Natural Farming: తుఫాన్‌లకు తలవంచని ప్రకృతి సేధ్యం..
ఆర్నబ్, మురసు తుఫానుల బీభత్సానికి రసాయన పద్ధతుల్లో సాగు చేసిన పొలాలు పూర్తిగా దెబ్బతింటే.. పక్కనే ఉన్న ప్రకృతి వ్యవసాయ పొలాలు మాత్రం మొక్కవోని ధైర్యంతో నిలబడ్డాయి. ఒకే ఊరు, ఒకే వరి రకం.. అయినా ఫలితాల్లో ఇంత తేడా ఎందుకు వచ్చింది? అసలు ప్రకృతి వ్యవసాయ పద్ధతుల్లో సాగు చేసిన పంటలు తుఫానులను ఎలా తట్టుకున్నాయి? ఈ వివరాలు తెలియాలంటే ఈ స్టోరీ చదవాల్సిందే.
Updated on: Nov 13, 2026 | 9:50 PM
ప్రకృతి వైపరీత్యాల ముందు మనిషి నిస్సహాయుడు అంటారు. కానీ, ప్రకృతిని నమ్ముకుని వ్యవసాయం చేసిన రైతుల పంటలు మాత్రం తుఫానుల ధాటికి సైతం తట్టుకుని నిలబడ్డాయి. ఇటీవల పశ్చిమగోదావరి జిల్లాను వణికించిన వరుస తుఫానుల అనంతరం పక్కపక్కనే ఉన్న పొలాల్లో కనిపించిన దృశ్యాలు ఇప్పుడు వ్యవసాయ రంగంలో ఆసక్తికర చర్చకు దారితీశాయి.
వరుస తుఫానుల బీభత్సం..
అక్టోబర్ 27, 28 తేదీల్లో విరుచుకుపడిన ఆర్నబ్ తుఫాను, ఆ వెంటనే నవంబర్ 2, 3 తేదీల్లో ముంచెత్తిన మురసు తుఫాను పశ్చిమగోదావరి జిల్లా రైతులకు కంటిమీద కునుకు లేకుండా చేశాయి. గంటకు 120 కిలోమీటర్ల వేగంతో వీచిన పెనుగాలులు, భారీ వర్షాల కారణంగా జిల్లావ్యాప్తంగా వేలాది ఎకరాల్లో వరి పంట నేలకొరిగింది. అయితే, ఈ పెను విపత్తులోనూ ప్రకృతి వ్యవసాయ పద్ధతుల్లో సాగు చేసిన పొలాలు మాత్రం ఆశ్చర్యకరంగా తట్టుకుని నిలబడ్డాయి.
ఒకే ఊరు.. ఒకే రకం.. కానీ ఫలితం వేరు!
జిల్లాలోని పలు గ్రామాల్లో పక్కపక్కనే ఉన్న రసాయన, ప్రకృతి వ్యవసాయ పొలాలను పరిశీలిస్తే స్పష్టమైన వ్యత్యాసం కనిపించింది. పాలకొల్లు మండలం అరట్లకట్టలో గత ఐదేళ్లుగా ప్రకృతి వ్యవసాయం చేస్తున్న రైతు ముప్పిడి ఆశీర్వాదం తన ఎకరం పొలంలో ‘MTU 1318’ రకం వరిని సాగు చేశారు. అతను ప్రీ-మాన్సూన్ డ్రై సోయింగ్ (PMDS), జీవామృతం, ఘనజీవామృతం వంటి పద్ధతులను పాటించడం వల్ల తుఫాను ధాటికి ఆయన పొలంలో 80 శాతం పంట నేలకొరగకుండా నిలబడింది. అయితే, పక్కనే అదే రకం వరిని రసాయన పద్ధతిలో సాగు చేసిన కొనప రాజు రాంబాబు పొలంలోని పంట పూర్తిగా నేలకొరిగింది.
మొగల్తూరు మండలంలోని మొగల్తూరులోనూ ఇదే పరిస్థితి కనిపించింది. కుక్కల నాగరాజు అనే రైతు ప్రకృతి ఎరువులతో సాగు చేసిన సంపత్ స్వర్ణ వరి పంట తుఫాను గాలులను తట్టుకుని 50 శాతం మేర నిలబడింది. కానీ, పక్కనే అదే రకాన్ని రసాయన ఎరువులతో సాగు చేసిన చెన్ను శ్రీను పంట పూర్తిగా నేలకొరిగింది. అలాగే పెంటపాడు మండలం బి. కొండేపాడు గ్రామానికి చెందిన పాలా సాయిపద్మ ప్రకృతి ఎరువులతో సాగు చేసిన పంటలో 50 శాతం సురక్షితంగా నిలబడింది. అదే సమయంలో పొరుగున ఉన్న పాల దత్తుడు అనే రైతు రసాయన ఎరువులతో సాగు చేసిన పంట మొత్తం నేలమట్టమైంది.
అత్తిలి మండలం ఒరిగేడు గ్రామంలోనూ ఇదే పరిస్థితి పునరావృతమైంది. గింజ గట్టిపడే దశలో ఉన్న ‘సంపత్ స్వర్ణ’ వరి పంట ప్రకృతి వ్యవసాయం చేసిన రైతు జేనుల విజయదుర్గ పొలంలో 50 శాతం మేర నిలబడింది. అయితే, అదే గ్రామంలో రసాయన పద్ధతుల్లో సాగు చేసిన గున సత్యనారాయణ పంట పూర్తిగా దెబ్బతింది.
ప్రకృతి వ్యవసాయం ఎలా కాపాడింది?
రసాయన ఎరువులు వేసిన పంటలు పైకి ఏపుగా పెరిగినా.. వాటి కాండం బలహీనంగా ఉండటంతో బలమైన గాలులకు త్వరగా నేలకొరిగే అవకాశం ఉంటుంది. కానీ, ప్రకృతి వ్యవసాయంలో ఉపయోగించే జీవామృతం, ఘనజీవామృతం, బయో కల్చర్స్ వంటి వాటి వల్ల నేలలో సూక్ష్మజీవుల వృద్ధికి తోడ్పాటు లభిస్తుంది. దీంతో పంట వేర్లు భూమిలోకి బలంగా చొచ్చుకుపోయి, కాండం కూడా దృఢంగా మారుతుందని చెబుతున్నారు. ఫలితంగా గంటకు 120 కిలోమీటర్ల వేగంతో వీచిన గాలులను సైతం కొన్ని ప్రకృతి వ్యవసాయ పంటలు తట్టుకుని నిలబడ్డాయి.
వాతావరణ మార్పులు, అకాల వర్షాలు రైతులను నిత్యం ఆందోళనకు గురిచేస్తున్న ప్రస్తుత తరుణంలో.. పశ్చిమగోదావరి రైతుల అనుభవాలు వ్యవసాయ రంగంలో కొత్త చర్చకు తెరతీస్తున్నాయి. తక్కువ పెట్టుబడి, ఆరోగ్యకరమైన నేలతో పాటు ప్రకృతి వైపరీత్యాలను తట్టుకునే సామర్థ్యాన్ని పెంపొందించడంలో ప్రకృతి వ్యవసాయ పద్ధతులు ఎలా ఉపయోగపడతాయో ఈ క్షేత్రస్థాయి అనుభవాలు తెలియజేస్తున్నాయి.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి.
