Donald Trump: బిగ్ బిల్లుకు సెనెట్ ఆమోదం.. ట్రంప్ వార్నింగ్..వెనక్కి తగ్గిన మస్క్

డొనాల్డ్ ట్రంప్ అమెరికా ప్రెసిడెంట్ అయ్యాక సంచలన నిర్ణయాలు తీసుకుంటూ ముందుకు సాగుతోన్నారు. గతంలో వివిధ దేశాలపై భారీగా పన్నుల విధించిన ట్రంప్.. ఆ తర్వాత కొద్దిగా వెనక్కి తగ్గారు. అంతేకాకుండా తన పాలనలో అనవసర ఖర్చులు తగ్గించడమే లక్ష్యంగా చర్యలు తీసుకుంటున్నారు. ఇదే క్రమంలో ట్రంప్ బిగ్ బ్యూటిఫుల్ బిల్ ను తీసుకొచ్చారు. పన్నులు, బడ్జెట్ కు సంబంధించిన ఈ బిల్లును గతంలో డోజ్ బాధ్యతలు చూసినటువంటి ప్రపంచ కుబేరుడు ఎలన్ మస్క్ తీవ్రంగా వ్యతిరేకించారు. ఈ బిల్లు పాసైతే కొత్త పార్టీ పెడతానంటూ ప్రకటించారు. రిపబ్లిక్, డెమోక్రాట్ పార్టీల వల్ల ప్రజలు తీవ్ర ఇబ్బందులు పడుతున్నారని.. వారి కోసం కొత్త పార్టీ పెడతానని తెలిపారు.

ఈ క్రమంలో ప్రెసిడెంట్ ట్రంప్..మస్క్ పై నిప్పులు చెరిగారు. మస్క్ సంస్థలకు అందిస్తున్న పన్నుల రాయితీలను నిలిపివేస్తానంటూ హెచ్చరించారు. చివరకు మస్క్ సౌతాఫ్రికాకు వెళ్లాల్సి వస్తుందన్నారు. ఈ క్రమంలో ఎలన్ మస్క్ కొంత వెనక్కి తగ్గారు. ఈ బిల్లుపై ప్రస్తుతానికి అయితే ఏం చేయదలుచుకోలేదంటూ వ్యాఖ్యానించారు. ఈ నేపథ్యంలో మరో కీలక పరిణామం చోటుచేసుకుంది. బిగ్ బ్యూటిఫుల్ బిల్లుకు సెనెట్ ఆమోదం తెలిపింది. సెనెట్ లో ఈ బిల్లుకు అనుకూలంగా, వ్యతిరేకంగా 50-50 ఓట్లు పడగా.. ఉపాధ్యక్షుడు జేడీ వాన్స్ టై-బ్రేకింగ్ ఓటుతో బిల్లు నెగ్గింది. బిగ్ బ్యూటిఫుల్ బిల్లు 51-50 మార్జిన్‌తో నెగ్గినట్టు వాన్స్ ప్రకటించారు.

మొత్తం 1000 పేజీలు ఉన్న ఈ బిల్లుపై సెనెట్ లో వాడీవేడీ చర్చ జరిగింది. సభ్యులు ప్రతిపాదించిన సవరణపై 18 గంటలపాటు మారథాన్ చర్చ నడిచింది. చివరకు వైస్ ప్రెసిడెంట్ జేడీ వాన్స్ ఓటుతో బిల్లుకు ఆమోదం లభించింది. ఇప్పుడు ఈ బిల్లు ప్రతినిధుల సభకు వెళ్తుంది. అక్కడ ఆమోదం లభించాక ప్రెసిడెంట్ ట్రంప్ దగ్గరకు వస్తుంది. ఏదిఏమైనా ట్రంప్ తాను అనుకున్న నిర్ణయాలపై ఎన్ని విమర్శలు వచ్చినా వెనక్కి తగ్గకుండా ముందుకు సాగుతున్నారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి.