TGSRTC: అక్కాచెల్లెమ్మలకు ఆర్టీసీ సదవకాశం.. 24 గంటల్లో రాఖీలు డెలివరీ అయ్యేలా..

Tgrtc

తోబుట్టువులు ఎంతో సంతోషంగా జరుపుకునే పండుగ రాఖీ. ఏడాదంతా ఎక్కడున్నా ఈ ఒక్క రోజైనా కచ్చితంగా అన్నాచెల్లెల్లు, అక్కతమ్ముల్లు కచ్చితంగా కలుసుకుంటారు. రాఖీతో తమ బంధాన్ని చాటుకుంటారు. అయితే దూరంగా ఉన్న వారి పరిస్థితి ఏంటి.? ఇలాంటి వారి కోసమే తెలంగాణ ఆర్టీసీ కీలక నిర్ణయం తీసుకుంది. ప్రస్తుతం తెలంగాణ ఆర్టీసీ అందిస్తోన్న కార్గో సేవలను విస్తరిస్తున్నారు.

ఇందులో భాగంగానే రాఖీ పండుగ‌కు నాలుగైదు రోజుల ముందు నుంచి కార్గో సెంట‌ర్ల‌లో ప్ర‌త్యేక కౌంట‌ర్లు తెరిచేందుకు సన్నాహాలు చేస్తున్నారు. దీంతో దూర ప్రాంతాల్లో ఉన్న తమ తోబుట్టువులకు రాఖీలను సులభంగా పంపించేందుకు వీలు కల్పించనున్నారు. రాఖీలతో పాటు స్వీట్ బాక్సులు, బహుమతులు, ఇతర సామగ్రిని కూడా పంపే అవ‌కాశం ఉందని ఆర్టీసీ అధికారులు తెలిపారు. కేవలం తెలంగాణ మాత్రమే కాకుండా దగ్గరల్లోని.. ఆంధ్రప్రదేశ్, మహారాష్ట్ర, కర్ణాటక తదితర రాష్ట్రాలకు కూడా రాఖీలను పంపించుకునే వెసులుబాటును కల్పిస్తూ నిర్ణయం తీసుకున్నారు.

ఇందులో భాగంగానే రాష్ట్రంలోని అన్ని బస్టాండ్స్‌లోని కార్గో సెంటర్స్‌లో ప్రత్యేక కౌంటర్లను ఏర్పాటు చేయనున్నారు. అంతేకాకుండా కార్గో సెంటర్స్‌లో ప్యాకింగ్‌ను ఇచ్చిన 24 గంటల్లోనే డెలివరీ చేసేలా ప్రత్యేక చర్యలు తీసుకుంటున్నట్లు అధికారులు చెబుతున్నారు. ప్రస్తుతం అంతా సిద్ధంగా ఉన్నా.. రాఖీల రవాణాకు సంబంధించి ఇంకా ధర ఖరారు చేయని కారణంగా, ఉన్నతాధికారుల అనుమతి కోసం చూస్తున్నారు. అయితే ఇందుకోసం ఎంత ఛార్జీలు వసూలు చేస్తారన్న దానిపై వచ్చే సోమవారం స్పష్టత రానుందని తెలుస్తోంది.

మరిన్ని తెలంగాణ వార్తల కోసం క్లిక్ చేయండి..