Rekha: 35 దగ్గరే వయసు ఆగిపోయిందా! ఎవర్‌‌గ్రీన్ బ్యూటీ డైట్ సీక్రెట్‌ ఏంటో తెలుసా?

ఎందుకంటే ఇప్పటికీ ఆమె చర్మం అంత కాంతివంతంగా, ఆమె శరీరం అంత ఫిట్‌గా ఉంటుంది. ఖరీదైన కాస్మెటిక్స్ కంటే మనం తినే ఆహారమే మన అందాన్ని నిర్ణయిస్తుందని ఆమె బలంగా నమ్ముతారు. ముఖ్యంగా రాత్రి పూట ఆమె పాటించే ఒక కఠినమైన నియమమే ఆమెను ఇంత యంగ్‌గా ఉంచుతోంది. ఆ సతత హరిత సుందరి మరెవరో కాదు.. రేఖ. ఆమె అనుసరించే ఫుల్ డే డైట్ రొటీన్ ఏంటో వివరంగా తెలుసుకుందాం..

రేఖ తన అందాన్ని కాపాడుకోవడానికి కొన్ని ప్రాథమిక సూత్రాలను తు.చ తప్పకుండా పాటిస్తారు. కేవలం ఆర్గానిక్, స్వచ్ఛమైన పదార్థాలతో ఇంట్లో వండిన భోజనానికే ఆమె ప్రాధాన్యత ఇస్తారు. నూనెలో వేయించిన పదార్థాలు, జంక్ ఫుడ్ వంటివి ఆమె నిఘంటువులోనే లేవు. ఆమె పాటించే అతి ముఖ్యమైన నియమం ఏమిటంటే.. రాత్రి 7:00 నుంచి 7:30 గంటల లోపే డిన్నర్ పూర్తి చేయడం. ఇలా త్వరగా భోజనం చేయడం వల్ల మెటబాలిజం మెరుగుపడి, ఆహారం త్వరగా జీర్ణమవుతుంది. ఇది బరువు పెరగకుండా ఉండటానికి, చర్మంపై ముడతలు రాకుండా ఉండటానికి ఎంతో సహాయపడుతుంది.

ఉదయం నుంచి రాత్రి వరకు

• ఉదయం 8 నుంచి 9 గంటల మధ్య రేఖ తన అల్పాహారాన్ని తీసుకుంటారు. ఇందులో తాజా పండ్లు అంటే ఆపిల్, బొప్పాయి, బెర్రీస్ వంటివి పెరుగుతో కలిపి తీసుకుంటారు. కొన్నిసార్లు ఇడ్లీ, పోహా వంటి తేలికపాటి దక్షిణాది వంటకాలను ఇష్టపడతారు. దీనికి తోడు ఒక కప్పు గ్రీన్ టీ లేదా హెర్బల్ టీ తాగి తన రోజును ఉత్సాహంగా ప్రారంభిస్తారు.
• మధ్యాహ్నం భోజనానికి ముందు ఆకలి వేయకుండా ఉండటానికి 11 గంటల సమయంలో గుప్పెడు డ్రై ఫ్రూట్స్ తీసుకుంటారు. ముఖ్యంగా ఉప్పు లేని బాదం, వాల్ నట్స్, జీడిపప్పు తింటారు. ఇవి శరీరానికి కావాల్సిన మంచి కొవ్వులను అందిస్తాయి.
• మధ్యాహ్నం 1 నుంచి 2 గంటల మధ్య రేఖ భోజనం పూర్తి చేస్తారు. ఇందులో ఆకుకూరలు (పాలకూర, మెంతికూర), పప్పు, తాజా సలాడ్స్ తప్పనిసరిగా ఉంటాయి. కేవలం రెండు రోటీలు లేదా కొద్దిగా బ్రౌన్ రైస్ మాత్రమే తీసుకుంటారు. కూరల్లో చాలా తక్కువ నూనె వాడుతూ, ప్లాంట్-బేస్డ్ ప్రోటీన్ ఎక్కువగా ఉండేలా జాగ్రత్త పడతారు.
• సాయంత్రం 4 నుంచి 5 గంటల సమయంలో టీ, కాఫీలకు బదులుగా తాజా పండ్ల రసాలు లేదా చల్లటి మజ్జిగ తీసుకుంటారు. ఇది శరీరాన్ని హైడ్రేటెడ్ గా ఉంచడమే కాకుండా చర్మం గ్లో పెరగడానికి తోడ్పడుతుంది.
• ఆమె అందం వెనుక ఉన్న అసలైన మంత్రం ఇదే. రాత్రి 7:30 దాటితే ఆమె అస్సలు భోజనం చేయరు. డిన్నర్ లో కేవలం సూప్స్, సలాడ్స్ లేదా తేలికపాటి పప్పు, ఖిచ్డీ వంటివి తీసుకుంటారు. పడుకోవడానికి కొన్ని గంటల ముందే భోజనం చేయడం వల్ల గాఢ నిద్ర పడుతుందని, దానివల్ల ముఖంపై అలసట కనిపించదని ఆమె చెబుతుంటారు.
• రేఖ రోజుకు కనీసం 8 నుంచి 12 గ్లాసుల నీళ్లు తాగుతారు. శరీరం నుంచి టాక్సిన్స్‌ను బయటకు పంపడానికి, చర్మం తేమగా ఉండటానికి నీళ్లే ప్రధాన కారణం. తీపి పదార్థాలను పూర్తిగా పక్కన పెట్టి, కేవలం పండ్ల ద్వారా వచ్చే సహజమైన షుగర్స్ మాత్రమే తీసుకుంటారు.

రేఖ అందం వెనుక ఎలాంటి మాయాజాలం లేదు, కేవలం పట్టుదల మరియు క్రమశిక్షణ మాత్రమే ఉన్నాయి. యోగా, మెడిటేషన్ చేస్తూ పాజిటివ్ మైండ్‌సెట్ తో ఉండటం కూడా ఆమె ఫిట్‌నెస్‌కు కారణం. “జీవితంలో షార్ట్ కట్స్ ఉండవు, కన్సిస్టెన్సీ మాత్రమే ముఖ్యం” అని చెప్పే రేఖ.. నేటి తరం యువతకు కూడా ఒక గొప్ప ఇన్‌స్పిరేషన్.