చాట్‌జీపీటీలో కొత్త ‘ప్రైవసీ సెంటర్’ ఇక మీ డేటా సేఫ్..

ప్రముఖ ఆర్టిఫిషియల్ ఇంటెలిజెన్స్ సంస్థ ఓపెన్ఏఐ , చాట్‌జీపీటీ వినియోగదారుల కోసం ఒక కొత్త ‘ప్రైవసీ సెంటర్’ ఫీచర్‌ను అందుబాటులోకి తెచ్చింది. యూజర్ల ప్రైవసీ సెట్టింగ్‌లు, డేటా వినియోగంపై అవగాహన పెంచడమే లక్ష్యంగా దీనిని డిజైన్ చేశారు. ఈ కొత్త సెంటర్ మీ ఖాతా మెనూలో కనిపిస్తుంది. ఇప్పటికే ఉన్న ప్రైవసీ కంట్రోల్స్ స్థానంలో ఇది రావడం లేదు. ఏ ప్రైవసీ ఆప్షన్ దేనికి ఉపయోగపడుతుంది? ఏ మార్పులు చేయడానికి ఎక్కడ క్లిక్ చేయాలి? అనే విషయాలను వివరిస్తూ యూజర్లకు నేరుగా లింక్‌లు అందిస్తుంది. వెబ్ వర్షన్ తో పాటు iOS, ఆండ్రాయిడ్ యాప్‌లలో ఉచిత, ప్లస్, ప్రో మరియు బిజినెస్ ఖాతాదారులకు ఇది అందుబాటులోకి వస్తోంది. ఎంటర్‌ప్రైజ్, హెల్త్‌కేర్ ప్లాన్లకు ఇది వర్తించదు. ఈ ప్రైవసీ సెంటర్ సమాచారాన్ని మూడు ముఖ్యమైన విభాగాలుగా వర్గీకరించింది. ఇందులో మొదటిది పర్సనలైజ్డ్ చాట్స్ & అడ్వర్టైజ్‌మెంట్స్. మెమరీ ఫీచర్, లొకేషన్ వివరాలు మరియు ప్రకటనలు మీ అనుభవాన్ని ఎలా ప్రభావితం చేస్తాయో ఇది వివరిస్తుంది. చాట్ డిలీట్ చేసినంత మాత్రాన అందులోని ‘మెమరీ’ డిలీట్ కాదని ఓపెన్ఏఐ స్పష్టం చేసింది. రెండోది..చాట్ ప్రైవసీ. తాత్కాలిక చాట్‌ల సమాచారాన్ని అందిస్తూ, వాటిని సులభంగా ప్రారంభించేందుకు సహాయపడుతుంది. ఇక మూడోది డేటా యూసేజ్ & యాక్సెస్. ఏఐ మోడల్ మెరుగుదల కోసం డేటా వినియోగం, థర్డ్-పార్టీ యాప్‌ల యాక్సెస్, మీ డేటాను డౌన్‌లోడ్ చేయడం లేదా ఖాతా తొలగింపు వంటి అంశాలను కవర్ చేస్తుంది. యూజర్లు తమ పరికరాన్ని బట్టి Privacy Centerను తెరవవచ్చు. కంప్యూటర్ లేదా వెబ్ బ్రౌజర్‌లోకి వెళ్లి.. ChatGPT ఖాతాలోకి లాగిన్ అవ్వండి. మీ అకౌంట్ మెనూను ఓపెన్ చేయండి. అక్కడ Help అనే ఆప్షన్‌ను ఎంచుకోండి. Privacy Centerపై క్లిక్ చేయండి. ఇక Android, ఐ ఫోన్ల‌లో అయితే..ChatGPT యాప్‌ను ఓపెన్ చేసి, Settingsలోకి వెళ్లండి. Privacy Center ఎంపికను ఎంచుకోండి.

మరిన్ని వీడియోల కోసం ఇక్కడ క్లిక్ చేయండి

Also Watch:

‘ఏఐ’కి కొత్త పేరు పెట్టిన ట్రంప్‌.. ఇక నుంచి అలాగే పిలవాలట!