విద్యార్ధులకు అలర్ట్.. 10వ తరగతి 2027 పబ్లిక్‌ పరీక్షల ఫీజు షెడ్యూల్ విడుదల.. నవంబర్ 16 వరకే ఛాన్స్

హైదరాబాద్, అక్టోబర్ 22: తెలంగాణలో మార్చి-2027లో జరగబోయే SSC మరియు ఒకేషనల్ పబ్లిక్ పరీక్షలకు సంబంధించిన పరీక్షా ఫీజు చెల్లింపు షెడ్యూల్‌ను ప్రభుత్వ పరీక్షల విభాగం డైరెక్టర్ అధికారికంగా విడుదల చేశారు. రెగ్యులర్ విద్యార్థులతో పాటు గతంలో ఉత్తీర్ణులు కాని అభ్యర్థులు ఈ ప్రకటన ప్రకారం తమ పరీక్షల ఫీజును నిర్ణీత గడువులోగా చెల్లించాల్సి ఉంటుందని అధికారులు స్పష్టం చేశారు. హెడ్ మాస్టర్లు మరియు ప్రిన్సిపాళ్లు తమ పాఠశాలల్లోని విద్యార్థులందరికీ ఈ సమయాన్ని తక్షణమే తెలియజేసి, అవసరమైన చర్యలు తీసుకోవాలని డైరెక్టరేట్ కార్యాలయం ఆదేశాలు జారీ చేసింది.

పరీక్షా ఫీజును ఎటువంటి ఆలస్య రుసుము లేకుండా అక్టోబర్ 30, 2026 నుండి నవంబర్ 16, 2026 వరకు సంబంధిత పాఠశాల ప్రధానోపాధ్యాయులకు చెల్లించవచ్చు. రూ. 50 ఆలస్య రుసుముతో నవంబర్ 18 నుండి డిసెంబర్ 01 వరకు చెల్లించే వెసులుబాటు కల్పించారు. అలాగే రూ. 200 ఆలస్య రుసుముతో డిసెంబర్ 03 నుండి డిసెంబర్ 14 వరకు, రూ. 500 గరిష్ట ఆలస్య రుసుముతో డిసెంబర్ 16 నుండి డిసెంబర్ 28, 2026 వరకు ఫీజు చెల్లించవచ్చని తెలిపింది. ఫీజు వివరాలను పరిశీలిస్తే.. అన్ని సబ్జెక్టులకు కలిపి ఫీజు రూ. 125 కాగా, మూడు సబ్జెక్టుల వరకు అయితే రూ. 110గా నిర్ణయించారు. ఒకేషనల్ విద్యార్థులు రెగ్యులర్ ఫీజు రూ. 125కి అదనంగా మరో రూ. 60 చెల్లించాల్సి ఉంటుంది. ప్రభుత్వ నిబంధనల ప్రకారం SC, ST, BC విద్యార్థులకు పరీక్షా ఫీజు నుండి మినహాయింపు ఉంటుంది.

ఫీజు చెల్లింపు తేదీలను ఎట్టి పరిస్థితుల్లోనూ పొడిగించబోమని అధికారులు ఖరాకండిగా స్పష్టం చేశారు. ఫీజుల చెల్లింపు కేవలం అధికారిక వెబ్‌సైట్ లో స్కూల్ లాగిన్ ద్వారా సైబర్ ట్రెజరీ విధానంలో మాత్రమే జరపాలి. ఎలాంటి పోర్టల్ చలాన్లు లేదా మ్యాన్యువల్ బ్యాంక్ చలాన్లను స్వీకరించబోమని హెచ్చరించారు. విద్యార్థుల సమాచారాన్ని నిర్ణీత గడువులోగా DEO మరియు DGEలకు ఆన్‌లైన్ ద్వారా హెచ్‌ఎంలు సమర్పించాల్సి ఉంటుంది. చివరి నిమిషంలో ఇబ్బందులు పడకుండా ముందే ప్రక్రియ పూర్తి చేయాలని కోరారు. మరిన్ని వివరాలకు పాఠశాలల ప్రధానోపాధ్యాయులను సంప్రదించవచ్చు లేదా అధికారిక వెబ్‌సైట్‌ను సందర్శించవచ్చు.