ఐక్యరాజ్యసమితి వేదికగా పాక్ ప్రధాని వ్యాఖ్యలు.. నవ్వు ఆపుకోలేకపోయిన భారత దౌత్యవేత్త!
ఐక్యరాజ్యసమితిలో పాక్ ప్రధాని షెహబాజ్ షరీఫ్ 2025లో జరిగిన భారత్-పాక్ సైనిక ఘర్షణపై చేసిన వ్యాఖ్యలు చర్చనీయాంశమయ్యాయి. భారత దాడులను తిప్పికొట్టామని, ట్రంప్ జోక్యం వల్లే ప్రాణాలు రక్షించబడ్డాయని ఆయన పేర్కొన్నారు. దీనిపై భారత దౌత్యవేత్త నవ్వడం వైరల్ అయ్యింది. సింధు జలాల ఒప్పందంపై కూడా షరీఫ్ హెచ్చరించారు. అయితే, మూడో పక్షం జోక్యం లేదని భారత్ స్పష్టం చేసింది.
Updated on: Sep 26, 2026 | 12:44 PM
న్యూయార్క్లో జరుగుతున్న ఐక్యరాజ్యసమితి 81వ సర్వసభ్య సమావేశంలో పాకిస్థాన్ ప్రధానమంత్రి షెహబాజ్ షరీఫ్ చేసిన వ్యాఖ్యలు మరోసారి భారత్-పాకిస్థాన్ మధ్య 2025లో జరిగిన సైనిక ఘర్షణను తెరపైకి తెచ్చాయి. ఆ ఘర్షణపై పాకిస్థాన్ వాదనను షరీఫ్ తన ప్రసంగంలో ప్రస్తావించగా.. అక్కడే ఉన్న భారత ప్రతినిధి బృందంలోని దౌత్యవేత్త ఆర్. శ్రీనివాస్ స్పందించిన తీరు సోషల్ మీడియాలో చర్చనీయాంశంగా మారింది.
పహల్గామ్లో 2025 ఏప్రిల్ 22న జరిగిన ఉగ్రదాడిలో 26 మంది మృతి చెందిన తర్వాత భారత్ మే 7న ఆపరేషన్ సింధూర్ చేపట్టింది. పాకిస్థాన్, పాకిస్థాన్ ఆక్రమిత కశ్మీర్లోని ఉగ్రవాద మౌలిక సదుపాయాలను లక్ష్యంగా చేసుకున్నట్లు భారత్ ప్రకటించింది. అనంతరం ఇరు దేశాల మధ్య సైనిక ఘర్షణ చోటుచేసుకుంది.
అయితే తాజాగా ఐక్యరాజ్యసమితి సర్వసభ్య సమావేశంలో ప్రసంగిస్తూ.. పాక్ ప్రధాని షెహబాజ్ షరీఫ్ కీలక వ్యాఖ్యలు చేశారు. పాకిస్థాన్ సైన్యాన్ని ప్రశంసిస్తూ.. భారత దాడులకు తమ సైనికులు ప్రతిస్పందించారని, పాకిస్థాన్ దాడిని తిప్పికొట్టి గుణపాఠం నేర్పిందని పేర్కొన్నారు. ఈ వ్యాఖ్యల సమయంలో కెమెరా భారత ప్రతినిధి బృందం వైపు తిరగగా, దౌత్యవేత్త ఆర్. శ్రీనివాస్ తల ఊపుతూ చిరునవ్వుతో కనిపించారు. ఈ వీడియో ప్రస్తుతం సోషల్ మీడియాలో వైరల్ అవుతోంది.
ఇదే సమయంలో అమెరికా అధ్యక్షుడు డొనాల్డ్ ట్రంప్ను షరీఫ్ ప్రత్యేకంగా ప్రస్తావించారు. 2025 భారత్-పాకిస్థాన్ ఘర్షణ సమయంలో ట్రంప్ చేసిన సకాలంలో చేసుకున్న జోక్యం వల్ల దక్షిణాసియాలో వందల మిలియన్ల మంది ప్రాణాలు రక్షించబడ్డాయని ఆయన అన్నారు. ట్రంప్ నాయకత్వాన్ని కూడా షరీఫ్ ప్రశంసించారు.
వీడియో ఇక్కడ చూడండి..
View this post on Instagram
అయితే భారత్ ఈ విషయంలో ఇప్పటికే స్పష్టమైన వైఖరిని కొనసాగిస్తోంది. భారత్-పాకిస్థాన్ మధ్య కాల్పుల విరమణ, సైన్యం ఘర్షణ నిలిపివేతలో మూడో పక్షం జోక్యం లేదని న్యూఢిల్లీ పదేపదే స్పష్టం చేసింది. భారత వాదన ప్రకారం, ఆ సమయంలో ఇరు దేశాల సైనిక అధికారుల మధ్య ప్రత్యక్ష సంప్రదింపుల తర్వాతే కాల్పుల విరమణపై అవగాహన ఏర్పడింది. షరీఫ్ తన ప్రసంగంలో కశ్మీర్ అంశంతో పాటు సింధు జలాల ఒప్పందాన్ని కూడా ప్రస్తావించారు. పాకిస్థాన్కు కేటాయించిన సింధు జలాలను అడ్డుకోవడం, మళ్లించడం జరిగితే దాన్ని “యుద్ధ చర్య”గా పరిగణిస్తామని ఆయన హెచ్చరించారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి…
