
దర్శకధీరుడు ఎస్.ఎస్. రాజమౌళి తెరకెక్కించిన క్లాసిక్ కామెడీ ఎంటర్టైనర్ ‘మర్యాద రామన్న’. 2010లో విడుదలైన ఈ చిత్రంలో సునీల్ హీరోగా, సలోని హీరోయిన్గా నటించారు. నాగినీడు, సుప్రీత్, ప్రభాకర్, బ్రహ్మాజీ, రావు రమేష్ వంటి భారీ తారాగణంతో ఆద్యంతం ఉత్కంఠభరితంగా, వినోదాత్మకంగా సాగిన ఈ సినిమా బాక్సాఫీస్ వద్ద ఘన విజయం సాధించింది. అయితే, ఈ సినిమాలో సునీల్కు నాగినీడు ఇంటికి దారిచూపే ‘ఓబులేశ్’ అనే రాయలసీమ కుర్రాడి పాత్రలో ఓ యువ నటుడు మెరిశాడు. పైన ఉన్న ఫొటోలో సునీల్ పక్కనే కనిపిస్తున్న ఆ కుర్రాడు మరెవరో కాదు.. ప్రస్తుతం టాలీవుడ్లో తనకంటూ ప్రత్యేక గుర్తింపు తెచ్చుకున్న యువ కథానాయకుడు శ్రీ సింహా కోడూరి. ఆస్కార్ విజేత ఎం.ఎం. కీరవాణి తనయుడిగా సినీ నేపథ్యం ఉన్న కుటుంబం నుంచి వచ్చినప్పటికీ, శ్రీ సింహా తన ప్రతిభతోనే మెట్లు ఎక్కుతూ వచ్చాడు.
విక్రమార్కుడు సినిమాలో మార్వాడీ పెళ్లి ఇంట్లో అల్లరి చేసే పిల్లల్లో ఒకరిగా కనిపించిన శ్రీ సింహా, ఆ తర్వాత ఎన్టీఆర్ ‘యమదొంగ’ చిత్రంలో జూనియర్ ఎన్టీఆర్ చిన్నప్పటి పాత్రలో నటించి మెప్పించాడు. ఆ తర్వాతే ‘మర్యాద రామన్న’లో ఓబులేశ్ పాత్రలో తళుక్కుమన్నాడు. అప్పట్లో అతడిని ఎవరూ అంతగా గుర్తుపట్టకపోయినా, ఇప్పుడు ఆ ఫొటో సోషల్ మీడియాలో వైరల్ అవుతోంది. మత్తు వదలరా చిత్రంతో సోలో హీరోగా ఎంట్రీ ఇచ్చి తొలి సినిమాతోనే విమర్శకుల ప్రశంసలతో పాటు మంచి విజయాన్ని అందుకున్నాడు.
ఆ తర్వాత తెల్లవారితే గురువారం, ఉస్తాద్, భాగ్ సాలే వంటి విభిన్నమైన కథలతో ప్రేక్షకులను పలకరించాడు. కెరీర్ పరంగా ‘మత్తు వదలరా 2’తో మరో భారీ బ్లాక్బస్టర్ హిట్ను తన ఖాతాలో వేసుకున్న శ్రీ సింహా, వ్యక్తిగత జీవితంలోనూ కొత్త అధ్యాయాన్ని ప్రారంభించాడు. సీనియర్ నటుడు మురళి మోహన్ మనవరాలు రాగ మాగంటిని వివాహం చేసుకుని, వారి ఇంటి అల్లుడిగా వైవాహిక బంధంలోకి అడుగుపెట్టాడు. త్వరలోనే తిరిగి సినిమాలు మొదలుపెట్టనున్నాడు సింహ.
మరిన్ని సినిమా వార్తల కోసం ఇక్కడ క్లిక్ చేయండి