కింగ్ నాగ్ హోస్టింగ్ కు… టీఆర్పీ రేటింగ్స్ సలామ్!

అగ్ర కథానాయకుడు నాగార్జున వ్యాఖ్యాతగా వ్యవహరిస్తున్న రియాల్టీ షో ‘బిగ్‌బాస్‌3’. ఈ షో బుల్లితెర ప్రేక్షకులను విపరీతంగా అలరిస్తోంది. వ్యాఖ్యాతగా నాగార్జున తనదైన టైమింగ్‌, పంచ్‌ డైలాగ్‌లతో మెప్పిస్తున్నారు. కాగా, తొలి వారం అత్యధికమంది ఈ షోను చూడటానికి ఆసక్తి చూపినట్లు ‘స్టార్‌ మా’ ప్రకటించింది. ఇందుకు సంబంధించిన రేటింగ్స్‌ వివరాలను నాగార్జున అభిమానులతో పంచుకున్నారు. సుమారు 4.5 కోట్లమంది ప్రేక్షకులు బిగ్‌బాస్‌కు చూసేందుకు మొగ్గు చూపారట. మొదటివారం టీవీ వీక్షకుల్లో దాదాపు 60శాతం మంది బిగ్‌బాస్‌3ని వీక్షించారట. #bigbosstelugu3 ఇండియా ట్రెండింగ్స్‌లో టాప్‌లో ఉండగా, మిలియన్‌కు పైగా ఎంగేజ్‌మెంట్లు వచ్చాయట. ఈ సందర్భంగా నాగార్జున ‘బిగ్‌బాస్‌3’ ప్రేక్షకులకు కృతజ్ఞతలు తెలిపారు. తొలివారం నటి హేమ ఎలిమినేట్‌ కాగా, ఆ వెంటనే వైల్డ్‌కార్డ్‌ ఎంట్రీ ద్వారా ట్రాన్స్‌జెండర్‌ తమన్నా సింహాద్రి బిగ్‌బాస్‌ హౌస్‌లోకి వచ్చిన సంగతి విదితమే.