క్రెడిట్‌ కార్డు వాడుతున్నారా? ఈ హిడెన్‌ ఛార్జీల గురించి తప్పక తెలుసుకోండి

డిజిటల్‌ చెల్లింపులు వేగంగా పెరుగుతున్న ప్రస్తుత కాలంలో క్రెడిట్‌ కార్డులు ప్రజల దైనందిన జీవితంలో కీలక భాగంగా మారాయి. షాపింగ్‌, ఆన్‌లైన్‌ ట్రాన్సాక్షన్లు, ప్రయాణాలు, అత్యవసర ఖర్చుల కోసం చాలామంది క్రెడిట్‌ కార్డులను వినియోగిస్తున్నారు. నగదు రహిత చెల్లింపులతో పాటు క్యాష్‌బ్యాక్‌లు, రివార్డ్‌ పాయింట్లు, ప్రత్యేక ఆఫర్లు లభించడం వల్ల వీటి వినియోగం మరింత పెరుగుతోంది. అయితే సరైన అవగాహన లేకుండా వాడితే క్రెడిట్‌ కార్డులు భారీ ఆర్థిక భారంగా మారే ప్రమాదం ఉందని నిపుణులు హెచ్చరిస్తున్నారు. క్రెడిట్‌ కార్డులపై సాధారణంగా విధించే ప్రధాన ఛార్జీలలో వార్షిక నిర్వహణ రుసుము ఒకటి. బ్యాంకు, కార్డు రకాన్ని బట్టి ఈ ఫీజు రూ.250 నుంచి రూ.50 వేల వరకు ఉండవచ్చు.

ప్రారంభంలో ఉచితంగా ఇచ్చే కార్డులపై కూడా కొంతకాలం తర్వాత వార్షిక ఫీజులు విధించే అవకాశం ఉంటుంది. అందువల్ల కార్డు తీసుకునే ముందు నిబంధనలు పూర్తిగా తెలుసుకోవాలని ఆర్థిక నిపుణులు సూచిస్తున్నారు. కార్డు జారీ సమయంలో వసూలు చేసే జాయినింగ్‌ ఫీజు కూడా మరో ముఖ్యమైన అంశం. ప్రీమియం కార్డులపై అధిక ఫీజులు ఉండగా, వాటికి బదులుగా ప్రయాణ ప్రయోజనాలు, లాంజ్‌ యాక్సెస్‌, రివార్డ్‌ పాయింట్లు వంటి సదుపాయాలు అందిస్తారు. అయితే ఆ ప్రయోజనాలు నిజంగా అవసరమా లేదా అన్నది వినియోగదారులు ముందుగానే అంచనా వేసుకోవాలి.

క్రెడిట్‌ కార్డు ద్వారా ATMల్లో నగదు తీసుకోవడం అత్యంత ఖరీదైన సేవలలో ఒకటిగా భావిస్తున్నారు. బ్యాంకులు విత్‌డ్రా చేసిన మొత్తంపై 2.5 శాతం వరకు ఛార్జీలు విధిస్తాయి. అంతేకాకుండా నగదు తీసుకున్న మొదటి రోజు నుంచే వడ్డీ లెక్కించడం ప్రారంభమవుతుంది. అందువల్ల అత్యవసర పరిస్థితుల్లో తప్ప ఈ సౌకర్యాన్ని వినియోగించవద్దని నిపుణులు సూచిస్తున్నారు. క్రెడిట్‌ కార్డు బిల్లులను సమయానికి చెల్లించకపోతే ఆలస్య రుసుములతో పాటు అధిక వడ్డీ కూడా పడుతుంది. భారతదేశంలో అనేక కార్డులపై వార్షిక వడ్డీ రేట్లు 33 నుంచి 42 శాతం వరకు ఉండగా, కొన్ని సందర్భాల్లో 50 శాతం దాటే అవకాశం ఉంది. దీంతో చిన్న మొత్తం కూడా క్రమంగా పెద్ద అప్పుగా మారుతుంది. ఆర్థిక నిపుణుల అభిప్రాయం ప్రకారం ప్రతి నెల పూర్తి బిల్లును గడువులోగా చెల్లించడం, అవసరానికి మించి ఖర్చు చేయకపోవడం, ఛార్జీలను ముందుగానే అర్థం చేసుకోవడం ద్వారా మాత్రమే క్రెడిట్‌ కార్డులను సురక్షితంగా వినియోగించవచ్చు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి