ఓటీటీలోకి వచ్చేసిన వెట్రిమారన్‌ ‘విడుదలై పార్ట్‌-1’.. ఆ సీన్లతో కలిపి స్ట్రీమింగ్‌.. ఎందులోనంటే?

Viduthalai Part 1 Movie

ఇప్పటివరకు కమెడియన్‌గానే అలరించిన సూరీ కీలక పాత్రలో నటించిన చిత్రం విడుదలై- పార్ట్‌ 1. విచారణై (విచారణ), అసురన్‌, కాకముట్టై తదితర హిట్‌ సినిమాలతో స్టార్‌ డైరెక్టర్‌గా గుర్తింపు తెచ్చుకున్న వెట్రిమారన్‌ ఈ సినిమాను తెరకెక్కించాడు. మక్కల్‌ సెల్వన్‌ విజయ్‌ సేతుపతి కీలక పాత్రలో నటించాడు. మార్చి 31వ తేదీన థియేటర్లలో విడుదలైన ఈ ఇంటెన్స్‌ క్రైమ్‌ థ్రిల్లర్‌ సూపర్‌హిట్‌గా నిలిచింది. కలెక్షన్లతో పాటు విమర్శకుల ప్రశంసలు పొందింది. సినిమా సబ్జెక్టు బాగా నచ్చడంలో అగ్రనిర్మాత అల్లు అరవింద్‌ ఈ సినిమాను తెలుగులో విడుదల చేశారు. ఏప్రిల్‌15న తెలుగునాట విడుదలైన ఈ సినిమాకు బాగానే కలెక్షన్లు వచ్చాయి. థియేటర్లలో సూపర్‌హిట్‌గా నిలిచిన విడుదలై పార్ట్‌-1 ఇప్పుడు ఓటీటీలోకి వచ్చేసింది. ప్రముఖ ఓటీటీ ప్లాట్​ఫామ్ జీ5లో ఈ సినిమా స్ట్రీమింగ్ అవుతోంది. అయితే ప్రస్తుతం కేవలం తమిళ్‌ వెర్షన్‌ మాత్రమే అందుబాటులో ఉంది. త్వరలోనే తెలుగు వెర్షన్‌ కూడా రిలీజ్‌ కానున్నట్లు సమాచారం.

కాగా విడుదలై పార్ట్‌ 1 ఓటీటీ రిలీజ్ సందర్భంగా ఒక సర్​ప్రైజింగ్ ఇచ్చింది మూవీ టీమ్‌. అదేంటంటే.. ఓటీటీలో డైరెక్టర్స్ కట్ ఎక్స్​టెండెడ్ వెర్షన్​ను స్ట్రీమింగ్ చేయనున్నారు. అంటే, థియేటర్​లో చూడని చాలా సీన్స్​ను ఇప్పుడు ఓటీటీ వెర్షన్‌లో చూడవచ్చన్న మాట. ఈ విషయాన్ని తెలియజేస్తూ జీ5 ఒక ట్వీట్ చేసింది. థియేట్రికల్‌ వెర్షన్‌ సుమారు 2గంటల 16 నిమిషాలు ఉండగా.. ఓటీటీ వెర్షన్‌ మాత్రం 2 గంటల 32 నిమిషాలు ఉందని ఈ సినిమా చూసిన వారు సోషల్‌ మీడియాలో పోస్ట్ చేస్తున్నారు. మరి థియేటర్లలో విడుదలై పార్ట్‌ 1 ను మిస్‌ అయినవారు ఓటీటీలో చూసి ఎంజాయ్‌ చేయండి.

మరిన్ని సినిమా వార్తల కోసం క్లిక్ చేయండి..