వార్నీ.. ఇన్నాళ్లు ఒకటే అనుకున్నారా.. బబుల్‌ గమ్‌ vs చూయింగ్‌ గమ్‌ మధ్య తేడా ఏంటో తెలుసా..?

తరగతి గది చివరి బెంచ్‌ నుంచి ఆఫీస్‌ డెస్క్‌ వరకు.. నోటి దుర్వాసన పోగొట్టడానికైనా, ఒత్తిడిని తగ్గించుకోవడానికైనా జేబులోంచి ఓ గమ్‌ తీసి నమలడం చాలామందికి అలవాటు. అయితే దుకాణానికి వెళ్లినప్పుడు చాలామంది చూయింగ్‌గమ్‌ను, బబుల్‌గమ్‌ను ఒకటే అనుకుని కొనేస్తుంటారు. పైకి రెండూ ఒకేలా కనిపించినా, వాటి తయారీ, ఉపయోగించే పదార్థాలు, వాటి ప్రయోజనాల్లో చాలా తేడాలున్నాయి. చూయింగ్‌గమ్‌ను కాస్త గట్టిదనం ఉండే సాధారణ గమ్‌ బేస్‌తో తయారు చేస్తారు. మరోవైపు బబుల్‌గమ్‌ తయారీలో ఎక్కువ సాంద్రత, బలం కలిగిన పాలీమర్‌లు, రెసిన్‌లను వాడతారు. దీనివల్ల బబుల్‌గమ్‌ చాలా మృదువుగా, సులభంగా తెగిపోకుండా సాగుతుంది. అందుకే దానితో పెద్ద పెద్ద బుడగలు ఊదడం సాధ్యమవుతుంది. చూయింగ్‌గమ్‌ను ప్రధానంగా ఎక్కువసేపు నమలడానికి, నోటిని తాజాగా ఉంచడానికి, దవడలకు వ్యాయామం అందించడానికి ఉపయోగిస్తారు. బబుల్‌గమ్‌ ముఖ్య ఉద్దేశం మాత్రం గాలితో పెద్ద బెలూన్లు చేసి, వాటిని పగలగొడుతూ సరదాగా ఎంజాయ్ చేయడమే.

ఫ్లేవర్లు, తీపి

చూయింగ్‌గమ్‌లో చక్కెర శాతం తక్కువగా ఉండి మింట్‌, పుదీనా, స్పియర్‌మింట్‌ వంటి రిఫ్రెషింగ్ ఫ్లేవర్లు ఎక్కువగా ఉంటాయి. ఇవి ఎక్కువసేపు నమిలినా రుచిని కోల్పోవు. బబుల్‌గమ్‌లో తీపి శాతం చాలా ఎక్కువ. స్ట్రాబెర్రీ, బనానా వంటి కృత్రిమ పండ్ల ఫ్లేవర్లను ఇందులో వాడతారు. అయితే కాసేపు నమలగానే దీని తీపి, రుచి తగ్గిపోతాయి.

రూపురేఖలు, అతుక్కునే తత్వం

చూయింగ్‌గమ్‌ కాస్త పల్చగా, నునుపుగా ఉంటుంది. దీంతో పెద్ద బెలూన్ చేయడానికి ప్రయత్నిస్తే అది పగిలి పెదవులకు, ముఖానికి గట్టిగా అంటుకుపోతుంది. బబుల్‌గమ్‌ కాస్త మందంగా అనిపించినా, అందులోని ప్రత్యేక పాలీమర్‌ల వల్ల అది పగిలినా ముఖానికి జిడ్డుగా అంటుకోకుండా సులభంగా ఊడి వస్తుంది.

చరిత్ర ఏం చెబుతోంది?

ఆహార నిపుణుల ప్రకారం.. చూయింగ్‌గమ్‌కు వందల ఏళ్ల చరిత్ర ఉంది. కానీ బబుల్‌గమ్‌ మాత్రం 20వ శతాబ్దంలో అందుబాటులోకి వచ్చింది. 1928లో డైరన్ గమ్ కంపెనీ ఉద్యోగి వాల్టర్ డీమర్ చూయింగ్‌గమ్‌ ఆధారంగానే ఈ బబుల్‌గమ్‌ను కనుగొన్నారు. ఇకపై దుకాణానికి వెళ్లినప్పుడు ఫ్రెష్‌నెస్ కోసం చూయింగ్‌గమ్‌ కావాలా, లేక సరదాగా బెలూన్లు ఊదడానికి బబుల్‌గమ్‌ కావాలా అనేది చూసుకుని ఎంచుకోండి.