Chandrayaan Review: చంద్రయాన్ సినిమా రివ్యూ.. వేణు ఉడుగుల చేసిన ప్రయోగం మెప్పించిందా..?
తెలుగులో ఎప్పటికప్పుడు కొత్త ప్రయోగాలు వస్తూనే ఉంటాయి. అలాంటి ఒక డిఫరెంట్ కాన్సెప్ట్‌తో తెరకెక్కిన సినిమానే 'చంద్రయాన్'. మంచిర్యాల జిల్లా మందమర్రి పల్లెటూరి నేపథ్యంలో చంద్రమండలానికి వెళ్లాలనే ఒక విచిత్రమైన పాయింట్‌తో ఈ చిత్రం రూపొందింది. నీది నాది ఒకే కథ, విరాటపర్వం సినిమాల డైరెక్టర్ వేణు ఊడుగుల ఈ ప్రాజెక్ట్‌కు సమర్పకుడిగా ఉండటంతో అందరి దృష్టి దీనిపై పడింది. మరి ఈ విలేజ్ రాకెట్ ప్రయోగం థియేటర్లలో ఏ స్థాయిలో పేలిందో ఇప్పుడు తెలుసుకుందాం..
మూవీ రివ్యూ: చంద్రయాన్
నటీనటులు: శివకుమార్ ధీకొండ, రవి శివతేజ, స్వప్న ప్రియదర్శిని, వంశీధర్, లోకేష్, బలగం సత్యనారాయణ తదితరులు
ఎడిటింగ్: పుల్లారావు దాసరి
సినిమాటోగ్రఫీ: శ్రీనివాస బి
సంగీతం: హర్ష ప్రవీణ్
సమర్పకుడు: వేణు ఊడుగుల
దర్శకుడు: శ్రీనాథ్ చంద్రశేఖర్
కథ:
మంచిర్యాల దగ్గర్లోని మందమర్రి గ్రామంలో ఉండే నలుగురు కుర్రాళ్ల చుట్టూ ఈ స్టోరీ తిరుగుతుంది. వీళ్లకు చదువు, టెక్నాలజీ గురించి పెద్దగా ఏమీ తెలియదు కానీ, ఎలాగైనా సరే జాబిల్లి పైకి వెళ్లాలని ఒక పెద్ద టార్గెట్ పెట్టుకుంటారు. అందుకోసం తమకు తెలిసిన విచిత్రమైన ఐడియాలతో ఏకంగా ఒక రాకెట్ తయారు చేసే పనిలో పడతారు. ఇళ్లలో ఉండే ప్రెజర్ కుక్కర్లు, మోటార్ సైకిల్ టైర్లు లాంటివి వాడి వీళ్లు చేసే ప్రయోగాలు చూసి ఊరి జనాలు పిచ్చోళ్లు అనుకుని నవ్వుకుంటారు. చుట్టుపక్కల వాళ్లు విమర్శిస్తున్నా పట్టించుకోకుండా ఈ నలుగురు పడ్డ కష్టాలు ఏంటి? ఇంతకీ వీళ్ల మూన్ మిషన్ సక్సెస్ అయిందా లేదా? అనేది సిల్వర్ స్క్రీన్ మీద చూడాల్సిందే.
కథనం:
ఒక మారుమూల పల్లెటూరి కుర్రాళ్లు ఏకంగా స్పేస్‌లోకి వెళ్లాలని కలలు కనడం, దాన్ని ఒక ఫన్ వేలో చెప్పాలనుకున్న పాయింట్ వినడానికి చాలా ఫ్రెష్‌గా అనిపిస్తుంది. దర్శకుడు శ్రీనాథ్ చంద్రశేఖర్ తీసుకున్న ఈ బేసిక్ ఐడియాకు కచ్చితంగా మంచి మార్కులు వేయొచ్చు. కానీ ఈ సింగిల్ పాయింట్‌ను పట్టుకుని రెండు గంటలకు పైగా ప్రేక్షకుడిని కూర్చోబెట్టడంలో ఆయన తడబాటు స్పష్టంగా కనిపిస్తుంది. ఫస్ట్ హాఫ్ అంతా ఆ కుర్రాళ్ల అమాయకత్వం, రాకెట్ కోసం వాళ్లు చేసే పిచ్చి పిచ్చి పనులతో సరదాగా టైమ్ పాస్ అయిపోతుంది. ఊరి జనాలు వీళ్లను చూసి సెటైర్లు వేయడం, వీళ్లు దాన్ని సీరియస్ గా తీసుకుని చేసే తంటాలు భలే నవ్విస్తాయి.
కానీ అసలు సమస్య అంతా సెకండ్ హాఫ్‌లోనే స్టార్ట్ అవుతుంది. ఫస్ట్ హాఫ్‌లో ఉన్న ఆ జోష్ నెమ్మదిగా తగ్గిపోయి, సీన్లు బాగా సాగదీసిన ఫీలింగ్ కలుగుతుంది. ఒక దశలో కథ ముందుకు వెళ్లక రిపీటెడ్‌గా అనిపిస్తుంది. అయితే ఆ నలుగురు స్నేహితుల మధ్య ఉండే బాండింగ్, ఎలాగైనా తమ లక్ష్యాన్ని చేరుకోవాలనే వారి తపన మాత్రం ఆడియన్స్‌కు బాగా కనెక్ట్ అవుతాయి. కాన్సెప్ట్‌కు తగ్గట్టుగా కామెడీ పర్వాలేదనిపించినా, ఎమోషనల్ యాంగిల్ ఇంకాస్త బలంగా రాసుకుని ఉంటే ఈ పల్లెటూరి ప్రయోగం ఇంకో లెవెల్‌లో ఉండేది. ఏదేమైనా రొటీన్ సినిమాలకు భిన్నంగా ఆద్యంతం నవ్వించేలా దర్శకుడు చేసిన ఈ రూరల్ ఎంటర్టైనర్ అటెంప్ట్‌ను కచ్చితంగా మెచ్చుకోవాలి.
నటీనటులు:
ఈ సినిమాలో నటించిన శివకుమార్ ధీకొండ, రవి శివతేజ, స్వప్న ప్రియదర్శిని, వంశీధర్, లోకేష్, బలగం సత్యనారాయణ అందరూ తమ క్యారెక్టర్లలో పరకాయ ప్రవేశం చేశారు. పక్కా తెలంగాణ స్లాంగ్ మాట్లాడుతూ పల్లెటూరి యువకులుగా వాళ్ల గెటప్స్, యాక్టింగ్ చాలా న్యాచురల్‌గా అనిపిస్తాయి. ఎక్కడా కూడా కెమెరా ముందు నటిస్తున్నట్లు కాకుండా, మన పక్కింటి కుర్రాళ్లను చూస్తున్న ఫీలింగ్ కలిగించారు.
టెక్నికల్ టీం:
హర్ష ప్రవీణ్ ఇచ్చిన మ్యూజిక్ సినిమా మూడ్‌కు తగ్గట్టుగా ఓకే అనిపిస్తుంది. శ్రీనివాస బి కెమెరా వర్క్ మందమర్రి గ్రామాన్ని, అక్కడి పచ్చదనాన్ని చాలా రియలిస్టిక్‌గా ఫ్రేమ్స్‌లో బంధించింది. పుల్లారావు దాసరి ఎడిటింగ్ వర్క్ మీద ఇంకాస్త ఫోకస్ పెట్టి సెకండ్ హాఫ్‌లో కొన్ని సీన్లకు కత్తెర వేసుంటే సినిమా మరింత గ్రిప్పింగ్‌గా ఉండేది. సింబా స్క్రీన్ స్టోరీస్ వాళ్లు కథకు ఎంత అవసరమో అంత ఖర్చు పెట్టి క్వాలిటీ ఔట్ పుట్ ఇచ్చారు.
పంచ్ లైన్:
ఓవరాల్ గా చంద్రయాన్.. మంచి ఆలోచన.. విభిన్న ప్రయోగం..!