కల కోసం కోట్ల జీతం కాదనీ.. తొలి ప్రయత్నంలోనే UPSC సివిల్స్‌లో 24వ ర్యాంక్ కొట్టి IAS అయ్యాడు!
ఐఐటీ బాంబేలో ఎలక్ట్రికల్‌ ఇంజనీరింగ్‌.. దక్షిణ కొరియాలోని శాంసంగ్‌ ఎలక్ట్రానిక్స్‌లో ఉద్యోగం.. అయినా చిన్ననాటి లక్ష్యాన్ని వదులుకోలేదు. సమాజానికి సేవ చేయాలనే ఆకాంక్షతో ఉన్నతమైన ఉద్యోగాన్ని వదిలి సివిల్స్‌ వైపు అడుగులు వేసి, తొలి ప్రయత్నంలోనే 24వ ర్యాంక్ సాధించారు ఇమ్మడి పృధ్వీ తేజ్‌. తన వ్యక్తిగత ప్రయాణం, సివిల్స్‌ ప్రిపరేషన్‌, ఇంటర్వ్యూ అనుభవాలను ఓ ఇంటర్వ్యూ కార్యక్రమంలో పంచుకున్నారు..
పృధ్వీ స్వస్థలం పశ్చిమ గోదావరి జిల్లాలోని ద్వారకా తిరుమల. తండ్రి అక్కడే జ్యువెలరీ షాప్‌ నిర్వహిస్తుండగా.. తల్లి గృహిణి. ఏడో తరగతి వరకు స్వగ్రామంలోనే చదువుకున్న పృధ్వీ.. ఆ తర్వాత గుడివాడలోని విశ్వభారతి పాఠశాలలో విద్యాభ్యాసం కొనసాగించారు. అనంతరం చైతన్య కళాశాలలో ఇంటర్మీడియట్‌ పూర్తి చేశారు. 2011-15 బ్యాచ్‌లో ఐఐటీ బాంబేలో ఎలక్ట్రికల్‌ ఇంజనీరింగ్‌ పూర్తి చేశారు. విద్యార్థి దశలోనే మంచి ప్రతిభ కనబరిచిన ఆయన.. ఇంజనీరింగ్‌ అనంతరం తన కెరీర్‌ను అంతర్జాతీయ స్థాయిలో ప్రారంభించారు.
శాంసంగ్‌లో ఉద్యోగం.. అయినా సివిల్స్‌ లక్ష్యం
2015లో పృధ్వీకి దక్షిణ కొరియాలోని ప్రముఖ సంస్థ శాంసంగ్‌ ఎలక్ట్రానిక్స్‌లో ఉద్యోగం లభించింది. సియోల్‌లోని సంస్థ ప్రధాన కార్యాలయంలో సుమారు ఏడాదిన్నరపాటు పనిచేశారు. మంచి జీతం, అంతర్జాతీయ స్థాయి ఉద్యోగం ఉన్నప్పటికీ.. చిన్నప్పటి నుంచి ఉన్న సివిల్‌ సర్వీసెస్‌ లక్ష్యం మాత్రం ఆయనను వెంటాడుతూనే ఉంది. చిన్ననాటి నుంచే ఐఏఎస్‌ అధికారి కావాలనేది తన కోరిక అని పృధ్వీ తెలిపారు. ఐఐటీ-జేఈఈలో మంచి ర్యాంక్ సాధించిన సమయంలోనూ మీడియా అడిగిన ప్రశ్నలకు భవిష్యత్తులో ఐఏఎస్‌ కావాలనుకుంటున్నట్లు చెప్పేవాడినని గుర్తుచేసుకున్నారు. అయితే ఇంజనీరింగ్‌ పూర్తయ్యాక వచ్చిన మంచి అవకాశాన్ని ఉపయోగించుకోవాలనే ఉద్దేశంతో శాంసంగ్‌లో చేరానని చెప్పారు. సుమారు ఏడాదిన్నర పనిచేసిన తర్వాత తనకు ఏ రంగంలో పనిచేయడం ఎక్కువ సంతృప్తినిస్తుందో స్పష్టత వచ్చిందన్నారు. ప్రజలతో నేరుగా పనిచేయడం, గ్రామీణ ప్రాంతాల్లో గ్రాస్‌రూట్‌ స్థాయిలో సేవ చేయడం, బలహీన వర్గాల జీవితాల్లో మార్పు తీసుకురావడం తనకు ఎక్కువగా నచ్చుతుందని పృధ్వీ వివరించారు. దీంతో 2016 డిసెంబర్‌లో ఉద్యోగానికి రాజీనామా చేసి సివిల్స్‌ ప్రిపరేషన్‌ ప్రారంభించారు.
రెండు నెలల క్రాష్‌ కోర్సు.. మిగతాదంతా సొంతంగానే
ఉన్నతమైన ఉద్యోగాన్ని వదిలి సివిల్స్‌ వైపు రావాలనే నిర్ణయానికి తల్లిదండ్రులు పూర్తిగా మద్దతు ఇచ్చారని పృధ్వీ తెలిపారు. తాను ఏ నిర్ణయం తీసుకున్నా తల్లిదండ్రులు ఎప్పుడూ అడ్డుకోలేదన్నారు. ఉద్యోగం వదిలే సమయంలోనూ అదే స్వేచ్ఛను ఇచ్చారని చెప్పారు. కొరియాలో పనిచేస్తున్న సమయంలో ఏడాది తర్వాత తిరిగి వస్తానని చెప్పినప్పుడు కూడా.. ఇప్పుడే రావాలనుకుంటే వచ్చేయవచ్చని తల్లిదండ్రులు చెప్పారని పృధ్వీ గుర్తుచేసుకున్నారు. తన నిర్ణయానికి కుటుంబం అందించిన మద్దతు ఎంతో ముఖ్యమైనదని తెలిపారు. సివిల్స్‌ ప్రిపరేషన్‌కు తనకు ఎక్కువ సమయం లేకపోవడంతో ఢిల్లీలోని విజన్‌ ఐఏఎస్‌లో రెండు నెలల క్రాష్‌ కోర్సు మాత్రమే తీసుకున్నానని పృధ్వీ తెలిపారు. మిగిలిన ప్రిపరేషన్‌ అంతా దాదాపు స్వయంగా చేసుకున్నానన్నారు. ఢిల్లీలో స్నేహితులతో కలిసి చదువుకుంటూ.. సీనియర్ల నుంచి మార్గదర్శనం తీసుకున్నానని చెప్పారు. తాను రాసిన సమాధానాలను సీనియర్లకు చూపించి వారి ఫీడ్‌బ్యాక్‌ తీసుకోవడం ద్వారా తప్పులను సరిదిద్దుకున్నానన్నారు. సొంతంగా చదివినా సరైన గైడెన్స్‌, ఫీడ్‌బ్యాక్‌ ఉంటే ప్రిపరేషన్‌ సమర్థంగా సాగుతుందని తన అనుభవం ద్వారా పృధ్వీ తెలిపారు.
గణితమే ఆప్షనల్‌.. అదే బలంగా మారింది
సివిల్స్‌ పరీక్షలో పృధ్వీ గణితాన్ని ఆప్షనల్‌ సబ్జెక్ట్‌గా ఎంచుకున్నారు. సాధారణంగా చాలామంది గణితాన్ని కఠినమైన ఆప్షనల్‌గా భావిస్తారని.. అయితే చిన్నప్పటి నుంచే తనకు గణితంపై ఆసక్తి ఉండటంతో దానినే ఎంచుకున్నానని చెప్పారు. కళాశాల సమయంలోనూ ఆసక్తితో అదనపు గణిత కోర్సులు చేసినట్లు తెలిపారు. తనకు బలమైన సబ్జెక్ట్‌ కావడంతో గణితాన్ని ఎంచుకోవడం ప్రిపరేషన్‌లో ప్రయోజనకరంగా మారిందన్నారు. పరీక్షలోనూ గణితంలో మంచి మార్కులు రావడం తన ర్యాంకుకు ఉపయోగపడిందని వివరించారు. అన్నింటికంటే ముఖ్యంగా ఇది తన తొలి ప్రయత్నమే కావడం విశేషం. మొదటి ప్రయత్నంలోనే 24వ ర్యాంక్ సాధించారు. సివిల్స్‌ పర్సనాలిటీ టెస్ట్‌లో తన ఉద్యోగం, నిర్ణయాలపైనే మొదట ఎక్కువగా ప్రశ్నలు వచ్చాయని పృధ్వీ తెలిపారు. శాంసంగ్‌లో మంచి ఉద్యోగం చేస్తున్నప్పటికీ దాన్ని ఎందుకు వదిలి భారత్‌కు తిరిగి వచ్చారనే అంశంపై ప్రశ్నలు అడిగారన్నారు. అక్కడి ఉద్యోగంలో ఏమైనా సమస్యలు ఎదురయ్యాయా? భాషా సమస్య కారణంగానే తిరిగి వచ్చారా? వంటి ప్రశ్నలతో తన నిర్ణయాన్ని లోతుగా పరిశీలించారని చెప్పారు. అదే సమయంలో ఆంధ్రప్రదేశ్‌ రాష్ట్ర విభజన, సమకాలీన అంశాలు, విద్యార్థులపై ఒత్తిడి వంటి అంశాలపైనా ప్రశ్నలు ఎదురయ్యాయని తెలిపారు.
ఇంటర్వ్యూలో అంతర్జాతీయ సంబంధాలు, అణు నిరాయుధీకరణ వంటి అంశాలపై కూడా ప్రశ్నలు ఎదురయ్యాయని పృధ్వీ తెలిపారు. దేశాలు అణ్వాయుధాలను తగ్గించాలని చెబుతూనే వాటి సామర్థ్యాన్ని ఎందుకు పెంచుకుంటున్నాయనే అంశంపై ప్రశ్నించారని చెప్పారు. అలాగే ‘యూథనేషియా (దయా మరణం)’పై తన అభిప్రాయాన్ని అడిగారని తెలిపారు. ‘ఉడాన్‌’ పథకంపై కూడా తార్కిక ప్రశ్నలు ఎదురయ్యాయని చెప్పారు. విమాన ప్రయాణాలు ఎక్కువగా సంపన్నులు చేస్తే.. వారికి ప్రభుత్వం సబ్సిడీ ఎందుకు ఇవ్వాలనే కోణంలో ప్రశ్న అడిగారని వివరించారు. తన ఇంటర్వ్యూ మొత్తం ఒక నిర్దిష్ట సమాధానం చెప్పించడం కంటే.. ఒక అంశంపై అభ్యర్థి ఎలా ఆలోచిస్తాడు, తన అభిప్రాయాన్ని ఎలా సమర్థించగలడు అనే విషయాలను పరీక్షించేలా సాగిందని పృధ్వీ వివరించారు. ద్వారకా తిరుమలలో సాధారణ కుటుంబం నుంచి వచ్చిన పృధ్వీ.. ఐఐటీ బాంబేలో విద్యాభ్యాసం పూర్తి చేసి, అంతర్జాతీయ సంస్థలో ఉద్యోగం సాధించారు. అయినప్పటికీ చిన్ననాటి లక్ష్యాన్ని వదులుకోకుండా సివిల్స్‌ వైపు అడుగులు వేసి తొలి ప్రయత్నంలోనే 24వ ర్యాంక్ సాధించారు.
లక్ష్యంపై స్పష్టత, తనకు బలమైన సబ్జెక్ట్‌ను ఎంచుకోవడం, స్వీయ అధ్యయనం, సరైన మార్గదర్శనం, సమాధానాలపై ఫీడ్‌బ్యాక్‌ తీసుకోవడం తన ప్రిపరేషన్‌లో కీలకంగా నిలిచాయని ఆయన అనుభవం చెబుతోంది. మంచి ఉద్యోగం ఉన్నప్పటికీ తనకు నచ్చిన లక్ష్యం వైపు అడుగు వేసిన పృధ్వీ ప్రయాణం సివిల్స్‌ aspirantsకు ప్రేరణగా నిలుస్తోంది.