తెలంగాణ ANM అభ్యర్థులకు కీలక అప్డేట్.. మెరిట్ లిస్ట్ వచ్చేసింది!
తెలంగాణలో మల్టీ పర్పస్ హెల్త్ అసిస్టెంట్ (ఫిమేల్) పోస్టుల భర్తీ ప్రక్రియలో కీలక ముందడుగు పడింది. మొత్తం 1,931 పోస్టుల నియామకాలకు సంబంధించి మెడికల్ అండ్ హెల్త్ సర్వీసెస్ రిక్రూట్మెంట్ బోర్డు (MHSRB) తొలి ప్రొవిజనల్ మెరిట్ లిస్ట్ను విడుదల చేసింది. అభ్యర్థులు రాత పరీక్షలో సాధించిన మార్కులు, కాంట్రాక్ట్ మరియు అవుట్సోర్సింగ్ సేవలకు సంబంధించిన వెయిటేజ్ మార్కులను పరిగణనలోకి తీసుకుని ఈ జాబితాను రూపొందించారు..
Updated on: Jul 10, 2026 | 9:36 PM
హైదరాబాద్, జులై 10: తెలంగాణ మల్టీ పర్పస్ హెల్త్ అసిస్టెంట్ (ANM) పోస్టుల తొలి ప్రొవిజనల్ మెరిట్ లిస్ట్ విడుదలైంది. మొత్తం 1,931 మల్టీ పర్పస్ హెల్త్ అసిస్టెంట్ (ఫిమేల్) పోస్టుల భర్తీకి సంబంధించి తొలి ప్రొవిజనల్ మెరిట్ జాబితాను మెడికల్ అండ్ హెల్త్ సర్వీసెస్ రిక్రూట్మెంట్ బోర్డు (MHSRB) శుక్రవారం విడుదల చేసింది. మే 14న అభ్యర్థులు పరీక్షలో పొందిన మార్కులు, కాంట్రాక్ట్/అవుట్సోర్సింగ్ సేవలకు సంబంధించిన వెయిటేజ్ మార్కులతో కూడిన ప్రొవిజనల్ జాబితాను విడుదల చేసి, మే 18 నుంచి మే 22, 2026 వరకు అభ్యంతరాలను స్వీకరించారు. ఈ అభ్యంతరాలను పరిశీలించి, పరిష్కరించిన బోర్డు.. శుక్రవారం తొలి ప్రొవిజనల్ మెరిట్ లిస్ట్ను విడుదల చేసింది. నియామకాల్లో పారదర్శకత కోసం మరోసారి అభ్యంతరాలు స్వీకరించాలని బోర్డు నిర్ణయించింది.
ఈ మేరకు ప్రొవిజనల్ మెరిట్ లిస్ట్పై అభ్యంతరాలు ఉంటే జూలై 13 నుంచి జూలై 15వ తేదీ సాయంత్రం 5 గంటల వరకు MHSRB వెబ్సైట్లో తమ లాగిన్ ద్వారా ఆన్లైన్లోనమోదు చేసుకోవచ్చని బోర్డు వెల్లడించింది. అభ్యంతరాలు ఒక్కసారి మాత్రమే నమోదు చేసే అవకాశం ఉండటంతో అభ్యర్థులు జాగ్రత్తగా వ్యవహరించాలని సూచించింది.
