‘అర్జున్ రెడ్డి’ జోడి రిపీట్..?

రెండు సంవత్సరాల క్రితం వచ్చిన ‘అర్జున్ రెడ్డి’ టాలీవుడ్‌లో ఎంతటి సంచలనం సృష్టించిందో అందరికీ తెలిసిందే. ముఖ్యంగా విజయ్ దేవరకొండ కెరీర్‌ను మలుపుతిప్పిన ఈ చిత్రం.. హీరోయిన్ షాలిని పాండేకు కూడా మంచి పేరును తీసుకొచ్చింది. అంతేకాదు ఈ జోడి బెస్ట్ పెయిర్‌గా పలువురి ప్రశంసలు అందుకుంది. కాగా తాజా సమాచారం ప్రకారం దాదాపుగా రెండు సంవత్సరాల తరువాత ఈ జోడీ రెండోసారి జతకట్టబోతోంది.

విజయ్ దేవరకొండ హీరోగా ఆనంద్ అన్నామలై ఓ చిత్రాన్ని తెరకెక్కిస్తున్నాడు. తెలుగు, తమిళం, మలయాళంలో తెరకెక్కబోతున్న ఈ చిత్రాన్ని మైత్రీ మూవీ మేకర్స్ నిర్మించనున్నారు. క్రీడా నేపథ్యంలో సాగనున్న ఈ మూవీలో హీరోయిన్‌గా షాలిని పాండేను ఎంపిక చేశారని తెలుస్తోంది. దీనిపై త్వరలోనే అధికారిక ప్రకటన కూడా రానున్నట్లు సమాచారం. కాగా ప్రస్తుతం విజయ్ దేవరకొండ, క్రాంతి మాధవ్ దర్శకత్వంలో ఓ చిత్రంలో నటిస్తోన్న విషయం తెలిసిందే.