Numerology: ఈ తేదీల్లో పుట్టినవారు కూల్‌గా కనిపిస్తారు.. అయితే ప్రశ్నించడంలోనూ ముందుంటారు!

Numerology: పుట్టిన తేదీ ఆధారంగా వ్యక్తి స్వభావం, ఆలోచనా విధానం, ప్రవర్తన గురించి తెలుసుకోవచ్చని సంఖ్యాశాస్త్రం చెబుతోంది. సంఖ్యాశాస్త్రంలో 1 నుంచి 9 వరకు ఉన్న ప్రతి మూలాంకానికి ప్రత్యేక లక్షణాలు ఉంటాయని నిపుణులు చెబుతారు. ముఖ్యంగా మూలాంకం 1, 7, 9 ఉన్నవారిలో ధైర్యం, ఆత్మవిశ్వాసం, స్వతంత్ర ఆలోచన వంటి లక్షణాలు ఎక్కువగా కనిపిస్తాయని నమ్మకం.

మూలాంకం అంటే ఏమిటి?

మీరు ఏ తేదీన జన్మించారో ఆ తేదీలోని అంకెలను కలిపి ఒక అంకెకు తీసుకువస్తే వచ్చే సంఖ్యను మూలాంకంగా పరిగణిస్తారు. ఉదాహరణకు 19వ తేదీన జన్మించిన వారి మూలాంకం 1+9=10, 1+0=1. అలాగే 25వ తేదీన జన్మించిన వారి మూలాంకం 2+5=7.

మూలాంకం 1

1, 10, 19, 28 తేదీల్లో జన్మించిన వారికి మూలాంకం 1గా పరిగణిస్తారు. సంఖ్యాశాస్త్రంలో ఈ సంఖ్యకు సూర్యుడిని అధిపతిగా భావిస్తారు. మూలాంకం 1 ఉన్నవారు సాధారణంగా ఆత్మవిశ్వాసంతో, స్వతంత్రంగా వ్యవహరించేందుకు ఇష్టపడతారని చెబుతారు. ఇతరుల మాటలను గుడ్డిగా అనుసరించడం కంటే తమ నిర్ణయాలపై తాము నమ్మకం ఉంచుతారు. వీరిలో నాయకత్వ లక్షణాలు ఎక్కువగా ఉంటాయి. ఏదైనా పని చేపట్టినప్పుడు దాన్ని తమదైన శైలిలో పూర్తి చేయాలని కోరుకుంటారు. కొత్త ఆలోచనలను అమలు చేయడంలో కూడా ముందుంటారు. అయితే కొన్నిసార్లు తమ నిర్ణయమే సరైనదని బలంగా భావించడం వల్ల మొండితనంగా కనిపించే అవకాశం ఉంటుంది. విమర్శలను స్వీకరించడంలోనూ కొంత ఇబ్బంది ఉండవచ్చని సంఖ్యాశాస్త్ర నిపుణులు అంచనా.

ఇవి కూడా చదవండి

Numerology: ఈ తేదీల్లో పుట్టినవారు దానవీర కర్ణుడిలా ఉంటారు..

Numerology: ఈ తేదీల్లో పుట్టిన అన్నదమ్ములుంటే అదృష్టమే..!

వారికి 35 ఏళ్ల తర్వాత చిన్ననాటి కోరికలు నెరవేరే ఛాన్స్..!

Numerology: మీ జీవితంలో టర్నింగ్ పాయింట్ ఏ వయస్సులో వస్తుంది..?

మూలాంకం 7

7, 16, 25 తేదీల్లో జన్మించిన వారికి మూలాంకం 7గా పరిగణిస్తారు. ఈ సంఖ్యకు కేతువును అధిపతిగా భావిస్తారు. మూలాంకం 7 వ్యక్తులు సాధారణంగా లోతుగా ఆలోచించే స్వభావం కలిగి ఉంటారని చెబుతారు. ప్రతి విషయాన్ని పైపైగా కాకుండా దాని వెనుక ఉన్న కారణాలను తెలుసుకోవడానికి ప్రయత్నిస్తారు. వీరు ఎక్కువగా తమలో తాము ఆలోచించుకోవడానికి ఇష్టపడతారు. అందరితో వెంటనే కలిసిపోవడం కంటే కొంత సమయం తీసుకుని వ్యక్తులను అర్థం చేసుకునే స్వభావం ఉంటుంది. వీరిలో పరిశీలనా శక్తి, విశ్లేషణాత్మక ఆలోచన బలంగా ఉంటాయని సంఖ్యాశాస్త్రం చెబుతుంది. అందుకే ఇతరులు గమనించని విషయాలను కూడా వీరు త్వరగా గుర్తించే అవకాశం ఉంటుంది.

మూలాంకం 9

9, 18, 27 తేదీల్లో జన్మించిన వారికి మూలాంకం 9. సంఖ్యాశాస్త్రంలో ఈ సంఖ్యకు అంగారకుడు అధిపతిగా పరిగణించబడతాడు. మూలాంకం 9 వ్యక్తులు ధైర్యం, శక్తి, పోరాట స్ఫూర్తి కలిగినవారిగా భావిస్తారు. సమస్యలు ఎదురైనప్పుడు వెనక్కి తగ్గకుండా వాటిని ఎదుర్కొనే ప్రయత్నం చేస్తారు. అన్యాయం జరిగితే మౌనంగా ఉండకుండా ప్రశ్నించే స్వభావం వీరిలో ఉండవచ్చు. తమకు నచ్చిన విషయాల విషయంలో చాలా పట్టుదలగా ఉంటారు. వీరిలో నాయకత్వ లక్షణాలు, నిర్ణయం తీసుకునే సామర్థ్యం, ఇతరులకు సహాయం చేయాలనే భావన కనిపిస్తాయని సంఖ్యాశాస్త్ర విశ్వాసం. సమాజానికి ఉపయోగపడే పనుల పట్ల కూడా ఆసక్తి చూపవచ్చని చెబుతారు. అయితే కోపం త్వరగా రావడం లేదా భావోద్వేగానికి లోనై నిర్ణయాలు తీసుకోవడం వీరికి ప్రతికూలంగా మారే అవకాశం ఉంది.

(గమనిక: అయితే సంఖ్యాశాస్త్రం ఒక సాంప్రదాయక నమ్మకం మాత్రమే. ఒక వ్యక్తి స్వభావాన్ని కేవలం మూలాంకం ఆధారంగా పూర్తిగా నిర్ణయించలేము. వ్యక్తి పెరిగిన వాతావరణం, అనుభవాలు, పరిస్థితులు కూడా వ్యక్తిత్వంపై ప్రభావం చూపుతాయి)