గోల్డ్‌ రింగ్‌ ధరించిన పాము.. ఎంగేజ్మెంట్‌ అయిందేమోనని నవ్వకండి! విషయం ఏంటంటే?

కేరళలోని కాసరగోడ్ జిల్లా అడూర్‌లో ఒక కుటుంబం ఎదుర్కొన్న ఘటన స్థానికంగా పెద్ద చర్చనీయాంశంగా మారింది. రెండు వారాలుగా తెరవని డ్రాయర్‌ను ఓ మహిళ తెరిచినప్పుడు, అందులో పాము కనిపించడం ఒక్కటే కాకుండా, దాని శరీరానికి బంగారు ఉంగరం బిగుసుకుని ఉండటం అందరినీ ఆశ్చర్యానికి గురిచేసింది. ఈ సంఘటన రవి అనే వ్యక్తి ఇంట్లో జరిగింది. ప్రస్తుతం వారు కొత్త ఇల్లు నిర్మించుకుంటుండటంతో, ఇంటి సామాన్లను తాత్కాలిక షెడ్డులో ఉంచుతున్నారు. రవి ఇంట్లో లేని సమయంలో, అతని భార్య శైలజ బ్యాంకు పనికి అవసరమైన పత్రాలు తీసుకోవడానికి డ్రాయర్ తెరిచింది. కాగితాల మధ్య పాము తోక కనిపించగానే ఆమె భయంతో వెంటనే డ్రాయర్ మూసివేసింది.

ఇంట్లో చిన్న పిల్లలు ఉండటంతో కుటుంబ సభ్యులు ఆందోళన చెందారు. అది విషపూరిత పాము కాదని తెలిసినా, ఇటీవల పాముకాట్ల ఘటనలు పెరగడంతో ఎలాంటి ప్రమాదం తీసుకోకుండా వెంటనే అటవీ శాఖకు సమాచారం ఇచ్చారు. అటవీ శాఖకు చెందిన ‘సర్ప’ వాలంటీర్లు కొద్దిసేపటికే అక్కడికి చేరుకున్నారు. వారు డ్రాయర్‌ను జాగ్రత్తగా తెరిచి చూడగా, లోపల సుమారు నాలుగు అడుగుల పొడవున్న పాము చుట్టలు చుట్టుకుని కనిపించింది. అయితే దాంతో పాటు మరో ఆశ్చర్యకరమైన సంఘటన చోటు చేసుకుంది. ఆ పాము నడుము భాగానికి ఒక బంగారు ఉంగరం బిగుసుకుని ఉంది. పాము డ్రాయర్‌లోకి వెళ్లే సమయంలో అక్కడ ఉన్న ఉంగరంలో శరీరం ఇరుక్కుపోయి ఉండొచ్చని వాలంటీర్లు భావిస్తున్నారు.

ఆ ఉంగరం బిగువుగా ఉండటంతో పాము బలహీనంగా, కదలలేని స్థితిలో కనిపించింది. వాలంటీర్లు ఎంతో ఓపికగా పనిచేసి, ప్రత్యేక పరికరాలతో ఆ ఉంగరాన్ని కత్తిరించి పామును సురక్షితంగా విడిపించారు. అనంతరం దానిని సమీప అటవీ ప్రాంతంలో వదిలిపెట్టారు. ఈ విచిత్ర ఘటన సోషల్ మీడియాలో కూడా వైరల్ అవుతోంది. బంగారు ఉంగరం ధరించిన పాము అంటూ స్థానికులు ఆసక్తిగా చర్చించుకుంటున్నారు.

మరిన్ని ట్రెండింగ్‌ వార్తల కోసం ఇక్కడ క్లిక్‌ చేయండి