మే 31న ఆకాశంలో అరుదైన ఖగోళ వింత.. హైదరాబాద్లోనూ కనువిందు చేయనున్న బ్లూ మైక్రోమూన్.. ఎలా చూడాలంటే?
ఖగోళ ప్రియులకు ఈ వారంతంలో ఒక అరుదైన అద్భుత దృశ్యం ఆకాశంలో కనువిందు చేయనుంది. ఖగోళ శాస్త్రంపై ఆసక్తి ఉన్న వారికి, ఆకాశంలో జరిగే వింతలను చూడటానికి ఇష్టపడే వారికి మే 31న ఒక అద్భుతమైన అవకాశం రాబోతోంది. ఆ రోజు ఆకాశంలో బ్లూ మైక్రోమూన్ (Blue Micro Moon) దర్శనమివ్వనుంది. హైదరాబాద్ నగరవాసులతో పాటు దేశవ్యాప్తంగా ఉన్న ప్రజలందరూ ఈ అరుదైన దృశ్యాన్ని కళ్లారా వీక్షించవచ్చు.
Updated on: May 29, 2026 | 4:50 PM
ఖగోళ శాస్త్రంపై ఆసక్తి ఉన్న వారికి, అంతరిక్ష వింతలను ఇష్టపడే వారికి ఈ వారాంతం మే 31 ఒక అద్భుతమైన దృశ్యాన్ని అందించబోతోంది. ఆ రోజు రాత్రి ఆకాశంలో బ్లూ మైక్రోమూన్ (Blue Micro Moon) ఆవిష్కృతం కానుంది. ఈ అరుదైన, విలక్షణమైన పౌర్ణమి చంద్రుడిని వీక్షించేందుకు ప్రపంచవ్యాప్తంగా ఉన్న స్కైవాచర్స్ ఎంతో ఆసక్తిగా ఎదురుచూస్తున్నారు. అసలు ఈ బ్లూ మైక్రోమూన్ అంటే ఏమిటో ఇప్పుడు చూద్దాం..
సాధారణంగా ఒకే క్యాలెండర్ నెలలో రెండు పౌర్ణమిలు రావడం చాలా అరుదు. అలా ఒకే నెలలో వచ్చే రెండవ పౌర్ణమిని సాంకేతికంగా బ్లూ మూన్ అని పిలుస్తారు. మే నెలలో ఇప్పటికే ఒక పౌర్ణమి రాగా, మే 31న రెండవ పౌర్ణమి రాబోతోంది. అయితే, పేరులో బ్లూ అని ఉన్నంత మాత్రాన చంద్రుడు నీలం రంగులోకి మారడు, ఎప్పటిలాగే సాధారణ రంగులోనే కనిపిస్తాడు.
మరోవైపు, అదే రోజున చంద్రుడు భూమి చుట్టూ తిరిగే తన దీర్ఘవృత్తాకార కక్ష్యలో భూమికి అత్యంత దూరంలో ఉండే అపోజీ (Apogee) స్థానానికి చేరుకుంటాడు. భూమికి దాదాపు 4,05,500 కిలోమీటర్ల దూరంలో ఉండటం వల్ల, ఆ రోజు చంద్రుడు సాధారణ పౌర్ణమి నాటి పరిమాణం కంటే దాదాపు 14 శాతం చిన్నగా, మరియు 30 శాతం తక్కువ ప్రకాశవంతంగా కనిపిస్తాడు. అందుకే దీనిని మైక్రోమూన్ అంటారు. ఈ బ్లూ మూన్, మైక్రోమూన్ రెండూ ఒకేసారి సంభవించడం అత్యంత అరుదైన విషయమని శాస్త్రవేత్తలు చెబుతున్నారు.
ఎలా వీక్షించాలి?:
ఈ అరుదైన ఖగోళ వింతను చూడటానికి ఎలాంటి ప్రత్యేకమైన టెలిస్కోప్లు లేదా బైనాక్యులర్స్ అవసరం లేదు. మే 31వ తేదీ సాయంత్రం సూర్యాస్తమయం అయిన వెంటనే తూర్పు ఆకాశంలో చంద్రుడు ఉదయించే సమయంలో దీనిని స్పష్టంగా చూడవచ్చు. వాతావరణం మేఘాలు లేకుండా ప్రశాంతంగా ఉంటే, కేవలం నగ్న కళ్లతోనే ఈ చిన్న పౌర్ణమిని వీక్షించి ఆస్వాదించవచ్చు. ఈ సమయంలో చంద్రుడు వృశ్చిక (స్కార్పియస్) రాశిలోని ప్రకాశవంతమైన అంటారిస్ (Antares) నక్షత్రానికి సమీపంలో కదులుతున్నట్లు కనిపిస్తాడని ఖగోళ శాస్త్ర నివేదికలు పేర్కొంటున్నాయి.
