దేశంలోనే హాట్ టూరిస్ట్ స్పాట్గా మారిన ఈ గ్రామం ప్రత్యేకమైనది..! అందుకే క్యూ కడుతున్న టూరిస్టులు..
తుర్టుక్ గ్రామం లడఖ్ సరిహద్దులోని ఒక అద్భుత రత్నం. ఒకప్పుడు పాకిస్తాన్లో ఉండి, 1971లో భారతదేశంలో చేరిన ఈ ప్రాంతం తన విశిష్టమైన బాల్టి సంస్కృతి, సహజ సౌందర్యంతో పర్యాటకులను ఆకర్షిస్తుంది. 2010 వరకు పరిమిత ప్రవేశం ఉండగా, ఇప్పుడు ఇది ప్రసిద్ధ పర్యాటక కేంద్రంగా మారింది. లేహ్ నుండి ఖార్దుంగ్ లా మీదుగా సాగే ప్రయాణం అద్భుత అనుభూతిని ఇస్తుంది. ఇన్నర్ లైన్ పర్మిట్ తప్పనిసరి.
భారతదేశం అనేక అందమైన సహజ సౌందర్య ప్రాంతాలకు ప్రసిద్ధి చెందింది. కానీ, సరిహద్దులోని కొండలు, లోయల మధ్య ఉన్న కొన్ని గ్రామాలు ఇప్పుడు ప్రజల్లో మరింత ప్రాచుర్యం పొందుతున్నాయి. అలాంటి ఒక ప్రత్యేక గ్రామం తుర్టుక్. ఇక్కడి ప్రకృతి రమణీయత, ప్రశాంతమైన వాతావరణంతో ప్రపంచ వ్యాప్తంగా ఉన్న ప్రకృతి ప్రేమికులను విపరీతంగా ఆకర్షిస్తోంది. ఒకప్పుడు పాకిస్తాన్లో భాగంగా ఉన్న ఈ గ్రామం 1971 ఇండో-పాక్ యుద్ధం తర్వాత భారతదేశంలో చేరింది. ప్రస్తుతం ఇది ష్యోక్ నది ఒడ్డున ఉన్న నుబ్రా లోయ ప్రాంతంలో ఉంది. ఇక్కడ నివసించే బాల్టి కమ్యూనిటీ భాష, ఆహారపు అలవాట్లు, సంస్కృతి లడఖ్లోని ఇతర ప్రాంతాల కంటే భిన్నంగా ఉంటాయి. ఈ ప్రత్యేకత పర్యాటకులకు కొత్త అనుభవాన్ని ఇస్తుంది.
ఈ గ్రామం నియంత్రణ రేఖ (LOC) నుండి కేవలం 8–9 కి.మీ దూరంలో ఉంది. 2010 వరకు, భద్రతా కారణాల దృష్ట్యా పర్యాటకులకు ప్రవేశం పరిమితం చేయబడింది. కానీ, ఇప్పుడు ఇది ఒక ప్రసిద్ధ పర్యాటక ప్రదేశం. ఇక్కడ అనేక హోమ్స్టేలు, గెస్ట్హౌస్లు కూడా ఉన్నాయి. పర్యాటకులు సందర్శించడానికి లెహ్ అధికారుల నుండి ఇన్నర్ లైన్ పర్మిట్ పొందాలి.
టర్టుక్ గ్రామం లేహ్ నుండి దాదాపు 205 కిలోమీటర్ల దూరంలో ఉంది. ప్రయాణం 6 నుండి 8 గంటలు పడుతుంది. మార్గంలో మీరు ప్రపంచంలోనే ఎత్తైన మోటారు రోడ్లలో ఒకటైన ఖార్దుంగ్ లా గుండా వెళ్ళాలి. ఈ ప్రయాణం ఒక అద్భుతమైన అనుభవం. ఇక్కడ పర్యాటకులు చూసేందుకు ప్రధాన ఆకర్షణగా గ్రామంలోని పాత రాతి ఇండ్లు కనిపిస్తాయి. అలాగే, 300 ఏళ్ల నాటి జామా మసీదు, స్థానిక బాల్టి మ్యూజియం, ఆప్రికాట్ తోటలు ప్రసిద్ధి చెందాయి. ఇక ఈ గ్రామాన్ని సందర్శించాలంటే ఏప్రిల్ నుంచి సెప్టెంబర్ వరకు అనుకూలంగా ఉంటుంది.
మొత్తం మీద సరిహద్దులో ఉన్నప్పటికీ తుర్టుక్ దాని ప్రశాంతత, సహజ సౌందర్యం, ప్రత్యేకమైన సంస్కృతితో పర్యాటకులను ఆకర్షిస్తుంది. అయితే, ఇక్కడ నెట్వర్క్, ఇంటర్నెట్ సౌకర్యాలు తక్కువగా ఉన్నందున, ప్రయాణానికి ముందు అవసరమైన సన్నాహాలు చేసుకోవడం మంచిది.
మరిన్ని ట్రెండింగ్ న్యూస్ కోసం క్లిక్ చేయండి..