రూ.10 కోట్లకి ఇంత చిన్న ఇల్లా.. ఆకాశానంటుతున్న ధరలు

సిలికాన్ వ్యాలీ ఆఫ్ ఇండియా బెంగళూరులో విలాసవంతమైన ఇల్లు కొనాలనుకునేవారికి షాకింగ్ న్యూస్. నగరంలో లగ్జరీ రెసిడెన్షియల్ మార్కెట్ ధరలు ఆకాశాన్నంటడంతో, ఇప్పుడు రూ.10 కోట్లు పెట్టినా గతేడాది కంటే తక్కువ విస్తీర్ణంలోనే సర్దుకుపోవాల్సిన పరిస్థితి ఉంది. ప్రాపర్టీ కన్సల్టెన్సీ సంస్థ నైట్ ఫ్రాంక్ విడుదల చేసిన ‘వెల్త్ రిపోర్ట్ 2026’ ఈ విషయాలను బయటపెట్టింది. 2025లో బెంగళూరులో విలాసవంతమైన ఇళ్ల ధరలు ఏకంగా 9.4 శాతం పెరిగాయి. రూ.10 కోట్ల బడ్జెట్‌తో కేవలం 3,843 చదరపు అడుగుల లగ్జరీ నివాసాన్ని మాత్రమే కొనుగోలు చేయగలరు. 2024లో ఇదే మొత్తానికి 3,983 చదరపు అడుగుల స్థలం లభించగా, ఏడాది వ్యవధిలో కొనుగోలు చేయగల స్థలం 3.5 శాతం తగ్గింది. దేశంలోని ప్రధాన నగరాల్లో ఈ తగ్గుదల బెంగళూరులోనే అధికంగా నమోదవుతోంది. దీంతో ప్రపంచ లగ్జరీ మార్కెట్ల సూచీ అయిన ‘ప్రైమ్ ఇంటర్నేషనల్ రెసిడెన్షియల్ ఇండెక్స్’లో బెంగళూరు 32 స్థానాలు ఎగబాకి 8వ ర్యాంక్‌కు చేరింది. ఇక దేశంలోని ఇతర నగరాలను పరిశీలిస్తే, ముంబై అత్యంత ఖరీదైన మార్కెట్‌గా తన స్థానాన్ని నిలబెట్టుకుంది. అక్కడ రూ.10 కోట్లకు కేవలం 1,033 చదరపు అడుగుల స్థలం మాత్రమే లభిస్తుంది. ఢిల్లీలో 2,207 చదరపు అడుగులు లభిస్తుంది. అదే హైదరాబాద్‌లో అయితే 5,360 చదరపు అడుగుల విస్తీర్ణం అందుబాటులో ఉంది. రూపాయి విలువ క్షీణతను మించి లగ్జరీ ఆస్తుల ధరలు పెరగడమే ఈ పరిస్థితికి కారణమని నివేదిక విశ్లేషించింది. బలమైన డిమాండ్, ప్రీమియం ప్రాజెక్టుల రాకతో బెంగళూరు మార్కెట్ దూసుకుపోతున్నా, ఐటీ రంగంలో నెలకొన్న ఆందోళనలు భవిష్యత్తులో ఈ సెగ్మెంట్‌పై ప్రభావం చూపవచ్చని నిపుణులు అంచనా వేస్తున్నారు.

మరిన్ని వీడియోల కోసం ఇక్కడ క్లిక్ చేయండి

Also Watch:

బంగారం లేకుండానే పెళ్లి.. యువత కొత్త ట్రెండ్‌

Weather Update: తెలంగాణలో బండలు పగిలే ఎండలు.. అల్పపీడనంతో ఏపీలో వర్షాలు

ప్రపంచంలోని ఇరుకైన వీధి !! ఎక్కడ ఉందొ తెలుసా