పటికైనా పతనమవుతుంది.. నీలి రంగు నక్క కథ
మోసం చేసి పొందిన గౌరవం తాత్కాలికమే. నిజం ఎప్పటికైనా బయటపడుతుంది. నిజాయితీ, వినయం ఉన్నవారికే శాశ్వతమైన గౌరవం లభిస్తుంది. పిల్లలకు చిన్న తనం నుంచే ఇలాంటి జీవిత విలువలను నీతి కథల ద్వారా చెప్పడం వల్ల వాళ్లు నిజాయితీ కలిగిన మంచి వ్యక్తులుగా ఎదుగుతారు. పూర్తి కథ ఈ కింద చదివేయండి..
Updated on: Aug 02, 2026 | 7:15 PM
అనగనగా ఒక పెద్ద అడవి ఉండేది. ఆ అడవిలో సింహాలు, పులులు, ఏనుగులు, జింకలు, కోతులు, కుందేళ్లు, నెమళ్లు, నక్కలు ఇలా ఎన్నో రకాల జంతువులు సంతోషంగా జీవించేవి. ప్రతి జంతువు తన పనుల్లో నిమగ్నమై ఉండేది. ఆ అడవిలోనే ఒక నక్క కూడా నివసించేది. అది చాలా తెలివైనదే కానీ కొంచెం స్వార్థపరురాలు. ఇతరులను మోసం చేసి లాభపడాలని ఎప్పుడూ ఆలోచించేది. ఒకసారి ఆ అడవిలో చాలా రోజుల పాటు వర్షాలు పడలేదు. చెట్లు ఎండిపోవడం ప్రారంభమయ్యాయి. చిన్న చిన్న జంతువులు కనిపించకపోవడంతో నక్కకు ఆహారం దొరకడం చాలా కష్టమైంది. ఉదయం నుంచి సాయంత్రం వరకు అడవి అంతా తిరిగినా ఒక్క ముక్క ఆహారం కూడా దొరకలేదు. ‘అయ్యో! ఇలా ఇంకో రెండు రోజులు గడిస్తే నేను ఆకలితో చనిపోతాను. ఏదైనా చేసి ఆహారం సంపాదించాలి’ అని నక్క బాధపడింది. చివరికి అడవికి దగ్గరలో ఉన్న గ్రామానికి వెళ్లాలని నిర్ణయించుకుంది.
సాయంత్రం చీకటి పడుతున్న సమయంలో నక్క నెమ్మదిగా గ్రామంలోకి అడుగుపెట్టింది. ఇళ్ల వెనుక పడేసిన ఆహారం దొరుకుతుందేమోనని వీధుల్లో తిరగసాగింది. కానీ దురదృష్టవశాత్తు గ్రామంలోని కుక్కలు నక్కను గమనించాయి. ‘భౌ… భౌ…!’ అంటూ ఒక కుక్క మొరగగానే, మరో పది కుక్కలు కూడా చేరాయి. అవన్నీ కలిసి నక్కను వెంటాడటం ప్రారంభించాయి. ప్రాణభయంతో నక్క ఒక వీధి నుంచి మరో వీధికి పరుగులు తీసింది. ఎంత వేగంగా పరిగెత్తినా కుక్కలు వెంటాడుతూనే ఉన్నాయి. అంతలో ఒక రంగుల పనిముట్ల దుకాణం కనిపించింది. దుకాణం బయట పెద్ద పెద్ద తొట్టెల్లో రంగులు నింపి ఉన్నాయి. తప్పించుకునే మార్గం కనిపించక నక్క ఒక పెద్ద తొట్టెలోకి దూకింది. ఆ తొట్టెలో నీలి రంగు ద్రావణం నిండి ఉంది. నక్క పూర్తిగా అందులో మునిగిపోయింది. కుక్కలు కొంతసేపు వెతికి, అది కనిపించకపోవడంతో వెళ్లిపోయాయి. కొద్దిసేపటి తర్వాత నక్క నెమ్మదిగా బయటకు వచ్చింది. దగ్గరలో ఉన్న నీటిలో తన ప్రతిబింబాన్ని చూసి ఆశ్చర్యంతో నిలిచిపోయింది.
‘అరే! నా శరీరం మొత్తం నీలి రంగులోకి మారిపోయిందే! నన్ను నేనే గుర్తుపట్టలేకపోతున్నాను. ఇక అడవిలో జంతువులు కూడా నన్ను గుర్తించవు’ అని అనుకుంది. అప్పుడే దాని మనసులో ఒక దుర్బుద్ధి పుట్టింది. ‘ఈ రంగును ఉపయోగించి అందరినీ మోసం చేస్తే ఎలా ఉంటుంది? నేను ఈ అడవికి రాజునని చెబితే అందరూ నమ్మేస్తారు’ అని నవ్వుకుంది.
మరుసటి ఉదయం నక్క ధైర్యంగా అడవిలోకి ప్రవేశించింది. నీలి రంగులో మెరిసిపోతున్న ఆ విచిత్రమైన జంతువును చూసి జింకలు భయంతో పారిపోయాయి. కుందేళ్లు పొదల్లో దాక్కున్నాయి. కోతులు చెట్లెక్కాయి. చివరకు ఈ వార్త సింహం దగ్గరకు చేరింది. సింహం, పులి, ఏనుగు, ఎలుగుబంటి సహా అన్ని జంతువులు అక్కడికి వచ్చాయి. కానీ అలాంటి రంగులో ఉన్న జంతువును ఎప్పుడూ చూడకపోవడంతో అవి కూడా అయోమయంలో పడ్డాయి. అప్పుడు నీలి నక్క గంభీరంగా మాట్లాడుతూ.. ‘అడవిలోని జంతువులారా! భయపడవద్దు. నేను సాధారణ జంతువును కాదు. అడవిలో శాంతి నెలకొల్పడానికి దేవుడు నన్ను ప్రత్యేకంగా పంపించాడు. ఇకపై నేను మీ అందరికీ రాజును. నా మాట వినేవారికి ఎలాంటి ప్రమాదం ఉండదు’. జంతువులన్నీ ఒకదానిని ఒకటి చూసుకున్నాయి. ‘ఇంత విచిత్రమైన రూపం ఉన్న జంతువు నిజంగానే దేవుడు పంపి ఉంటాడు’ అని నమ్మాయి. సింహం కూడా వినయంగా తలవంచింది. ఆ రోజు నుంచి నీలి నక్క రాజులా జీవించడం ప్రారంభించింది. ప్రతిరోజూ సింహం వేటాడిన మాంసంలో ఉత్తమ భాగాన్ని దానికి అందించేది. ఏనుగులు నీళ్లు తీసుకొచ్చేవి. కోతులు పండ్లు తెచ్చేవి. నెమళ్లు దాని ముందు నృత్యం చేసేవి. అడవిలోని ప్రతి జంతువు దానిని గౌరవించేది. రోజులు గడుస్తున్న కొద్దీ నక్కలో గర్వం పెరిగింది.
‘ఇక ఈ అడవిలో నాకంటే గొప్పవాడు ఎవరూ లేరు’ అని అనుకుంది. ఒకరోజు అడవిలోని ఇతర నక్కలు దానిని చూడటానికి వచ్చాయి. ‘మేము కూడా మీ జాతివాళ్లమే. మాతో మాట్లాడండి’ అని అడిగాయి. కానీ నీలి నక్క కోపంగా ‘మీరు నా దగ్గరకు రావద్దు. నేను మీలాంటివాడిని కాదు. వెంటనే ఇక్కడి నుంచి వెళ్లిపోండి’ అంటూ వాటిని అవమానించి తరిమేసింది. ఇలా చాలా రోజులు గడిచిపోయాయి. ఒక పౌర్ణమి రాత్రి ఆకాశంలో పెద్ద వర్షం పడింది. ఆ వర్షానికి నక్క నీతి రంగు మొత్తం వెలసిపోయి.. దాని అసలు రూపం బయటపడింది. నక్క మోసం చూసిన సింహం ఒక్కసారిగా ఆశ్చర్యపోయింది.
‘ఇది మనల్ని మోసం చేసింది! ఇది కొత్త జంతువు కాదు. సాధారణ నక్కే!’ అని గర్జించింది. మిగతా జంతువులన్నీ కూడా నిజం గ్రహించాయి. ‘ఇన్నాళ్లు మనల్ని మోసం చేసి రాజులా జీవించిందా!’ అంటూ కోపంతో దాని వెంటపడ్డాయి. భయంతో నీలి నక్క అడవి అంతా పరుగులు తీసింది. చివరికి జంతువుల కోపం నుంచి తప్పించుకోలేక అడవిని విడిచి పారిపోయింది. అప్పుడు దానికి తన తప్పు అర్థమైంది. ‘అబద్ధం చెప్పి, మోసం చేసి సంపాదించిన గౌరవం ఎప్పటికీ నిలవదు. నిజం ఒకరోజు తప్పకుండా బయటపడుతుంది’ అని బాధపడింది. ఆ రోజు నుంచి అడవిలోని జంతువులన్నీ నిజాయితీతో జీవించాలని నిర్ణయించుకున్నాయి.
నీతి
మోసం చేసి పొందిన గౌరవం తాత్కాలికమే. నిజం ఎప్పటికైనా బయటపడుతుంది. నిజాయితీ, వినయం ఉన్నవారికే శాశ్వతమైన గౌరవం లభిస్తుంది. మోసం, అబద్ధం ఎంత తెలివిగా చేసినా ఒకరోజు బయటపడతాయి. నిజాయితీతో సంపాదించిన గౌరవమే శాశ్వతం.
