ఇక నగరంలోకి నీరా స్టాళ్లు..!

ప్రజల ఆరోగ్యమే ధ్యేయంగా ఔషధ గుణాలున్న నీరాను తెస్తామని ఎన్నికల ముందు తెలంగాణ సీఎం కేసీఆర్ హామీ ఇచ్చారు. అందుకు తగ్గట్లుగానే నీరా పాలసీని తెచ్చారు. అంతేకాదు.. ఈ రాష్ట్రంలో నీరా స్టాళ్లను కూడా ఏర్పాటు చేస్తామని ప్రకటించారు. ఇందులో భాగంగా త్వరలో హైదరాబాద్​ నగరంలో ఇవి అందుబాటులోకి రానున్నాయని మంత్రి శ్రీనివాస్ గౌడ్ తెలిపారు. అంతేకాదు నగరం చుట్టూ ఉన్న ఔటర్‌‌‌‌ రింగ్‌‌ రోడ్డుపై కూడా ఈ నీరా స్టాల్స్ ఏర్పాటు చేయబోతున్నట్లు పేర్కొన్నారు. ఇందుకు సంబంధించిన జీవోను కూడా మంత్రి ఇటీవలే విడుదల చేశారు. ఈ నీరాలో ఎన్నో ఔషధ గుణాలు ఉన్నాయని.. దీనిని సేవించడం ద్వారా.. పలు ఆరోగ్య సమస్యలు కూడా దూరమవుతాయన్నారు. అయితే ఈ స్టాళ్లు కేవలం గౌడ కులస్థులకే కేటాయించనున్నారు. ఈ నీరా గీయడం, విక్రయం రెండూ కేవలం గౌడ కులస్తులే చేయాలని ఇంతకు ముందే సీఎం కేసీఆర్ సూచించారు.

అంతేకాదు.. ఈ స్టాళ్ల వద్ద.. ఎలాంటి ఫుడ్ పెట్టాలన్న దానిపై కూడా ఆలోచిస్తున్నారు. అన్ని విక్రయ కేంద్రాల వద్ద కేవలం తెలంగాణ వంటకాలను మాత్రమే ఎంకరేజ్ చేసేందుకు ప్రయత్నిస్తున్నామని మంత్రి శ్రీనివాస్ గౌడ్ తెలిపారు. ఈ ప్రక్రియను దశలవారీగా అన్ని జిల్లాల్లో ఈ నీరా స్టాళ్ల ఏర్పాటుతో పాటు.. ఉత్పత్తి, సరఫరాపై కూడా దృష్టి పెడతామన్నారు.