విహార యాత్ర మిగిల్చిన విషాదం వెనుక..”ఆమె కథ’

Papikondalu Tour Turns Big Tragedy, విహార యాత్ర మిగిల్చిన విషాదం వెనుక..”ఆమె కథ’

పాపికొండలు విహార యాత్ర మిగిల్చిన విషాద గాధలు ఎన్నో ఉన్నాయి. ఒక్కో ఇంటిది ఒక్కో కన్నీటి కథ..దాదాపు తెలుగు రాష్ట్రాల్లోని అన్ని జిల్లాల నుంచి వచ్చిన ప్రయాణికుల జీవితాల్లో పెను చీకట్లను మిగిల్చింది బోటు ప్రమాదం. తల్లిదండ్రులను పొగొట్టుకున్న బిడ్డలు, బిడ్డల్ని కొల్పోయిన తల్లిదండ్రులు ఇలా ఒక్కోక్కరిది ఒక్కో కన్నీటి కథ. అలాంటి కథే..పశ్చిమగోదావరి జిల్లాకు శశి కన్నీటి గాధ.

పశ్చిమగోదావరి జిల్లా మొగల్తూరు మండలం సీతారాంపురం గ్రామానికి చెందిన శశి, చట్లపల్లి గంగాధర్‌.. ఆరేళ్ల క్రితం ప్రేమించి పెళ్లి చేసుకున్నారు. గంగాధర్‌ హైవే కంపెనీలో చిన్న కాంట్రాక్ట్‌ పనులు చేస్తుండగా, శశి ద్వారకాతిరుమల బాలయోగి గురుకుల పాఠశాలలో ప్రవేట్‌ టీచర్‌గా పని చేస్తుంది. వీరికి 14 నెలల బాబు (శ్రవణ్‌) ఉన్నాడు. అయితే, ఇద్దరూ ఉద్యోగ రీత్యా ఇద్దరూ వేరువేరుగా ఉంటూ..ప్రతీ శనివారం భార్య బిడ్డలను చూసేందుకు ద్వారకా తిరుమల వచ్చేవాడు గంగాధర్‌. ఈ క్రమంలోనే సెప్టెంబర్‌ 14న భార్య బిడ్డలను చూసేందుకు వచ్చిన గంగాధర్‌..మర్నాడు గోదావరి టూర్‌కు బయల్దేరాడు. భార్య వద్దని ఎంతగానో వారించింది..వారానికి ఒక్కరోజే ఇంటివద్ద ఉంటారు..అది కూడా ఇలా మీరు టూర్‌కి వెళ్లటం నాకు ఇష్టం లేదని ఆమె అడ్డుపడిందట. అయినా అతను వినలేదు..స్నేహితులతో కలిసి సరదాగా వెళ్లి..సాయంత్రానికి ఇంటికి తిరిగి వస్తానని నచ్చజెప్పాడు. శ్రవణ్‌ జాగ్రత్త.. అంటూ బయల్దేరాడు.
రాజమండ్రి వెళ్లి బోటు ఎక్కిన తర్వాత భార్యతో కొద్దిసేపు ఫోన్‌లో మాట్లాడాడు. ఇప్పుడే బోట్‌ ఎక్కాము..శ్రవణ్‌ జాగ్రత్త అంటూ చెప్పాడు. అదే భర్త చెప్పిన చివరి మాటలని అప్పుడు ఆమె గ్రహించలేకపోయింది. మధ్యాహ్ననికి బోటు గోదావరిలో మునిగిపోయిందనే వార్త చూసి శశి కుప్పకూలింది. భర్త కోసం వెంటనే ఫోన్‌లో ప్రయత్నించిన ఫలితం లేకుండా పోయింది. రోజులు గడుస్తున్నా..గంగాధర్‌ ఆచూకీ లభ్యంకాకపోవడంతో ఆ భార్య కన్నీరు మున్నీరుగా విలపిస్తోంది. తన భర్త క్షేమంగా తిరిగి రావాలని కోరుకుంటూ తన చంటి బిడ్డతో కళ్లలో వత్తులు వేసుకుని ఎదురు చూస్తోంది.

ఇదిలా ఉంటే, శశి, గంగాధర్‌ల ప్రేమ వివాహన్ని ఇంతకాలంగా గంగాధర్‌ కుటుంబ సభ్యులు అంగీకరించలేదట. తన భర్త బోటు ప్రమాదంలో గల్లంతైనా..వారి కుటుంబ సభ్యులు తనను, తన బిడ్డను గుర్తించటం లేదని శశి విలపిస్తోంది. పైగా తానేవరో కూడా వారికి తెలియదన్నట్లుగా వ్యవహరిస్తున్నారని, తనను, తన బిడ్డను ఆదరించాలని వేడుకుంటోంది.

Leave a Reply

Your email address will not be published. Required fields are marked *